ឯកឧត្តម អ៊ូច ភា អនុញ្ញាតឲ្យប្រធានសភាពាណិជ្ជកម្មខេត្តតាកែវ ចូលជួបសម្ដែងការគួរសម និងពិភាក្សាការងារ

ភ្នំពេញ៖ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ នៅថ្ងៃអង្គារ ទី០១ ខែសីហា ឆ្នាំ២០២៣ បានអនុញ្ញាតឲ្យលោក ជីប ភក្ដីភាព ប្រធានសភាពាណិជ្ជកម្មខេត្តតាកែវ ដឹកនាំគណៈប្រតិភូ ចូលជួបសម្ដែងការគួរសម និងពិភាក្សាការងារ ដែលបានរៀបចំឡើងនៅសាលប្រជុំសាលាខេត្ត។

មានប្រសាសន៍នាឱកាសនោះដែរ ឯកឧត្តម អ៊ូច ភា អភិបាលខេត្ត បានថ្លែងថា ការងារដែលសភាពាណិជ្ជកម្ម ចាំបាច់ត្រូវធ្វើ គឺការគៀងគររកអ្នកវិនិយោគិនទាំងក្នុង និងក្រៅប្រទេស មកបណ្តាក់ទុករកស៊ីនៅក្នុងខេត្តរបស់ខ្លួន ដោយធ្វើយ៉ាងណា ត្រូវមានវិធីសាស្រ្តក្នុងការអូសទាញ ក្រុមអ្នកវិនិយោគឲ្យបាន តាមដែលអាចធ្វើទៅបាន ព្រោះតួនាទីសភាពាណិជ្ជកម្មនេះសំខាន់ខ្លាំងណាស់ អាចនិយាយបានថា សម្របសម្រួលការប្រកបអាជីវកម្មក្នុងខេត្ត និងទាក់ទាញអ្នកវិនិយោគក្នុងស្រុក និងនៅក្រៅប្រទេស មកវិនិយោគនៅក្នុងខេត្ត ដើម្បីបង្កើតការងារឲ្យបានច្រើនជូនប្រជាពលរដ្ឋបានធ្វើមានចំណូលសម្រាប់ទ្រទ្រង់ជីវភាព និងជួយកាត់បន្ថយការចំណាកស្រុករបស់ប្រជាពលរដ្ឋផងដែរ។

ឯកឧត្តម អ៊ូច ភា បានបន្ថែមទៀតថា សភាពាណិជ្ជកម្ម គឺជាស្ថាប័នតំណាងវិស័យឯកជនក្នុងខេត្ត សម្រាប់ជួយដំណោះរការអាជីវកម្មនៅក្នុងខេត្ត និងជួយទាក់ទាញ ការវិនិយោគ ដើម្បីអភិវឌ្ឍន៍សេដ្ឋកិច្ចខេត្ត ឲ្យមានការរីកចម្រើន ស្របតាមគោលនយោបាយរបស់រាជរដ្ឋាភិបាលកម្ពុជា ដើម្បីបង្កើតការងារលើកកម្ពស់ សហគ្រាសធុនតូច និងមធ្យម សហគ្រិនភាព ពង្រឹងភាពប្រកួតប្រជែងក្បាលម៉ាស៊ីន និងជំរុញ សេដ្ឋកិច្ច ក្នុងខេត្តឲ្យមានដំណើរការបានឆាប់រហ័សបន្ថែមទៀត ៕