ក្រុមការងារគណបក្សចុះមូលដ្ឋានក្រុងក្រចេះ ប្រគេនទៀនព្រះវស្សា និងទេយ្យវត្ថុ គ្រឿងឧបភោគ បរិភោគ និងបច្ច័យកមួយចំនួន តាមបណ្តាវត្តទាំង១២ ក្នុងក្រុងក្រចេះ
ភ្នំពេញ៖ ឯកឧត្តម វ៉ា ថន សមាជិកគណៈកម្មាធិការកណ្តាល និងជាប្រធានគណបក្សខេត្តក្រចេះ និងឯកឧត្ដម ឈឿន ប៊ុណ្ណារ័ត្ន សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងក្រចេះ លោកជំទាវ សៅ សុគន្ធារី ប្រធានក្រុមការងារគណបក្សចុះមូលដ្ឋានសង្កាត់ក្រគរ ឯកឧត្តម អ៊ុយ ភារក្ស ប្រធានក្រុមការងារគណបក្សចុះមូលដ្ឋានសង្កាត់កោះទ្រង់ ឯកឧត្តម ងី ឡាយមិថុនា ប្រធានក្រុមការងារគណបក្សចុះមូលដ្ឋានសង្កាត់អូឬស្សី នាព្រឹកថ្ងៃសុក្រ ១១កើត ខែទុតិយាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២៨ ខែកក្កដា ឆ្នាំ២០២៣ បានអញ្ជើញចូលរួមប្រគេនទៀនព្រះវស្សា និងទេយ្យវត្ថុ គ្រឿងឧបភោគ បរិភោគ និងបច្ច័យកមួយចំនួន ដល់ព្រះសង្ឃដែលគង់ចាំព្រះវស្សា តាមបណ្តាវត្តទាំង១២ ក្នុងក្រុងក្រចេះ ខេត្តក្រចេះ នៅបរិវេណវត្តពោធិសត្ថារាម (ហៅវត្តហុងឡាំ) ភុមិអូរឬស្សី៣ សង្កាត់អូរឬស្សី ក្រុងក្រចេះ។ ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី អនុប្រធាន ក្រុមការងារគណបក្សគ្រប់លំដាប់ថ្នាក់ចុះមូលដ្ឋាន ក្រុងក្រចេះ ព្រះសង្ឃ តាជី យាយជី គណកម្មការវត្ត និងពុទ្ធបរិស័ទចំណុះជើងវត្ត ដែលមានសមាសភាពចូលរួមសរុបចំនួន ១៣៦នាក់។
ក្នុងឱកាសនេះដែរឯកឧត្តម វ៉ា ថន បានមានមតិសំណេះសំណាល និងថ្លែងអំណរគុណ ដល់ប្រជាជពលរដ្ឋ និងព្រះសង្ឃ ក្នុងក្រុងក្រចេះ ដែលបានបោះឆ្នោតគាំទ្រគណបក្សប្រជាជនកម្ពុជាយ៉ាងច្រើនសន្ធឹកសន្ធាប់រហូតដល់ជាង ៨០% និងការគាំទ្រយ៉ាងពេញទំហឹង និងអបអរសាទរចំពោះ ឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តីសម្រាប់អាណត្តិទី៧ នៃរដ្ឋសភា។
ឯកឧត្តម វ៉ា ថន ក៏បានសូមគោរពអរព្រះគុណ និងសូមអរគុណយ៉ាងជ្រាលជ្រៅរបំផុតជូនចំពោះព្រះថេរានុថេរៈ គ្រប់ព្រះអង្គ និងពុក ម៉ែ ពូ មីង បងប្អូនប្រជាជនដែលបានផ្តល់នូវទំនុកចិត្ត ជឿជាក់ ស្រលាញ់ គាំទ្រ និងបោះឆ្នោតជូនគណបក្សប្រជាជនកម្ពុជាបន្តដឹកនាំប្រទេសជាតិ។
បន្ទាប់មកឯកឧត្តមប្រធាន ក៏បានប្រគេនដោយក្នុងមួយវត្តៗទទួលបាន៖ ទៀនព្រះវស្សា ១គូ, អង្ករ ១បេ, ទៀនតូច ២គីឡូក្រាម, ស្លាដក់ ១សម្រាប់, មី ២កេស, ភេសជ្ជ: ២កេស, ទឹកបរិសុទ្ធ ២កេស, ទឹកត្រី ២យួរ, ទឹកស៊ីអ៊ីវ ២យួរ, ត្រីខ ២យួរ, តែ ២កញ្ចប់, ស្ករស ៤កញ្ចប់ , ទឹកដោះគោ ១០កំប៉ុង, ប្រេងឆា ២ដប, ប៊ីចេង ២កញ្ចប់, អំបិលអ៊ីយ៉ូត ២កញ្ចប់, សាប៊ូ ១កញ្ចប់, បច្ច័យកសាង ៥០០,០០០រៀល និងបច្ច័យប្រគេនព្រះសង្ឃក្នុងមួយអង្គៗ បច្ច័យ ១០០,០០០រៀល តាជី យាយជី គណកម្មការវត្ត និងពុទ្ធបរិស័ទចំណុះជើងវត្តទទួលបាន៖ ក្រណាត់សរ ១ដុំ, ក្រម៉ា ១ និងថវិកា ៣០.០០០រៀលផងដែរ ៕
