អាមេរិកប្រកាសជំនួយយោធាបន្ថែម ១,៣ ពាន់លានដុល្លារសម្រាប់អ៊ុយក្រែន
វ៉ាស៊ីនតោន៖ សហរដ្ឋអាមេរិកនៅថ្ងៃពុធនេះ បានប្រកាសផ្តល់ជំនួយផ្នែកសន្តិសុខបន្ថែមចំនួនប្រហែល ១,៣ ពាន់លានដុល្លារសម្រាប់អ៊ុយក្រែន ក្នុងសង្រ្គាមរបស់ខ្លួនជាមួយរុស្ស៊ី ដែលជាកញ្ចប់រួមទាំងសមត្ថភាពការពារដែនអាកាស យន្តហោះគ្មានមនុស្សបើក និងគ្រាប់បែក។
មន្ទីរបញ្ចកោណបានឲ្យដឹងនៅក្នុងសេចក្តីថ្លែងការណ៍មួយថា សេចក្តីប្រកាសនេះតំណាងឱ្យការចាប់ផ្តើមនៃដំណើរការចុះកិច្ចសន្យាដើម្បីផ្តល់សមត្ថភាពជាអាទិភាពបន្ថែមដល់អ៊ុយក្រែន។
សហរដ្ឋអាមេរិកកំពុងប្រើប្រាស់មូលនិធិនៅក្នុងកម្មវិធីគំនិតផ្តួចផ្តើមជំនួយសន្តិសុខអ៊ុយក្រែន (USAI) របស់ខ្លួន ដែលអនុញ្ញាតឱ្យរដ្ឋបាលរបស់លោកប្រធានាធិបតីសហរដ្ឋអាមេរិក Joe Biden ទិញអាវុធពីឧស្សាហកម្មជាជាងទាញយកពីស្តុកអាវុធរបស់សហរដ្ឋអាមេរិក។
កញ្ចប់នេះរួមមានប្រព័ន្ធមីស៊ីលផ្ទៃដីទៅអាកាសកម្រិតខ្ពស់ជាតិចំនួនបួន (NASAMS) និងគ្រាប់រំសេវ; កាំភ្លើងធំ ១៥២ មិល្លីម៉ែត្រ; ឧបករណ៍បោសសំអាតមីន; និងយន្តហោះគ្មានមនុស្សបើក នេះបើយោងតាមមន្ទីរបញ្ចកោណ។
ក្រសួងការពារជាតិអាមេរិកបានប្រកាសជំនួយមួយថ្ងៃបន្ទាប់ពីកិច្ចប្រជុំនិម្មិតនៃក្រុមទំនាក់ទំនងការពារជាតិអ៊ុយក្រែន ដែលជាសម្ព័ន្ធមិត្តជួយអ៊ុយក្រែន ខណៈដែលកងកម្លាំងរបស់ខ្លួនកំពុងធ្វើការវាយលុកប្រឆាំងនឹងកងទ័ពរុស្ស៊ីដែលកំពុងកាន់កាប់ទឹកដីអ៊ុយក្រែន។
ការដឹកជញ្ជូនអាវុធ និងប្រព័ន្ធអាស្រ័យលើភាពអាចរកបាន និងពេលវេលាផលិតរបស់វា។
មន្ទីរបញ្ចកោណបានផ្តល់ជំនួយផ្នែកសន្តិសុខជាង ១០,៨ ពាន់លានដុល្លារសម្រាប់អ៊ុយក្រែន ក្រោមទីភ្នាក់ងារ USAI ក្នុងឆ្នាំសារពើពន្ធ ២០២៣ ក្នុងចំនួនប្រាំពីរដាច់ដោយឡែកពីគ្នា។ កញ្ចប់ដែលបានគ្រោងទុកនឹងជាលើកទីប្រាំបី។ នៅក្នុងឆ្នាំសារពើពន្ធដែលបានបញ្ចប់នៅថ្ងៃទី៣០ ខែកញ្ញា ឆ្នាំ២០២២ ទីក្រុងវ៉ាស៊ីនតោនបានដាក់មូលនិធិ USAI ដែលមានតម្លៃ ៦.៣ ពាន់លានដុល្លារ ដើម្បីធ្វើការទិញសម្រាប់វិស័យការពារជាតិរបស់អ៊ុយក្រែន។
សរុបមក សហរដ្ឋអាមេរិកបានបញ្ជូនជាង ៤០ ពាន់លានដុល្លារជាជំនួយផ្នែកសន្តិសុខ និងយោធាដល់អ៊ុយក្រែន ចាប់តាំងពីរុស្ស៊ីបានឈ្លានពានក្នុងខែកុម្ភៈ ឆ្នាំ២០២២។
កញ្ចប់នេះរួមមានគ្រាប់បែកពីរប្រភេទផ្សេងគ្នាគឺយន្តហោះគ្មានមនុស្សបើក Phoenix Ghost ផលិតដោយ AVEVEX ដែលជាក្រុមហ៊ុនឯកជននៅរដ្ឋកាលីហ្វ័រញ៉ា និង Switchblade ផលិតដោយ AeroVironment។
កាលពីដើមខែនេះ សហរដ្ឋអាមេរិកបានប្រកាសថា ខ្លួននឹងបញ្ជូនគ្រាប់បែកចង្កោមអ៊ុយក្រែន ដែលហាមឃាត់ដោយប្រទេសជាង ១០០ប្រទេស ទៅអ៊ុយក្រែន។ ក្រុមសិទ្ធិមនុស្ស និងសម្ព័ន្ធមិត្តមួយចំនួនរបស់សហរដ្ឋអាមេរិក រួមទាំងអាល្លឺម៉ង់ និងកាណាដា ជំទាស់នឹងការសម្រេចចិត្តនោះ។
ប្រភព៖ Reuters
ប្រែសម្រួលដោយ៖ {ឡាយ លីហួ}
