ឯកឧត្តម ឱម យ៉ិនទៀង៖ គណបក្សប្រជាជនតែមួយគត់ មានកម្មវិធីនយោបាយពិតប្រាកដ និងមានកម្លាំងគាំទ្រដ៏រឹងមាំស្មោះស័្មគ្រឥតងាករេ
ភ្នំពេញ៖ ឯកឧត្តម កិត្តិនីតិកោសលបណ្ឌិត ឱម យ៉ិនទៀង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងាររបស់គណបក្សចុះមូលដ្ឋានខណ្ឌទួលគោក នៅព្រឹកថ្ងៃទី៩ ខែកក្កដា ឆ្នាំ២០២៣ បានអញ្ជើញបើកយុទ្ធនាការឃោសនាបោះឆ្នោតលើកទី២ ដែលមានសមាជិក សមាជិកាគណបក្សប្រជាជនកម្ពុជា សរុបប្រមាណ ២,២០០នាក់ ទាំង១០សង្កាត់ ក្នុងខណ្ឌទួលគោក នៅមជ្ឈមណ្ឌលកម្សាន្តព្រីមៀមស្ពតក្លឹប។
ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានគូសបញ្ជាក់ថា គណបក្សប្រជាជនកម្ពុជាតែមួយគត់ មានកម្មវិធីនយោបាយពិតប្រាកដ និងមានកម្លាំងគាំទ្រដ៏រឹងមាំស្មោះស័្មគ្រឥតងាករេបោះឆ្នោតជូនគណបក្សប្រជាជនកម្ពុជាលេខរៀងទី១៨។
ឯកឧត្តម កិត្តិនីតិកោសលបណ្ឌិត ឱម យ៉ិនទៀង បានបន្តថ្លែងថា ដើម្បីអនុវត្តសិទ្ធបោះឆ្នោតរបស់ប្រជាពលរដ្ឋដូចមានចែងក្នុងរដ្ឋធម្មនុញ្ញ និងដើម្បីការពារសុខសន្តិភាព និងសម្រេចនូវជោគវាសនារបស់ខ្លួនយើងផ្ទាល់ និងក្រុមគ្រួសារ សង្គមជាតិ និងប្រទេសជាតិយើង សូមអំពាវនាវដល់បងប្អួនជនរួមជាតិ ក៏ដូចជាសមាជិកបក្សនិងប្រជាពលរដ្ឋទាំងអស់ដែលមានឈ្មោះក្នុងបញ្ជីបោះឆ្នោត សូមមេត្តាទៅបោះឆ្នោតជូនគណបក្សប្រជាជនកម្ពុជា ដែលមានរូបសញ្ញាទេវតាបាចផ្កា លេខរៀងទី១៨ នៅថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នាកុំបីខាន។
លើសពីនេះ ឯកឧត្តម កិត្តិនីតិកោសលបណ្ឌិត សូមឱ្យសមាជិក សមាជិការបស់គណបក្សប្រជាជនកម្ពុជា ដែលចូលរួមហែរក្បួនឱ្យ ប្រកាន់ខ្ជាប់នូវ ភាពថ្លៃថ្នូរ វិន័យ បន្ថយឱ្យអស់លទ្ធភាពពីការកកស្ទះចរាចរណ៍ គោរពច្បាប់ និងញញឹមបង្ហាញពីកម្លាំងដ៏ខ្លាំងខ្លារបស់គណបក្សប្រជាជនកម្ពុជា។
នៅក្នុងពិធីដង្ហែក្បួនឃោសនារកសំឡេងឆ្នោតជាលើកទី២ ត្រូវបានប្រជាជននៅតាមដងផ្លូវ និងនៅតាមមូលដ្ឋានសង្កាត់ទាំង១០ ក្នុងខណ្ឌទួលគោក អបអរសាទរស្វាគមន៍ និងបង្ហាញពីកម្លាំងគាំទ្រឥតងាករេជូនគណបក្សប្រជាជនកម្ពុជា ក៏ដូចជាបន្តគាំទ្រសម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី និងគាំទ្រឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីនាពេលអនាគត ៕
