រដ្ឋបាលខេត្តតាកែវ ប្រារព្ធពិធី រុក្ខទិវា ៩កក្ដដា នៅសហគមន៍ព្រៃឈើត្រពាំងធំខាងត្បូង ឃុំត្រពាំងធំខាងត្បូង ស្រុកត្រាំកក់

ភ្នំពេញ៖ ឯកឧត្តម យស ណាស៊ី ប្រធានក្រុមប្រឹក្សាខេត្តតាកែវ និងឯកឧត្តម អ៊ូច ភា អភិបាល នៃគណៈអភិបាលខេត្តតាកែវ នាព្រឹកថ្ងៃសុក្រ ទី២៨ ខែកក្ដដា ឆ្នាំ២០២៣ បានអញ្ជើញចូលរួមអបអរសាទរទិវា រុក្ខទិវា ៩កក្ដដា ដែលបានរៀបចំធ្វើឡើងនៅសហគមន៍ព្រៃឈើត្រពាំងធំខាងត្បូង ឃុំត្រពាំងធំខាងត្បូង ស្រុកត្រាំកក់ ខេត្តតាកែវ។

ពិធីនេះក៏មានការអញ្ជើញចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រី អភិបាលរងខេត្ត លោក លោកស្រី ប្រធានមន្ទីរអង្គភាពជុំវិញខេត្ត ឯកឧត្តម អ៊ាក ផល្លា ប្រធានសាលាដំបូងខេត្ត លោក ស៊ឹម ជុំសុខហេង ព្រះរាជអាជ្ញារង លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងខេត្ត អភិបាលក្រុងស្រុក និងបងប្អូនប្រជាពលរដ្ឋ សិស្សានុសិស្ស ប្រមាណជិត ២០០នាក់។

បើតាម លោក ស៊ឹម ឡាបុ័ង នាយខណ្ឌរដ្ឋបាលព្រៃឈើតាកែវ បានឲ្យដឹងថា ឆ្នាំ២០២៣នេះ ខណ្ឌរដ្ឋបាលព្រៃឈើ បានរៀបចំកូនឈើ ប្រភេទ ក្រញូង បេង ធ្នង់ សុក្រម និងឈើទាល ចំនួន ៤,៣៣៧ដើម សម្រាប់ដាំនៅលើផ្ទៃដីទំហំ ២៦,០២០ហិកតា នៅក្នុងសហគមន៍ព្រៃឈើត្រពាំងធំខាងត្បូងនេះ ដើម្បីបង្គើនគម្របបៃតងឡើងវិញ និងធ្វើឱ្យប្រសើរឡើង នូវសោភ័ណ្ឌភាព ទេសភាពធម្មជាតិ បរិស្ថាន និងជួយអោយបរិកាស ក្នុងការកាត់បន្ថយកំដៅភពផែនដី និងការប្រែប្រួលអាកាសធាតុ ពិសេសធ្វើឱ្យសហគមន៍ព្រៃឈើនេះ មានព្រៃឈើឡើងវិញ ៕