ឯកឧត្តម អ៊ូច ភា អញ្ជើញសម្ពោធដាក់ឲ្យប្រើប្រាស់ជាផ្លូវការ សិប្បកម្មផលិតសំបកបាវរ៉ូហ្វាភ្នំដិន ក្នុងស្រុកគិរីវង់
ភ្នំពេញ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ នៅថ្ងៃអាទិត្យ ទី០៩ ខែកក្កដា ឆ្នាំ២០២៣ បានអញ្ជើញសម្ពោធដាក់ឱ្យប្រើប្រាស់ជាផ្លូវការ សិប្បកម្មផលិតសំបកបាវ រ៉ូហ្វាភ្នំដិន ដែលជាបុត្រសម្ព័ន្ធរបស់ ក្រុមហ៊ុនឈីវទីម៉ិចគ្រុប ស្ថិតក្នុងឃុំភ្នំដិន ស្រុកគិរវង់ ខេត្តតាកែវ។
ពិធីនេះដែរក៏មានការអញ្ជើញចូលរួមដោយ ឯកឧត្តម លោកជំទាវ លោកឧកញ៉ា លោកអភិបាលរងខេត្ត លោក លោកស្រី ប្រធានមន្ទីរអង្គភាពពាក់ព័ន្ធ លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត លោកអភិបាលស្រុកគិរីវង់ និងអាជ្ញាធរពាក់ព័ន្ធ ជាច្រើនរូបផងដែរ។
មានប្រសាសន៍នាឱកាសនោះដែរ ឯកឧត្តម អ៊ូច ភា អភិបាលខេត្ត បានលើកឡើងថា ការបង្កើតសិប្បកម្មនេះឡើងពិតជាមានសារសំខាន់ខ្លាំងណាស់សម្រាប់បងប្អូនប្រជាពលរដ្ឋ ដែលមានទីលំនៅក្បែរច្រកទ្វារព្រំដែននេះ និងវាយតម្លៃខ្ពស់ចំពោះខ្សែច្រវ៉ាក់ផលិតកម្ម និងសមត្ថភាពរបស់សិប្បកម្មនេះ ដែលយើងអាចចាត់ទុកថាទីនេះជាសិប្បកម្មមួយ ដែលអាចបានផលិតសំបកបាវសម្រាប់ផ្គត់ផ្គង់ទីផ្សារក្នុងស្រុកបាន។ ឯកឧត្តមអភិបាលខេត្ត ក៏បានលើកទឹកចិត្តឱ្យផលិតបានច្រើនជាងនេះថែមទៀត ពីព្រោះដើម្បីបំពេញតម្រូវការ និងជំនួសការនាំចូលពីខាងក្រៅ។
ឯកឧត្តមអភិបាលខេត្ត បានក្រើនរម្លឹកដល់ បងប្អូនប្រជាពលរដ្ឋទាំងអស់ សូមកុំភ្លេចនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ យើងនាំគ្នាទៅបោះឆ្នោតជូន គណបក្សប្រជាជនកម្ពុជា ដែលមានលេខរៀងទី១៨ រូបសញ្ញាទេវតាបាចផ្កាជាសម្គាល់ គឺ គូសអោយត្រូវ ដើម្បីបន្តគាំទ្រសម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រី សម្រាប់នីតិកាលទី៧ ឆ្នាំ២០២៣ គណបក្សប្រជាជនកម្ពុជា បង្កើតដោយប្រជាជន ដើម្បីដើម្បីប្រជាជន បម្រើប្រជាជន។
សូមជម្រាបជូនដែរថា សិប្បកម្មផលិតសំបកបាវរ៉ូហ្វាភ្នំដិន របស់ឧកញ៉ា ដួង តិច ដំណើរការដោយមានកម្មករ កម្មការនី ចំនួនជាង ១០០នាក់ ដោយទទួលបានប្រាកឈ្នួល ក្នុង១ខែ ចាប់ពី ២០០ដុល្លារឡើងទៅ និងស្នាក់នៅ បូកប្រាករង្វាន់ទៀងទាត់ ១០ដុល្លារ ព្រមទាំងប្រាក់ឧបត្ថម្ភផ្សេងៗស្របតាមគោលការណ៍របស់រាជរដ្ឋាភិបាល ៕
