អភិបាលខេត្តស្វាយរៀង ដឹកនាំប្រតិភូខេត្ត ចូលរួមគោរពវិញ្ញាណក្ខន្ធសពលោកជំទាវ មហាឧបាសិកាពុទ្ធសាសនូបត្ថម្ភក៍ ទុំ សាលឿង ត្រូវជាភរិយារបស់ឯកឧត្តម គឹម ធា សមាជិកព្រឹទ្ធសភា
ភ្នំពេញ៖ ឯកឧត្តម ម៉ែន វិបុល អភិបាលខេត្តស្វាយរៀង នាព្រឹកថ្ងៃអង្គារ ៩រោច ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១១ ខែកក្កដា ឆ្នាំ២០២៣ បានដឹកនាំប្រតិភូខេត្ត រួមមានឯកឧត្តម លោកជំទាវ អភិបាលរងខេត្ត លោកនាយក នាយករដ្ឋបាលសាលាខេត្ត លោកប្រធានមន្ទីរ អង្គភាពនានា ក្នុងខេត្ត លោក លោកស្រីនាយកទីចាត់ការ /ប្រធានអង្គភាពចំណុះសាលាខេត្តស្វាយរៀង បានអញ្ជើញចូលរួមគោរពវិញ្ញាណក្ខន្ធសពលោកជំទាវ មហាឧបាសិកាពុទ្ធសាសនូបត្ថម្ភក៍ ទុំ សាលឿង ត្រូវជាភរិយារបស់ឯកឧត្តម គឹម ធា សមាជិកព្រឹទ្ធសភា ដែលបានទទួលមរណភាព នៅព្រឹកថ្ងៃចន្ទ ទី១០ ខែកក្កដា ឆ្នាំ២០២៣ វេលាម៉ោង ១០:៥៤នាទី ក្នុងជន្មាយុ ៦៦ឆ្នាំ ដោយរោគាពាធ។
ឯកឧត្តមអភិបាលខេត្ត និងប្រតិភូ បានសម្តែងនូវការសោកស្តាយ ចំពោះមរណភាពរបស់ មហាឧបាសិកាពុទ្ធសាសនូបត្ថម្ភក៍ ទុំ សាលឿន គឺជាការបាត់បង់នូវភរិយា ម្តាយ ម្តាយក្មេក ជីដូន ប្រកបដោយព្រហ្មវិហារធម៌ ជាទីគោរពស្រឡាញ់របស់កូន និងចៅៗ ដោយមួយជីវិតរបស់លោកជំទាវ មហាឧបាសិកាពុទ្ធសាសនូបត្ថម្ភក៍ បានលះបង់អស់កម្លាំងកាយចិត្ត ក្នុងការចិញ្ចឹមបីបាច់ថែរក្សា និងផ្ដល់ដំបូន្មានល្អៗ ដល់កូនឱ្យក្លាយជាពលរដ្ឋល្អនៅក្នុងសង្គម និងខិតខំធ្វើតែអំពើជាកុសល និងសូមចូលរួមរំលែកទុក្ខដោយក្ដីសោកសង្រេងបំផុតជាមួយ ឯកឧត្តម ព្រមទាំងក្រុមគ្រួសារ និងសូមបួងសួងដល់ដួងវិញ្ញាណក្ខន្ធរបស់ មហាឧបាសិកាពុទ្ធសាសនូបត្ថម្ភក៍ ទុំ សាលឿន បានទៅ សោយសុខក្នុងឋានសុគតិភព កុំបីឃ្លៀងឃ្លាតឡើយ។
ឆ្លៀតក្នុងឱកាសនោះឯកឧត្តមអភិបាលខេត្ត បាននាំយកនូវទយ្យទាន និងថវិការចូលបុណ្យចំនួន ៥លានរៀល និងថវិកាសមាគមន៍មន្ត្រីរាជការស៉ីវិលចំនួន១,៥០០០០០រៀលផងដែរ ៕
