ទីណាមានទុក្ខ ទីនោះមានកាកបាទក្រហមកម្ពុជា! ប្រជាពលរដ្ឋរងគ្រោះដោយសារខ្យល់កន្ត្រាក់ ៧គ្រួសារ ទទួលបានអំណោយមនុស្សធម៌ ពីសាខាកាកបាទក្រហមកម្ពុជា ខេត្តព្រះសីហនុ

ព្រះសីហនុ៖ នៅរសៀលថ្ងៃចន្ទ ទី៣១ ខែកក្កដា ឆ្នាំ២០២៣ ឯកឧត្តម គួច ចំរើន ប្រធានគណ:កម្មាធិការសាខា ចាត់ឨ្យលោកជំទាវ ប្រាក់ ច័ន្ទសុខា ហេរញ្ញិកគណៈកម្មាធិការសាខា លោក គាំ សុខុម នាយកសាខា លោក អុី ធារិន ប្រធានគណៈកម្មាធិការអនុសាខាស្រុកព្រៃនប់ មន្ត្រីសាខា អនុសាខា និងអ្នកស្ម័គ្រចិត្ត បាននាំយកអំណោយមនុស្សធម៌ចែកជូនដល់ប្រជាពលរដ្ឋរងគ្រោះចំនួន ៧គ្រួសារ ដោយសារខ្យល់កន្ត្រាក់ ក្នុងនោះមាន ផ្ទះចំនួន ១ខ្នងដួលរលំរាបដល់ដី ៣ខ្នងផ្ទះទៀតរបើកដំបូលស្ទើទាំងស្រុង និង៣ខ្នងផ្ទះទៀតទទួលរងការប៉ះពាលតិចតួច ស្ថិតនៅក្នុង ឃុំអូជ្រៅ ស្រុកព្រៃនប់ ខេត្តព្រះសីហនុ។

ក្នុងឱកាសនោះដែរលោកជំទាវ ប្រាក់ ច័ន្ទសុខា បានពាំនាំនូវប្រសាសន៍ផ្ដាំផ្ញើសួរសុខទុក្ខនិងក្ដីនឹករលឹក អាណិតអាសូរក្រៃលែងពីសំណាក់ ឯកឧត្តម គួច ចំរើន ប្រធានគណៈកម្មាធិការសាខា ជាពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្ដាំផ្ញើសាកសួរសុខទុក្ខជូនដល់បងប្អូនប្រជាពលរដ្ឋរងគ្រោះដោយក្តីនឹករលឹក និងតែងតែគិតគូរជានិច្ចអំពីសុខទុក្ខរបស់ប្រជាពលរដ្ឋទាំងអស់ ដោយមិនប្រកាន់ពូជសាសន៍ សាសនា ឬនិន្នាការនយោបាយអ្វីឡើយ ។

ជាមួយគ្នានេះ លោក នាយកសាខាបានធ្វើការផ្សព្វផ្សាយដល់ប្រជាពលរដ្ឋទាំងរងគ្រោះ ទាំងប្រជាពលរដ្ឋមិនរងគ្រោះ សូមបង្កើននូវការប្រុងប្រយ័ត្ន អំពីជំងឺគ្រុនឈាម គ្រុនចាញ់ និងជំងឺគ្រុនឈិក ព្រោះខែនេះជារដូវស្សាហ៍ សូមបងប្អូនមើលនៅជុំវិញផ្ទះ ចូលរួមកំចាត់ដង្កូវទឹកមូសខ្លា និងធានាថា មិនមានដង្កូវទឹក នៅក្នុងបរិវេណផ្ទះរបស់បងប្អូន តាមរយៈការកម្ទេចចោល និងលុបបំបាត់ចោល នូវរាល់វត្ថុដក់ទឹក ដែលមិនប្រើប្រាស់ ដូចជា សំបកកង់ឡាន កង់ម៉ូតូ សំបកកំប៉ុង ធុង ក្រឡ ពាង អាង ដែលមិនប្រើប្រាស់ សំបកដូង និងវត្ថុអាចដក់ទឹកដទៃទៀត ដែលនៅជុំវិញបរិវេនផ្ទះរបស់លោកអ្នក ត្រូវលាងសម្អាតសម្ភារៈ ឬវត្ថុប្រើប្រាស់ផ្សេងៗអោយបានស្អាត និងជាចុងក្រោយនេះ សូមប្អូនទាំងអស់កុំភ្លេច ៣ការពារ និង ៣ កុំ ដើម្បីចូលរួមទប់ស្កាត់ និងការពារការរីករាលដាលនៃជំងឺកូវីដ១៩ ទាំងអស់គ្នា ហើយសូមចូលរួមនាំគ្នាទៅចាក់វ៉ាក់សាំងដូសជំរុញអោយបានគ្រប់ៗគ្នា។

អំណោយចែកជូនប្រជាពលរដ្ឋចំនួន ១គ្រួសារដួលរលំផ្ទះ ទទួលបាន៖អង្គរ ២៥គីឡូក្រាម មី១កេស ទឹកត្រី១យួរ ត្រីខ១០កំប៉ុង កន្ទេល១ ទឹកសុទ្ធ ១កេស តង់១ ឃីតមួយកញ្ចប់ (មុង១ ភួយ១ សារុង១ ក្រម៉ា១) និងថវិកាចំនួន ១លានរៀល។

អណោយចែកជូនដល់ប្រជាពលរដ្ឋចំនួន ៣គ្រួសាររបើកដំបូលស្ទើរទាំងស្រុង ទទួលបាន៖ អង្ករ ២៥គីឡូក្រាម មី១កេស ទឹកត្រី១យួរ ត្រីខ១០កំប៉ុង ទឹកសុទ្ធ ១កេស តង់១ ឃីតមួយកញ្ចប់(មុង១ ភួយ១ សារុង១ ក្រម៉ា១) និងថវិកាចំនួន ២០មុឺនរៀល ចែកណែកក្នុងនោះមានគ្រួសារមួយទទួលរងការប៉ះពាល់របើកទាំងដំបូលនិងជញ្ជាំងទទួលបានថវិការចំនួន ៣០មុឺនរៀល ។

អំណោយចែកជូនប្រជាពលរដ្ឋចំនួន ៣គ្រួសារទទួលរងការប៉ះពាលតិចតួច ទទួលបាន៖អង្គរ ២៥គីឡូក្រាម មី១កេស ទឹកត្រី១យួរ ត្រីខ១០កំប៉ុង កន្ទេល១ ទឹកសុទ្ធ ១កេស ឃីតមួយកញ្ចប់ (មុង១ ភួយ១ សារុង១ ក្រម៉ា១) និងថវិកាចំនួន ១០មុឺនរៀល ។

លោក អ៉ី ធារិន អភិបាលស្រុកព្រៃនប់ បានឲ្យដឹងថា កាលពីវេលាម៉ោងប្រមាណ២រំលងអធ្រាត្រ ថ្ងៃទី៣១ ខែកក្កដា ឆ្នាំ២០២៣ មានភ្លៀងលាយឡំជាមួយនឹងខ្យល់កន្ត្រាក់ បានរបើកដំបូលផ្ទះប្រជាពលរដ្ឋ នៅឃុំអូរជ្រៅ ចំនួន៥ខ្នងផ្ទះ ខូចខាតដំបូលផ្ទះទាំងស្រុង១ខ្នង ដើមឈើបាក់សង្កត់ផ្ទះទាំងស្រុង២ខ្នង ក្នុងនោះផ្ទះបានសង្កត់លេីរថយន្ត ២គ្រឿង និងម៉ូតូ១គ្រឿង និងសម្ភារមួយចំនួនទៀត តែមិនបណ្តាយប៉ះពាល់អាយុជីវិត ឬរបួសនោះទេ។

ចំពោះមុខលោកអភិបាលស្រុក រួមជាមួយនឹងកម្លាំងគណៈបញ្ជាការឯកភាពអាជ្ញាធរមូលដ្ឋាន ចុះជួយសម្រួលដោះស្រាយប្រជាពលរដ្ឋ ដែលពួកគាត់បានជួបនូវគ្រោះធម្មជាតិ បណ្ដាលឲ្យខូចខាតផ្ទះសម្បែង និងទ្រព្យសម្បត្តិមួយចំនួន៕