ខឹងសុំផ្លែឪឡឹកហូបមិនឲ្យបុរសម្នាក់ទាញដំបងវាយលោកតាវ័យ៨១ឆ្នាំ បណ្តាលឲ្យស្លាប់
បន្ទាយមានជ័យ៖ ខឹងនិងសុំផ្លែឪឡឹកហូបមិនឲ្យបុរសម្នាក់បានយកដំបងវាយទៅលើលោកតាវ័យ៨១ឆ្នាំបណ្តាលឲ្យស្លាប់ ត្រូវកម្លាំងនគរបាលប៉ុស្តិ៍ស្លក្រាម ស្រុកស្វាយចេកចាប់ឃាត់ខ្លួន ។ហឹង្សាដោយចេតនានេះបានកើតឡើងនៅវេលាម៉ោង៨និង៣០នាទីព្រឹកថ្ងៃទី២៥ ខែកក្កដា ឆ្នាំ ២០២៣ នៅភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានឲ្យដឹងថា ជនរងគ្រោះឈ្មោះ ព្រឿង ព្រឿយ ភេទប្រុស អាយុ៨១ឆ្នាំ រស់នៅភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជយ័ ។ចំណែកជនសង្ស័យ ឈ្មោះសូ ឡិ ភេទប្រុស អាយុ៣១ឆ្នាំ រស់នៅភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកអធិការបានបន្តថា នៅមុនពេលកើតហេតុ ជនសង្ស័យបានដើរទៅផ្ទះជនរងគ្រោះ ហើយបានឃើញផ្លែឪឡឹក មួយចំហៀង ក៏សុំជនរងគ្រោះហូប តែជនរងគ្រោះមិនឲ្យថាទុកឲ្យចៅគាត់ហូប ស្របពេលនោះជនសង្ស័យបានខឹងក៏ទាញដំបងឈើវាយទៅលើជនរងគ្រោះត្រូវចំឆ្អឹងជំនីខាងឆ្វេងមួយកន្លែងនិងកែងដៃស្តាំមួយកន្លែង បណ្តាលឲ្យស្លាប់តែម្តង ។
លោកវរសេនីយ៍ឯក ជា ស្លូញ បានបញ្ជាក់ថា ក្រោយកើតហេតុ ដោយមានបទបញ្ជាពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត និងមានការសម្របាម្រួលនិតិវិធីពីឯកឧត្តមកើត សុវណ្ណារេត ព្រះរាជអាជ្ញាសាលាដំបូងខេត្តបន្ទាយមានជ័យ។
ជនសង្ស័យត្រូវបានម្លាំងនគរបាលប៉ុស្តិ៍ស្លក្រាមនៃអធិការដ្ឋាននគរបាលស្រុក ចាប់ឃាត់ខ្លួន បញ្ជូនខ្លួនទៅអធអិការដ្ឋាននគរបាលស្រុកស្វាយចេក ដើម្បីរៀបចំសំណុំរឿងបញ្ជូនទៅស្នងការដ្ឋាននគរបាលខេត្ត អនុវត្តនិតិវិធីបន្ត៕
