ក្រសួងសាធារណការ អំពាវនាវដល់អ្នកបើកបរលើផ្លូវល្បឿនលឿន ចូលរួមគោរពច្បាប់ចរាចរណ៍ទាំងអស់គ្នា
ភ្នំពេញ៖ ក្រសួងសាធារណការ និងដឹកជញ្ជូន បានអំពាវនាវដល់អ្នកបើកបរលើផ្លូវល្បឿនលឿន ចូលរួមគោរពច្បាប់ចរាចរណ៍ទាំងអស់គ្នា ដោយបើកបរឱ្យត្រូវទិសដៅចរាចរណ៍។
តាមរយៈបណ្ដាញសង្គមហ្វេសប៊ុក ក្រសួងសាធារណការក៏បានបញ្ជាក់ដែរថា យានយន្តគ្រប់ប្រភេទ មិនអនុញ្ញាតឱ្យបើកបរបញ្រ្ចាសទិស ថយក្រោយ ឬបត់ត្រឡប់ក្រោយ ឬការឈប់ថតរូបនៅតាមដងផ្លូវឡើយ។
ក្រសួងបន្តថា ចំពោះបងប្អូនប្រជាពលរដ្ឋ ដែលមានបំណងផ្តិតយករូបភាព អាចអញ្ជើញចុះថតរូបបាននៅតាមតំបន់សេវាកម្ម (ចំណតឈប់សម្រាក) ទាំង ០៤ទីតាំង របស់ផ្លូវល្បឿនលឿន។
ទន្ទឹមនឹងនេះ ក្រសួងសំណូមពរយ៉ាងទទូច ដល់បងប្អូនប្រជាពលរដ្ឋ សូមចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន និងជៀសវាងការប្រព្រឹត្តល្មើសនានា ដើម្បីសុវត្ថិភាពពេលធ្វើដំណើរ និងរក្សាបានសណ្តាប់ធ្នាប់ក្នុងទីសាធារណៈ៕
