ទោះបីមានអាយុកាលជាង ៥០ឆ្នាំក៏ដោយ ក៏គ្រាប់បែកចង្កោមជាសំណល់សង្គ្រាម នៅតែបន្តគំរាមកំហែងដល់អាយុជីវិត និងសុខសុវត្ថិភាពប្រជាជនកម្ពុជា
ភ្នំពេញ៖ ឯកឧត្ដម ហេង រតនា អគ្គនាយក ស៊ីម៉ាក់ បានថ្លែងឲ្យដឹងថា គ្រាប់បែកចង្កោមជាសំណល់សង្គ្រាមនៅកម្ពុជាទោះបីជាមានអាយុកាលជាង៥០ឆ្នាំហើយក៏ដោយ ក៏គ្រាប់បែកចង្កោមទាំងនោះ នៅតែបន្តគំរាមកំហែងដល់អាយុជីវិតនិងសុខសុវត្ថិភាពប្រជាជនកម្ពុជានៅឡើយ ។
តាមរយៈបណ្ដាញសង្គមហ្វេសប៊ុក នាថ្ងៃទី៩ កក្កដា ឯកឧត្ដម ហេង រតនា បានសរសេរក្នុងន័យដើមទាំងស្រុងដូចខាងក្រោម៖
សូមគាំទ្រយ៉ាងពេញទំហឹងចំពោះសារអំពាវនាវរបស់សម្តេចតេជោសំណូមពរប្រធានាធិបតីអាមេរិក និងប្រធានាធិបតីអ៊ុយក្រែន កុំឱ្យប្រើប្រាស់គ្រាប់បែកចង្កោមក្នុងសង្គ្រាមរវាង រុស្ស៊ី-អ៊ុយក្រែន!
គ្រាប់បែកចង្កោមជាសំណល់សង្គ្រាមនៅកម្ពុជាទោះបីជាមានអាយុកាលជាង៥០ឆ្នាំហើយក៏ដោយ ក៏គ្រាប់បែកចង្កោមទាំងនោះ នៅតែបន្តគំរាមកំហែងដល់អាយុជីវិតនិងសុខសុវត្ថិភាពប្រជាជនកម្ពុជានៅឡើយ!!
ក្តីឈឺចាប់និងផលលំបាកនៃសង្គ្រាមជាពិសេសដោយសារគ្រាប់បែកចង្កោមនៅកម្ពុជានិងបណ្តាប្រទេសរងគ្រោះមួយចំនួន ក៏ជាចំណែកមួយនៃចលនាបង្កើតអនុសញ្ញាអន្តរជាតិអូស្លូស្តីពី”ការហាមប្រាមការប្រើប្រាស់ ការផលិត ការស្តុកទុក និងការដឹកជញ្ជូនគ្រាប់បែកចង្កោម” ដែលបានចូលជាធរមានជាច្បាប់អន្តរជាតិ នៅឆ្នាំ២០០៨ មាន១២៣ប្រទេសក្នុងនោះមានរដ្ឋភាគីចំនួន១១១និងរដ្ឋហត្ថលេខីចំនួន១២។
ចូរចងចាំថា នៅទសវត្សរ៍ ៦០និង៧០ កម្ពុជារងការទម្លាក់ប្រមាណ៣០លានកូនគ្រាប់បែកចង្កោម លើគោលដៅ(ទីតាំងទម្លាក់)រាប់ម៉ឺនគោលដៅក្នុងក្របខណ្ឌទូទាំងប្រទេស។ តាមការសិក្សាវាយតំលៃឃើញថាគ្រាប់បែកចង្កោមដែលបានប្រើក្នុងសង្គ្រាមឥណ្ឌូចិន មានកំរិតអត្រាមិនផ្ទុះក្នុងការប្រើប្រាស់ក្នុងសង្គ្រាមមានចំនួនប្រមាណ២៥ទៅ៣០% ដែលបរិមាណនេះបន្តបង្កគ្រោះថ្នាក់រយ:ពេលយូរអង្វែង។
ផ្អែកលើភាពជាក់ស្តែងនេះ យើងខ្ញុំទាំងអស់គ្នាសូមគាំទ្រយ៉ាងពេញទំហឹងចំពោះការអំពាវនាវរបស់សម្តេចតេជោ ចំពោះប្រធានាធិបតីអាមេរិក និងប្រធានាធិបតីអ៊ុយក្រែនដែលជាអ្នកផ្តល់គ្រាប់បែកចង្កោម និងអ្នកទទួលយកគ្រាប់បែកចង្កោមទៅប្រើប្រាស់ សូមបញ្ឈប់មហិ្ឆតាប្រើប្រាស់គ្រាប់បែកចង្កោមនេះក្នុងសមរភូមិប្រយុទ្ធ ព្រោះថាវិនាសកម្មពិតប្រាកដគឺប្រជាជនស៊ីវិលស្លូតត្រង់ដែលត្រូវរង់ទុក្ខវេទនាយូរអង្វែងក្រោយសង្គ្រាមបានបញ្ចប់។
ទង្វើនេះក៏ពាក់ពន្ធ័ដោយផ្ទាល់ដល់ការគោរពច្បាប់អន្តរជាតិ និងសិទ្ធិមនុស្សផងដែរ! ។ សូមបញ្ជាក់ថា តាមព័ត៌មាននានា ថ្នាក់ដឹកនាំប្រទេសអង់គ្លេស កាណាដា អាឡឺម៉ង់ អេស្បាញ អូរទ្រីស ….និងអង្គការសង្គមស៊ីវិលយ៉ាងច្រើនបានប្រឆាំងនឹងការសំរេចចិត្តផ្តល់និងការប្រើប្រាស់ “គ្រាប់បែកចង្កោម”ក្នុងសង្គ្រាម រុស្ស៊ី-អ៊ុយក្រែន! ៕
