ចិនជឿថា រដ្ឋាភិបាលថ្មីដឹកនាំដោយបណ្ឌិត ហ៊ុន ម៉ាណែត នឹងសម្រេចបានសមិទ្ធផលជាច្រើន ក្នុងការកសាង និងអភិវឌ្ឍជាតិ
ភ្នំពេញ៖ ឯកឧត្ដម វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា បានលើកឡើងថា ចិនជឿជាក់ថា រាជរដ្ឋាភិបាលថ្មី ក្រោមការដឹកនាំរបស់ លោកបណ្ឌិត ហ៊ុន ម៉ាណែត កម្ពុជានឹងសម្រេចបានសមិទ្ធផលជាច្រើន ក្នុងការកសាង និងអភិវឌ្ឍប្រទេសជាតិ នាថ្ងៃអនាគត។
ក្នុងឱកាសចូលរួមសម្ពោធដាក់ឱ្យ ប្រើប្រាស់ផ្លូវក្រវាត់ក្រុងទី៣ នៅខេត្តកណ្តាល នាថ្ងៃទី៣ ខែសីហា ឆ្នាំ២០២៣នេះ ក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ឯកឧត្ដមទូតចិនបញ្ជាក់ថា «ការបោះឆ្នោតជាសកលលើកនេះ មានភាពយុត្តិធម៌ និងមិនលំអៀង ហើយប្រជាជនកម្ពុជាបានប្រើប្រាស់សិទ្ធិបោះឆ្នោតដោយសេរី ក្នុងនាមជាមិត្តដែកថែបរបស់កម្ពុជា ប្រទេសចិនសូមចូលរួមអបអរសាទរយ៉ាងកក់ក្តៅចំពោះកម្ពុជា ដែលបានរៀបចំការបោះឆ្នោតជាតិជ្រើសតាំងតំណាងរាស្ត្រ នីតិកាលទី៧ ប្រកបដោយជោគជ័យ និងអបអរសាទរជូន គណបក្សប្រជាជនកម្ពុជា ដែលទទួលបានជ័យជំនះយ៉ាងលើសលុប»។
ឯកឧត្ដមជឿជាក់ថា ក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាស្នូល និងឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីថ្មី កម្ពុជានឹងសម្រេចបានសមិទ្ធផលជាច្រើន ក្នុងការកសាង និងអភិវឌ្ឍប្រទេសជាតិ នាថ្ងៃអនាគត ជីវភាពរស់នៅរបស់ប្រជាជនកម្ពុជា នឹងឆ្ពោះទៅរកសេចក្តីសុខ សេចក្តីចម្រើន និងកាន់តែមានភាពជឿជាក់ ៕
