ឧត្តមសេនីយ៍ទោ ឡោ សុខា អញ្ជើញបិទវគ្គបណ្តុះបណ្តាលរយៈពេលខ្លី ស្តីពីតួនាទីភារកិច្ចរបស់ប៉ុស្តិ៍នគរបាលរដ្ឋបាល នៃស្នងការនគរបាលខេត្តមណ្ឌលគិរី
ភ្នំពេញ៖ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី នាព្រឹកថ្ងៃសុក្រ ១២រោច ខែបឋមាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៤ ខែកក្កដា ឆ្នាំ២០២៣ បានអញ្ជើញជាអធិបតីក្នុងពិធីបិទវគ្គបណ្តុះបណ្តាល ស្តីពីតួនាទីភារកិច្ចរបស់ប៉ុស្តិ៍នគរបាលរដ្ឋបាល។ ពិធីនេះមានការអញ្ជើញ ចូលរួមពីលោក លោកស្រីស្នងការរងលោកនាយ នាយរងការិយាល័យ អធិការ អធិការរង ក្រុង/ស្រុកទាំងប្រាំ ព្រមទាំង គ្រូឧទ្ទេសរួមនិងសិក្ខាកាមដែលបានបញ្ចប់វគ្គសិក្សារយៈពេលដ៏ខ្លីមួយនេះ។
ស្ថិតក្នុងឱកាសនៃពិធីបិទវគ្គបណ្តុះបណ្តាលរយៈពេលខ្លី ស្តីពីតួនាទីភារកិច្ចរបស់ប៉ុស្តិ៍នគរបាលរដ្ឋបាលក្នុងឱកាសនោះផងដែរ លោកឧត្តមសេនីយ៍ទោ ឡោ សុខា ស្នងការនគរបាលខេត្ត បានមានប្រសាសន៍ និងបានអបអរសាទរដល់សិក្ខាកាមទាំងអស់ ដែលបានខិតខំយកចិត្តទុកដាក់ក្នុងវគ្គសិក្សានេះ ទទួលផ្លែផ្កាប្រកបទៅដោយភាពជោគជ័យគួរជាទីមោទន:ភាព។
ទន្ទឹមគ្នានោះផងដែរ លោកឧត្តមសេនីយ៍ទោ ស្នងការ បានមានប្រសាសន៍ផ្តាំផ្ញើដល់សិក្ខាកាមទាំងអស់ ដែលបានឆ្លងកាត់នៅវគ្គបណ្តុះបណ្តាលនាពេលនេះ ត្រូវយកចំណេះដឹងទាំងអស់នេះ យកទៅបំពេញភារកិច្ចនៅតាមមូលដ្ឋាន អោយចំគោលដៅ និងមានប្រសិទ្ធភាពសាកសំជានគរបាលជាតិ ប្រកបដោយវិជ្ជាជីវ:ដោយអនុវត្តន៍នៅក្រមសីលធម៌ និងគោរពវិន័យអោយបានខ្ជាប់ខ្ជួន ជាកងកម្លាំងនគរបាលជាតិ គឺត្រូវគោរព និងអនុវត្តដោយស្មោះត្រង់ ជាមួយប្រជាពលរដ្ឋ រស់រាយរាក់ទាក់ជាមួយប្រជាពលរដ្ឋ និងមិនធ្វើឲ្យប៉ះពាល់ដល់ផលប្រយោជន៍របស់ប្រជាពលរដ្ឋ ហើយត្រូវមានអាកប្បកិរិយាស្លូតបូតសុភាពរាបសារ តែហ្ម៉ឺងម៉ាត់ក្នុងការងារ។
បន្ថែមពីនេះ លោកឧត្តមសេនីយ៍ទោ ស្នងការ បានក្រើនរំលឹកណែនាំបន្ថែម ពីលើការងារក្តាប់សភាពការណ៍ បង្ការបង្ក្រាបទប់ស្កាត់នូវរាល់បទល្មើសគ្រប់ប្រភេទ នៅតាមបណ្ដាអង្គភាពក៏ដូចជាមូលដ្ឋានរបស់ខ្លួនផ្ទាល់ ជាពិសេសខ្ញុំសូមដាស់តឿនទៅដល់មន្ត្រីនគរបាលទាំងអស់ សូមចៀសអោយឆ្ងាយពីល្បែងស៊ីសង និងបទល្មើសគ្រប់ប្រភេទ ជាពិសេសបទល្មើសសេបនិងប្រើប្រាស់គ្រឿងញៀនគ្រប់ប្រភេទ សូមចៀសអោយឆ្ងាយ។
មុននិងបញ្ចប់លោកឧត្តមសេនីយ៍ទោ ស្នងការ ក៏បានផ្ដល់ជាកិត្តិយសចំណាយពេលដ៏មានតម្លៃផ្ដល់នូវលិខិតថ្លែងអំណរគុណ ដល់គ្រូឧទ្ទេស ចំនួន១២រូប និងវិញ្ញាបនបត្របញ្ជាក់ការសិក្សាជូនដល់សិក្ខាកាម ចំនួន៧៩រូប ដែលបានផ្ដល់ជូនមុននិងបញ្ចប់ពិធីនាឱកាសនោះដែរ លោកឧត្តមសេនីយ៍ទោ ស្នងការ ក៏បានថ្លែងអំណរគុណ និងជូនពរអោយសិក្ខាកាមមន្ត្រីនគរបាលទាំងអស់អោយជោគជ័យគ្រប់ភារកិច្ច និងជួបតែពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕
