ឯកឧត្តម គួច ចំរើន អញ្ជើញប្រគល់ព្រះរាជក្រឹត្យចូលសញ្ជាតិខ្មែជូនលោកឪពុកអធិការសាលាបច្ចេកទេសដុនបូស្កូ ក្រុងព្រះសីហនុ

ភ្នំពេញ៖ ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ នាព្រឹកថ្ងៃទី១៩ ខែកក្កដា ឆ្នាំ២០២៣ បានអញ្ជើញប្រគល់ព្រះរាជក្រឹត្យចូលសញ្ជាតិខ្មែជូនលោកឪពុកអធិការសាលាបច្ចេកទេសដុនបូស្កូ ក្រុងព្រះសីហនុ នៅសាលាដុនបូស្កូ ស្ថិតនៅសង្កាត់លេខ៤ ក្រុងព្រះសីហនុ ដោយមានការចូលរួមពីលោកអភិបាលរងខេត្ត លោកនាយក នាយករងរដ្ឋបាលខេត្ត លោកអភិបាលក្រុងព្រះសីហនុ លោក លោកស្រី នាយកទីចាត់ការ និងប្រធានមន្ទីរ អង្គភាព។

ព្រះរាជក្រឹត្យលេខ នស/រកត០៥២៣/៨២១ ត្រាស់បង្គាប់ ផ្តល់សញ្ជាតិខ្មែរ ដោយសញ្ជាតូបនីយកម្មដល់លោក យូជីន ខាល់កូ (EUGINE XALXO) ជនជាតិឥណ្ឌា សញ្ជាតិឥណ្ឌា កើតនៅថ្ងៃទី២១ ខែឧសភា ឆ្នាំ១៩៧៥ នៅទីក្រុង JASHPURNAGAR CHHATISGARH សាធារណរដ្ឋឥណ្ឌា។

ឯកឧត្តម គួច ចំរើន អភិបាលខេត្ត បានបញ្ជាក់ថា ដោយសារតែលោកមកនៅកម្ពុជា ជាង ២២ឆ្នាំ និងនិយាយភាសារខ្មែរបានល្អ ដោយមានការយល់ព្រមពីរូបលោក ទើបខ្ញុំបានស្នើសុំទៅសម្តេចតេជោ នាយករដ្ឋមន្ត្រីកម្ពុជា ដោយបានបញ្ជាក់អំពីគុណតម្លៃការងារដោយការការគោរពស្រឡាញ់ពីសិស្ស និស្សិតរបស់យើងដែលបានជួយបណ្តុះបណ្តាលជាច្រើនឆ្នាំកន្លងមកហើយ ទោះបីលោកជាជនជាតិឥណ្ឌា ក៏ប៉ុន្តែជីវិតការងារជាមួយប្រជាជនកម្ពុជាច្រើន ហើយចំណេះវិជ្ជារបស់គាត់បានយកមកចែករំលែកដល់យុវជនយើង ហើយបានបន្តរួមចំណែកជួយដល់កូនចៅរបស់យើង រយៈពេលកម្លងមកនេះការបណ្តុះបណ្តាលវិជ្ជាជីវរាជរដ្ឋាភិបាលទើបតែចាប់ផ្តើមក្រោយសាលាដុនបូស្កូ ព្រោះសាលាដុនបូស្កូបានចាប់ផ្តើមនៅទឹកថ្លា រាជធានីភ្នំពេញ រួចពង្រីកមកដល់ខេត្តព្រះសីហនុ យើងចង់ពង្រីកគោលដៅឱ្យធំជាងនេះ និងសូមអបអរសាទរលោក តាមរយៈសម្តេចតេជោ ព្រះមហាក្សត្រនៃព្រះរាជាណាចក្រកម្ពុជា បានឡាយព្រហស្តលេខា ផ្តល់នូវសញ្ជាតិជូនគាត់ ក្នុងនាមរដ្ឋបាលខេត្ត សូមសំដែងអបអរសាទរសូមជូនពរមានសុខភាពល្អ បន្តការបណ្តុះបណ្តាលដល់យុវជន យុវនារីកម្ពុជាឱ្យបានកាន់តែច្រើនបន្ថែមទៀត រួមចំណែកអភិវឌ្ឍធនធានមនុស្សរបស់យើងឈានទៅជំរុញកំណើនសេដ្ឋកិច្ចជាតិឱ្យកាន់តែរីកលូតលាស់បន្តទៀត។

ឯកឧត្តមអភិបាលខេត្ត បានថ្លែងអំណរគុណសាលាដុនបូស្កូបានផ្តល់ភាពអនុគ្រោះ ដូចជាការផ្តល់ទីកន្លែងសឹងគ្រប់កម្មវិធីចែកអំណោយមនុស្សធម៌ រួមទាំងកម្មវិធីការងារសង្គមនានា ជូនប្រជាពលរដ្ឋក្រីក្ររបស់យើងនៅ ក្នុងក្រុងព្រះសីហនុ ហើយយុវជនរបស់យើងដែលបញ្ចប់ការបណ្តុះបណ្តាលនៅទីនេះ បានចេញទៅបំរើការងារនៅតាមសហគ្រាស អង្គភាពផ្សេងៗជាធនធានដែលមានសមត្ថភាព មានសក្តានុពល មានការតស៊ូព្យាយាម ដែលសហគ្រាសទាំងឡាយមានការកោតសរសើរអំពីធនធានមនុស្សដែលចេញពីសាលាដុនបូស្កូរបស់យើង ដែលមានសីលធម៌ តស៊ូព្យាយាមការងារបានល្អ ៕