ឧត្តមសេនីយ៍ឯក ម៉ៅ សុផាន់ អបអរសាទរចំពោះសិក្ខាកាមទាំងអស់ ដែលតស៊ូព្យាយាមហ្វឹកហ្វឺនរៀនសូត្រ និងអត់ធន់ជម្នះការលំបាក រហូតបានបញ្ចប់វគ្គដោយជោគជ័យ

ភ្នំពេញ៖ នៅថ្ងៃទី៤ ខែសីហា ឆ្នាំ២០២៣ នៅបញ្ជាការដ្ឋានកាំភ្លើងធំ កងទ័ពជើងគោគ ខេត្តកំពង់ឆ្នាំង ឧត្តមសេនីយ៍ឯក ម៉ៅ សុផាន់ មេបញ្ជាការស្តីទី កងទ័ពជើងគោក នៃកងយោធពលខេមរភូមិន្ទ និង លោកជំទាវ H.E Mrs(Dr) Deyani Uttam Khobragade អគ្គរដ្ឋទូតនៃសាធារណរដ្ឋឥណ្ឌាប្រចាំនៅព្រះរាជាណា បានអញ្ជើញជាអធិបតី ក្នុងពិធីបិទវគ្គហ្វឹកហ្វឺនពិសេសបំប៉នជំនាញកាំភ្លើងធំ ឆ្នាំ២០២៣ ដែលវគ្គហ្វឹកហ្វឺននេះ បានជួយឧបត្ថម្ភ ដោយយោធាចារ្យឥណ្ឌា ដែលប្រារព្ធធ្វើឡើង ។

ថ្លែងក្នុងពិធីបិទវគ្គនាឱកាសនោះ ឧត្តមសេនីយ៍ឯក ម៉ៅ សុផាន់ បានសម្តែងការអបអរសាទរ និងវាយតម្លៃខ្ពស់ចំពោះ លទ្ធផល ដែលកម្មសិក្សាការី ក្នុងវគ្គបំប៉នជំនាញកាំភ្លើងធំសំរេចបាន ដែលក្នុងរយៈពេល ៣ ខែកន្លងមក បានខិតខំសិក្សារៀនសូត្រ ហាត់ពត់លត់ដំ តស៊ូជម្នះរាល់ការលំបាក និងទទួលបានជោគជ័យគួរជាទីមោទនៈ។

ឯកឧត្តម ម៉ៅ សុផាន់ បានថ្លែងអំណរគុណដល់ប្រទេសឥណ្ឌា ដែលបានជួយកម្ពុជាចាប់តាំងពីក្រោយថ្ងៃរំដោះ ៧ មករាឆ្នាំ ១៩៧៩ ក្នុងនោះឥណ្ឌាក៏បានបញ្ជូនកងទ័ពជាច្រើននាក់ មកចូលរួមក្នុងថែរក្សាសន្តិភាពនៅក្នុងប្រទេសកម្ពុជាក្នុង ឆ្នាំ ១៩៩៣ ។
ឯកឧត្តម បានកោតសរសើរ និងវាយតម្លៃខ្ពស់ចំពោះយោធាចារ្យ កម្មសិក្សាការីទាំងអស់ ដែលបានខិតខំហ្វឹកហ្វឺនរៀនសូត្រ ពង្រីកបាននូវសមត្ថភាព បច្ចេកទេស ដើម្បីចូលរួមចំណែកក្នុងការកសាងធនធានមនុស្ស កងទ័ពជើងគោក ឲ្យកាន់តែមានការរីក ចម្រើន ក្នុងបុព្វហេតុការពារអធិបតេយ្យ បូរណភាពទឹកដីកម្ពុជាអោយបានគង់វង្ស ។

ឯកឧត្តម ម៉ៅ សុផាន់ បានចាត់ទុក លទ្ធផលដែលវគ្គហ្វឹកហ្វឺនទទួលបាននាពេលនេះគឺជាលទ្ធផលផ្លែផ្កា នៃកិច្ច សហប្រតិបត្តិការ ដែលបានចុះហត្ថលេខា ដោយកងទ័ពជើងគោក ប្រទេសទាំងពីរ កាលពីខែកុម្ភៈឆ្នាំ ២០២៣ កន្លងទៅ ។

ជាចុងក្រោយ ឯកឧត្តម ម៉ៅ សុផាន់ បានផ្តាំផ្ញើដល់យោធាចារ្យ និង កម្មសិក្សាការីទាំងអស់ត្រូវស្មោះត្រង់ និង ការពារអោយបានដាច់ខាតនូវរាជរដ្ឋាភិបាលស្របច្បាប់ ដែលមានសម្តេចតេជោ ហ៊ុន សែន ជាប្រមុខដឹកនាំ និងរាជរដ្ឋាភិបាល អណត្តិទី ៧ នៃរដ្ឋសភា ដឹកនាំដោយ ឯកឧត្តម បណ្ឌិត ហ៊ុន ម៉ាណែត ដែលបានកើតចេញពីការបោះឆ្នោតដោយត្រឹមត្រូវ សេរី និង យុត្តិធម៌ ស្របតាមលទ្ធិប្រជាធិបតេយ្យ ។ ត្រូវយកចិត្តទុកដាក់ ត្រៀមកម្លាំង មធ្យោបាយ សំភារៈដើម្បីជួយសង្រ្គោះប្រជាពលរដ្ឋចេញពីគ្រោះមហន្តរាយផ្សេងៗ និង បង្កបង្កើនផលដល់ប្រជាពលរដ្ឋ ដែលស្ថិតនៅជិតទៅតាំងរបស់ខ្លួន ។

ក្នុងមតិស្វាគមន៍ និងរបាយការណ៍ ហ្វឹកហ្វឺន របស់ ឧត្តមសេនីយ៏ឯក ពៅ សុខា មេបញ្ជាការរងកងទ័ពជើងគោក និងជាមេបញ្ជាការ បញ្ជាការដ្ឋានកាំភ្លើងធំ បានបញ្ជាក់ថា៖ ដោយមានកិច្ចសហប្រត្តិបត្តិការជាមិត្តភាព រវាងកម្ពុជា និងកងទ័ពឥណ្ឌាបញ្ជាការដ្ឋានកាំភ្លើងធំ កងទ័ពជើងគោក បានបើកហ្វឹកហ្វឺនពិសេសបំប៉នជំនាញថ្នាក់កងអនុសេនាធំកាំភ្លើងធំ ឆ្នាំ២០២៣ថ្នាក់កាំភ្លើធំ 122mm-D30 និង ថ្នាក់កាំភ្លើងធំ 130mm-M46 ដែលវគ្គហ្វឹកហ្វឺននេះ បានប្រព្រឹត្តទៅ បានដោយជោគជ័យ ដោយបានការយកចិត្តទុកដាក់ពីសំណាក់ នាយឧត្តមសេនីយ៍ បណ្ឌិត ហ៊ុន ម៉ាណែត ទាំងស្មារតី ថវិកា ប្រេងឥន្ទនះ តាមរយៈ ឧត្តមសេនីយ៏ឯក ម៉ៅ សុផាន់ មេបញ្ជាការស្តីទី កងទ័ពជើងគោក។

ឯកឧត្តម ពៅ សុខា បានបញ្ជាក់ទៀតថា៖ វគ្គហ្វឹកហ្វឺនបំប៉នជំនាញកាំភ្លើងធំធុន ១២២ មីលីម៉ែត្រ ចែកចេញជាពីរថ្នាក់ គឺកាំភ្លើងធំ 122mm-D30 និងកាំភ្លើងធំ 130mm-M46 ។ ថ្នាក់កាំភ្លើងធំ 122mm-D30 មានកម្មសិក្សាការី និងយោធាចារ្យ ចំនួន ៥៤នាក់ និង ថ្នាក់កាំភ្លើងធំ 130mm-M46 មានកម្មសិក្សាការី និងយោធាចារ្យចំនួន ៥៤នាក់ ។ ការងារហ្វឹកហ្វឺនពេលវេលារយៈពេលរួម ៣ ខែ ចាប់ពីថ្ងៃទី០៦ ខែឧសភា ឆ្នាំ២០២៣ ដល់ ថ្ងៃទី០៤ ខែសីហា ឆ្នាំ២០២៣ ។

ឯកឧត្តម ពៅ សុខា បានបញ្ជាក់ទៀតថា៖ ការងារហ្វឹកហ្វឺនធានាបានល្អទាំងការរៀនសូត្រក្នុងថ្នាក់ និងហ្វឹកហាត់លើទីលានបានតាមពេល វេលាកំណត់ ។ កម្មសិក្សាការីទាំងអស់មានស្មារតីយកចិត្តទុកដាក់កម្រិតខ្ពស់ គោរពពេលវេលាសិក្សា ស្វែងយល់ មេរៀន និងស្វ័យសិក្សាបានល្អក្នុងវគ្គ សកម្មចូលរួមហ្វឹកហាត់មិនថាពេលព្រឹក ល្ងាច ឬយប់។ ទន្ទឹមនឹងនេះ ក្នុងដំណើរការហ្វឹកហ្វឺនរៀនសូត្រ មានសាមគ្គីគ្នាល្អ រវាងកម្មសិក្សាការី យោធាចារ្យ និងគណកម្មការគ្រប់គ្រងវគ្គ ប្រកបដោយស្មារតីគោរព ស្រលាញ់រាប់អាន មិត្តភាព រក្សាបាននូវសេចក្តីថ្លៃថ្នូរ ។