សាខាកាកបាទក្រហមកម្ពុជាខេត្តបាត់ដំបង ទទួលអំណោយមនុស្សធម៌ ពីមន្រ្តីសង្ឃសាលាអនុគណក្រុងបាត់ដំបង
ភ្នំពេញ៖ កាលពីរសៀល ថ្ងៃទី៣ខែសីហា ឆ្នាំ២០២៣ ឯកឧត្ដម សុខ លូ ប្រធានគណ:កម្មាធិការសាខាកាកបាទក្រហមកម្ពុជាខេត្តបាត់ដំបង បានចាត់តំណាង លោក ផេង សិទ្ធី សមាជិកគណៈកម្មាធិការសាខាអញ្ជើញ ទទួលអំណោយមនុស្សធម៌ ពីមន្រ្តីសង្ឃសាលាអនុគណក្រុងបាត់ដំបង ដឹកនាំដោយ ព្រះគ្រូពុទ្ធរស្មី យឿម រដ្ឋសភា ព្រះអនុគណក្រុងបាត់ដំបង និងសហការី ដោយមានការនិមន្ត និងអញ្ជើញចូលរួមពីព្រះគ្រូចៅអធិការ តាមបណ្តាវត្តក្នុងក្រុងបាត់ដំបង ឯកឧត្តម លោកជំទាវ លោក លោកស្រី អនុប្រធាន សមាជិក សមាជិកា គណ:កម្មាធិការសាខានិងក្រុមប្រតិបត្តិសាខា សរុបប្រមាណ ៣០អង្គ/នាក់។
មានប្រសាសន៍ក្នុងឱកាសនោះផងដែរ ក្នុងនាម ឯកឧត្ដម សុខ លូ ប្រធានគណៈកម្មាធិការសាខាលោក ផេង សិទ្ធី បានថ្លែងអំណរព្រះគុណដ៏ថ្លៃថ្លា ចំពោះទឹកព្រះទ័យយកចិត្តទុកដាក់ខ្ពស់របស់ ព្រះមន្ត្រីសង្ឃព្រះគ្រូចៅអធិការវត្តក្នុងក្រុងបាត់ដំបង ដែលបានឧបត្ថម្ភអំណោយជាសម្ភារៈ និងថវិកា ដល់សាខាកាកបាទក្រហមកម្ពុជាខេត្ត ក្នុងឱកាសខួបទី១៦០ ទិវាពិភពលោកកាកបាទក្រហម និង អឌ្ឍចន្ទក្រហម ៨ ឧសភា ឆ្នាំ២០២៣ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីបរិយាបន្នសង្គម>>ដើម្បីឱ្យសាខា អាចចុះបំពេញប្រតិបត្តិការងារមនុស្សធម៌បានជាបន្តបន្ទាប់ទៀត ។
លោក បានបញ្ជាក់ផងដែរថា សកម្មភាពដ៏ថ្លៃថ្លានេះ បង្ហាញឲ្យឃើញនូវវប្បធម៌នៃការចែករំលែក និងចូលរួមចំណែកក្នុងវិស័យមនុស្សធម៌យ៉ាងល្អប្រសើរ រវាងពុទ្ធចក្រ និងអាណាចក្រ ក្នុងការជួយដល់ប្រជាពលរដ្ឋរងគ្រោះ និងងាយរងគ្រោះបានទាន់ពេលវេលា ។
លោកបានបញ្ជាក់បន្ថែមថា រយៈពេល៧ខែដើមឆ្នាំ២០២៣ នេះសាខាខេត្តបាត់ដំបង បានផ្តល់អំណោយមនុស្សធម៌ជូនដល់ ជនរងគ្រោះ និងជនងាយរងគ្រោះផ្សេងៗ បានចំនួន៩៣លើកស្មើនឹង ២,៣៩៣គ្រួសារ ក្នុងក្រុង ស្រុកទាំង១៤នៃខេត្តបាត់ដំបង ។
អំណោយដែលសាខាទទួលបាននាពេលនេះរួមមាន៖ បច្ច័យចំនួន ១,៥០០.០០០រៀល អង្ករចំនួន ១៧០០គីឡូក្រាម ,មី ៤៥កេស ទឹកត្រី ៣៩កេស ទឹកស៊ីអុីវ ៣៧យួរ ត្រីខ ២៣យួរ ,ទឹកក្រូច ២០កេស និងគ្រឿងឧបភោគ បរិភោគព្រមទាំងសម្ភារៈប្រើប្រាស់សរុប១៦ផ្សេងទៀតផងដែរ៕
