សហរដ្ឋអាមេរិក បញ្ជូននាវាចម្បាំង និងកងម៉ារីនបន្ថែមទៅកាន់តំបន់ឈូងសមុទ្រអារ៉ាប់ ដោយអះអាងថា ដើម្បីរារាំងកិច្ចខិតខំប្រឹងប្រែងរបស់អ៊ីរ៉ង់ ក្នុងការរឹបអូសនាវាពាណិជ្ជកម្ម

វ៉ាស៊ីនតោន៖ សហរដ្ឋអាមេរិកកំពុងបញ្ជូននាវាចម្បាំងបន្ថែម និងកងម៉ារីនរាប់ពាន់នាក់ ទៅកាន់តំបន់មជ្ឈិមបូព៌ាដើម្បីបង្កើនសន្តិសុខ បន្ទាប់ពីមានការប៉ុនប៉ងរបស់អ៊ីរ៉ង់ ក្នុងរឹបអូសនាវាពាណាជ្ជកម្មនៅទីនោះ។

រដ្ឋមន្ត្រីការពារជាតិអាមេរិក លោក Lloyd Austin កាលពីថ្ងៃព្រហស្បតិ៍បានអនុម័ត លើការដាក់ពង្រាយក្រុមត្រៀមលក្ខណៈវាយប្រហារ ​​​និងកងកម្លាំងបេសកកម្មដែនសមុទ្រទី ២៦ ទៅកាន់តំបន់ឈូងសមុទ្រ នេះបើយោងតាមមន្ត្រីអាមេរិក។ ក្រុម​ត្រៀម​លក្ខណៈវាយប្រហារ ​មាន​នាវាចំនួន​បីគ្រឿង ក្នុងនោះ​រួម​ទាំង​នាវា​វាយលុក​នាវាចម្បាំង USS Bataan ខណៈកម្លាំងបេសកកម្មជាធម្មតាមានទាហានម៉ារីនប្រមាណ ២,៥០០នាក់។ក្រៅពីនាវា USS Bataan ក្រុមនេះរួមបញ្ចូលទាំងនាវាចម្បាំងពីរផ្សេងទៀត USS Mesa Verde និង USS Carter Hall ។ ក្រុមនេះបានចាកចេញពីកំពុងផែ Norfolk រដ្ឋ Virginia កាលពីដើមខែនេះ។

ទីបញ្ជាការកណ្តាលរបស់សហរដ្ឋអាមេរិក បាននិយាយនៅក្នុងសេចក្តីប្រកាសមួយថា ការដាក់ពង្រាយនេះនឹងផ្តល់នូវ «ភាពបត់បែនកាន់តែច្រើន និងសមត្ថភាពកងទ័ពជើងទឹកនៅក្នុងតំបន់»។

គួរបញ្ជាក់ថា ការដាក់ពង្រាយនេះធ្វើឡើង បន្ទាប់ពីការសម្រេចចិត្តក្នុងប៉ុន្មានសប្តាហ៍ថ្មីៗនេះ ក្នុងការបញ្ជូននាវាពិឃាត USS Thomas Hudner និងយន្តហោះចម្បាំង F-35 និង F-១៦ មួយចំនួនទៅកាន់តំបន់។ យន្តហោះ​វាយប្រហារ A-10 ក៏​បាន​ទៅ​ទីនោះ​ជា​ច្រើន​សប្តាហ៍ ដើម្បី​ឆ្លើយតប​នឹង​សកម្មភាព​អ៊ីរ៉ង់ផងដែរ។កាលពីដើមខែនេះ អ៊ីរ៉ង់បានព្យាយាមរឹបអូសយកនាវាដឹកប្រេងពីរគ្រឿងនៅជិតច្រកសមុទ្រ Hormuz ហើយបានបើកការបាញ់ប្រហារទៅលើនាវាដឹកប្រេងមួយគ្រឿង។ គោលបំណងនៃការដាក់ពង្រាយនេះគឺ ដើម្បីផ្តល់គម្របអាកាសសម្រាប់កប៉ាល់ពាណិជ្ជកម្មដែលឆ្លងកាត់ផ្លូវទឹក Hormuz និងបង្កើនការមើលឃើញសកម្មភាពយោធានៅក្នុងតំបន់ជាដើម នេះបើតាមការអះអាងរបស់ភាគីសហរដ្ឋអាមេរិក៕

ប្រភព​ AFP