ឯកឧត្តម ឈួរ សុបញ្ញា ដឹកនាំកិច្ចប្រជុំពិភាក្សាលើការរៀបចំផលិតខិតប័ណ្ណផ្សព្វផ្សាយលើការដំឡើងអត្រាឧបត្ថម្ភកម្មវិធីស្រ្តីមានផ្ទៃពោះ និងកុមារអាយុក្រោម២ឆ្នាំក្នុងគ្រួសារមានប័ណ្ណសមធម៌

ភ្នំពេញ៖ ឯកឧត្តម ឈួរ សុបញ្ញា រដ្ឋលេខធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រតិភូរាជរដ្ឋភិបាលទទួលបន្ទុកជាអគ្គនាយក នៃមូលនិធិជំនួយសង្គម នារសៀលថ្ងៃទី១០ ខែកក្កដា​ ឆ្នាំ២០២៣ បានអញ្ជើញដឹកនាំកិច្ចប្រជុំពិភាក្សាលើការរៀបចំផលិតខិតប័ណ្ណផ្សព្វផ្សាយលើការដំឡើងអត្រាឧបត្ថម្ភកម្មវិធីស្រ្តីមានផ្ទៃពោះ និងកុមារអាយុក្រោម២ឆ្នាំក្នុងគ្រួសារមានប័ណ្ណសមធម៌។

ឯកឧត្តម ឈួរ សុបញ្ញា បានឲ្យដឹងថា ស្របតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃទី២៣ ខែឧសភា ឆ្នាំ២០២៣ កន្លងទៅនៅខេត្តព្រះសីហនុ សម្តេចតេជោបានជំរុញឲ្យធ្វើការដំឡើងការឧបត្ថម្ភជូនស្រ្តីមានផ្ទៃពោះ និងកុមារដែលមានអាយុក្រោម២ឆ្នាំក្នុងគ្រួសារមានប័ណ្ណសមធម៌ ដោយឧបត្ថម្ភមុនសម្រាល៤ដង និងក្រោយសម្រាល១០ដង ក្នុង១ដងកើនពី ៤០,០០០រៀល ដល់ ៨០,០០០រៀល ដោយឡែកក្រោយពីសម្រាលកើនពី ២០០,០០០រៀល ដល់ ៤០០,០០០រៀល។

ជាមួយគ្នានេះផងដែរ ឯកឧត្តម ឈួរ សុបញ្ញា បានបញ្ជាក់ថា ក៏មានការសម្រួលខ្លឹមសារជាអនុសាសន៍របស់សម្តេចតេជោ នៅពេលដែលសម្តេចមានប្រសាសន៍ កាលពីថ្ងៃទី២៥ ខែមិថុនា ឆ្នាំ២០២៣ កន្លងទៅនៅខេត្តកំពង់ចាម គឺការដំឡើង និងពិចារណាបន្ថែមទៅលើស្រ្តីដែលមានកូនភ្លោះ១ ទទួលបាន ២០០,០០០រៀល, កូនភ្លោះ២ ទទួលបាន ៦០០,០០០រៀល និងកូនភ្លោះ៣ ទទួលបាន ៨០០,០០០រៀល។

សូមជម្រាបជូនថា អង្គប្រជុំក៏បានសម្រេច និងឯកភាពទៅលើខ្លឹមសារនៃខិតប័ណ្ណផ្សព្វផ្សាយលើការដំឡើងអត្រាឧបត្ថម្ភកម្មវិធីស្រ្តីមានផ្ទៃពោះ និងកុមារអាយុក្រោម២ឆ្នាំក្នុងគ្រួសារមានប័ណ្ណសមធម៌ បានបញ្ចប់ការពិភាក្សាដោយដាក់ទៅក្រុមការងារបច្ចេកទេសធ្វើការកែសម្រួល និងប្រជុំបញ្ចប់នៅក្នុងសប្តាហ៍ក្រោយ ៕