ក្រសួងបរិស្ថាន៖ ការដែលមានតំបន់ការពារធម្មជាតិនៅក្នុងតំបន់ ឬខេត្តរបស់យើងច្រើន គឺបង្ហាញឱ្យឃើញពីសក្តានុពល និងភាពសម្បូរបែបនៃធនធានធម្មជាតិក្នុងតំបន់
ភ្នំពេញ៖ ឯកឧត្តម ស្រ៊ុន ដារិទ្ធិ រដ្ឋលេខាធិការក្រសួងបរិស្ថាន បានលើកឡើងថា ការដែលមានតំបន់ការពារធម្មជាតិនៅក្នុងតំបន់ ឬខេត្តរបស់យើងច្រើន គឺបង្ហាញឱ្យឃើញពីសក្តានុពល និងភាពសម្បូរបែបនៃធនធានធម្មជាតិក្នុងតំបន់។
ក្នុងឱកាសអញ្ជើញជាអធិបតីក្នុងសិក្ខាសាលាផ្សព្វផ្សាយស្តីពីអនុក្រឹត្យលេខ១៤៤ ស្តីពី «ការបង្កើតតំបន់ការពារទេសភាពបាកាន» នៅថ្ងៃទី៤ ខែសីហា ឆ្នាំ២០២៣ នាខេត្តពោធិ៍សាត់ឯកឧត្តម ស្រ៊ុន ដារិទ្ធិ បានថ្លែងអំណរគុណដល់រដ្ឋបាលខេត្តពោធិ៍សាត់ ក៏ដូចជា អង្គការដៃគូ ស្ថាប័នពាក់ព័ន្ធនានា ដែលបានចូលរួមសហការជាមួយក្រសួងបរិស្ថាន បង្កើតបានជាអនុក្រឹត្យលេខ១៤៤ ស្តីពី«ការបង្កើតតំបន់ការពារទេសភាពបានកាន» នេះឡើង។
ឯកឧត្តមរដ្ឋលេខាធិការបានគូសបញ្ជាក់ទៀតថា ការដាក់តំបន់ដីសើមដ៏សំខាន់មួយនេះ ជាតំបន់ការពារទេសភាព ជារឿងសំខាន់មួយ ដើម្បីផលប្រយោជន៍បរិស្ថាន សង្គម វប្បធម៌ និងសេដ្ឋកិច្ច ប៉ុន្តែការការពារតំបន់នេះឱ្យបានគង់វង្ស គឺជារឿងកាន់តែសំខាន់ថែមទៀត ដែលទាមទារឱ្យមានការចូលរួមគាំទ្រយ៉ាងសកម្មពីគ្រប់ភាគី ជាពិសេសអាជ្ញាធរមូលដ្ឋាន និងប្រជាសហគមន៍។
គួរបញ្ជាក់ឱ្យដឹងថា សិក្ខាសាលានេះ ធ្វើឡើងក្នុងគោលបំណងផ្សព្វផ្សាយអនុក្រឹត្យលេខ១៤៤ ស្តីពី «ការបង្កើតតំបន់ការពារទេសភាពបាកាន»មានផ្ទៃដីទំហំ៣៨៤៣០ហិកតា ស្ថិតនៅក្នុងភូមិសាស្ត្រស្រុកបាកាននិងស្រុកកណ្តៀង ខេត្តពោធិ៍សាត់ ដែលរាជរដ្ឋាភិបាលបានចេញនៅថ្ងៃទី៤ ខែកក្កដា ឆ្នាំ២០២៣ ដល់អាជ្ញាធរមូលដ្ឋាន ប្រជាពលរដ្ឋ និងសាធារណៈជន ដើម្បីចូលរួម ធានាការថែរក្សានិងការពារសោភ័ណភាពធម្មជាតិ ប្រព័ន្ធអេកូឡូស៊ី ជីវៈចម្រុះ បរិស្ថាននិងវប្បធម៌៕