ឧត្តមសេនីយ៍ទោ ខូវ លី ដឹកនាំកិច្ចប្រជុំបូកសរុបសភាពការណ៍ និងលទ្ធផលនៃកិច្ចប្រតិបត្តិការ ប្រចាំខែកក្កដា លើកទិសដៅបន្ត និងផ្សព្វផ្សាយផែនការចាំបាច់មួយចំនួន
ភ្នំពេញ៖ លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង នាព្រឹកថ្ងៃអង្គារ ១៥កើត ខែទុតិយាសាឍ ឆ្នាំថោះបញ្ចស័ក ព.ស.២៥៦៧ ត្រូវនឹងថ្ងៃទី០១ ខែសីហា ឆ្នាំ២០២៣ បានអញ្ជើញដឹកនាំកិច្ចប្រជុំ បូកសរុបសភាពការណ៍ និងលទ្ធផលនៃកិច្ចប្រតិបត្តិការ ប្រចាំខែកក្កដា លើកទិសដៅខែសីហា ឆ្នាំ២០២៣ និងផ្សព្វផ្សាយផែនការចាំបាច់មួយចំនួន។ ដោយមានការចូលរួមពី លោក លោកស្រី ឧត្តមសេនីយ៍ លោកវរសេនីយ៍ ស្នងការរង លោកនាយការិយាល័យ អង្គភាព លោកអធិការនគរបាលក្រុង ស្រុក និងលោកនាយប៉ុស្តិ៍នគរបាលរដ្ឋបាលទាំង៧១ប៉ុស្តិ៍ ផងដែរ។
ជាកិច្ចចាប់ផ្តើម លោកឧត្តមសេនីយ៍ទោ ស្នងការ ថ្លែងការកោតសរសើរអំពីស្នាដៃរបស់កងកម្លាំងដែលចូលរួមយ៉ាងសកម្ម ធានាការពារបានល្អ សន្តិសុខ សណ្តាប់ធ្នាប់សាធារណៈ និងសុខសុវត្ថិភាពសង្គម ក្នុងព្រឹត្តិការណ៍សំខាន់ៗនាពេលកន្លងមក និងទប់ស្កាត់បង្ក្រាបបទល្មើសគ្រប់ប្រភេទជាបន្តបន្ទាប់ ដែលធ្វើអោយបទល្មើសមានការថយចុះ និងថ្លែងអំណរគុណដល់កងកម្លាំងនគរបាលទូទាំងខេត្ត ដែលចូលរួមបំពេញភារកិច្ច ប្រកបដោយការយកចិត្តទុកដាក់និងមានការទំនួលខុសត្រូវខ្ពស់ ជាពិសេសក្នុងព្រឹត្តិការណ៍បោះឆ្នោតជ្រើសតាំង តំណាងរាស្ត្រនីតិកាលទី៧ ឆ្នាំ២០២៣នេះ ប្រព្រឹត្តទៅដោយមានភាពរលូន ក្នុងបរិយាកាសល្អប្រសើរបំផុត។
ជាកិច្ចបន្ត ការអាននូវរបាយការណ៍ លទ្ធផលនៃកិច្ចប្រតិបត្តិការប្រចាំខែកក្កដា និងលើកទិសដៅខែសីហា ឆ្នាំ២០២៣ របស់លោកឧត្តមសេនីយ៍ត្រី អៀរ ប៊ុនធឿន ស្នងការរងទទួលផែនការងារសេនាធិការបានបញ្ចប់ ហើយមតិចូលរួមរបស់ លោកស្នងការរង លោកប្រធានការិយាល័យ លោកអធិការ លោកនាយប៉ុស្តិ៍រួចមក លោកឧត្តមសេនីយ៍ទោ ស្នងការ មានប្រសាសន៍បូកសរុប និងវាយតម្លៃលទ្ធផលការងាររយៈពេលកន្លងមក។
ចំពោះកិច្ចការមួយចំនួនដែលបំពេញហើយ តែមិនទាន់បានល្អ និងមិនទាន់ពេលវេលា លោកក៏បានផ្ដល់អនុសាសន៍កែតម្រូវ ចែករំលែកបទពិសោធន៍ ដើម្បីស្ថាបនាផងដែរ ៕
