អាជ្ញាធរជាតិប្រយុទ្ធប្រឆាំងគ្រឿងញៀន បដិសេធចំពោះខ្លឹមសារ The Cambodia Daily Khmer មានចំណងជើងថា “គ្រួសាររបស់លោកហ៊ុន សែន ត្រូវគេរកឃើញថាជាអ្នកនៅពីក្រោយ នៃការចរាចរ គ្រឿងញៀន”

ភ្នំពេញ៖ អាជ្ញាធរជាតិប្រយុទ្ធប្រឆាំងគ្រឿងញៀន ចេញសេចក្តីថ្លែងការណ៍បដិសេធ ចំពោះខ្លឹមសារ The Cambodia Daily Khmer មានចំណងជើងថា “គ្រួសាររបស់លោកហ៊ុន សែន ត្រូវគេរកឃើញថាជាអ្នកនៅពីក្រោយ នៃការចរាចរ គ្រឿងញៀន” ដែលបានចេញផ្សាយកាលពីយប់ថ្ងៃទី១១ ខែកក្កដា ឆ្នាំ២០២៣។

យោងតាមសេចក្តីថ្លែងការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា ការលើកឡើងរបស់ The Cambodia Daily Khmer មានគោលបំណងបំភ្លៃព័ត៌មាន ដែលមានចរិតនយោបាយ ប្រឌិត មួលបង្កាច់អំពីស្ថានការណ៍កម្ពុជា មួលបង្កាច់មកលើថ្នាក់ដឹកនាំរាជរដ្ឋាភិបាល ជាពិសេសមកលើសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងគ្រួសាររបស់សម្ដេច។

សេចក្តីថ្លែងការណ៍បានឱ្យដឹងទៀតថា កាសែតមួយនេះ បាន មួលបង្កាច់ បំភាន់អំពីស្ថានភាពគ្រឿងញៀននៅកម្ពុជា ហើយធ្វើមិនឃើញ មិនដឹងមិនឮ អំពីកិច្ចខិតខំប្រឹងប្រែងរបស់រាជរដ្ឋាភិបាល និងប្រជាពលរដ្ឋកម្ពុជា៕