ឯកឧត្តម អ៊ូច ភា ជួបសំណេះសំណាលជាមួយពលរដ្ឋ និងបើកយុទ្ធនាការចាក់វ៉ាក់សាំង ការពារជំងឺ អុតក្ដាម ជំងឺសារទឹក និងជំងឺដុំពក លើ សត្វគោ ក្របី នៅទូទាំងខេត្តតាកែវ

ភ្នំពេញ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ នាព្រឹកថ្ងៃទី៣១ ខែកក្ដដា ឆ្នាំ២០២៣ បានអញ្ជើញជួបសំណេះសំណាលជាមួយបងប្អូនប្រជាពលរដ្ឋ និងបើកយុទ្ធនាការចាក់វ៉ាក់សាំង ការពារ ជំងឺអុតក្ដាម ជំងឺសារទឹក និងជំងឺដុំពក លើសត្វគោ ក្របី នៅតាមបណ្ដាភូមិ ឃុំ សង្កាត់ និង ក្រុង ស្រុក នៅទូទាំងខេត្តតាកែវ ដែលបានរៀបចំធ្វើឡើងដោយ ការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខា ប្រមាញ់ និងនេសាទខេត្តតាកែវ។

ពិធីនេះក៏មានការអញ្ជើញចូលរួមដោយ លោក ញ៉ឹប ស្រ៊ន ប្រធានមន្ទីរកសិកម្ម រុក្ខា ប្រមាញ់ និងនេសាទខេត្ត លោក កង អាណាន់ អភិបាលក្រុង លោក ថៃ លី ប្រធានការិយាល័យផលិតកម្ម និងបសុព្យាបាលខេត្ត មន្រ្តីជំនាញ លោកគ្រូ អ្នកគ្រូ និងសិស្សានុសិស្ស មកពីវិទ្យាស្ថានពហុកបច្ចេកទេសភូមិភាគតេជោសែនតាកែវផងដែរ។

នេះបើយោងតាមការបញ្ជាក់ពី លោក ថៃ លី ប្រធានការិយាល័យផលិតកម្ម និងបសុព្យបាល បានឱ្យដឹងថា ការចុះចាក់វ៉ាក់សាំងជំងឺសារទឹក ជំងឺអុតក្ដាម និងជំងឺដុំពក ដល់គោ ក្របី របស់បងប្អូនប្រជាពលរដ្ឋ មន្រ្តីបសុពេទ្យខេត្ត បានចុះចាក់វ៉ាក់សាំងបានជំងឺដុំពក សរុបចំនួន ៩៥៦២ក្បាល ជំងឺអុតក្ដាម សរុបចំនួន សត្វគោ ១៣១០១ក្បាល សត្វក្របី ៧១ក្បាល និងជំងឺសារទឹក សត្វគោ បានចំនួន ៤៧៩២ក្បាល និងសត្វក្របី ចំនួន ៥១៥ក្បាល។

លោក ថែ លី បានបន្ថែមថា កន្លងមកមន្រ្តីការិយាល័យបសុព្យាបាលខេត្ត បានចុះបាញ់ថ្នាំសំលាប់មេរោគការពារជំងឺផ្សេងៗ លើសត្វចិញ្ជឹមរបស់បងប្អូនប្រជាពលរដ្ឋ នៅតាមផ្ទះ និងនៅតាមកសិដ្ឋានមួយចំនួននៅទូទាំងខេត្តផងដែរ ៕