ឯកឧត្តម វ៉ា ថន ចុះពិនិត្យទីតាំងទីលានទុកដាក់សំរាមថ្មី ដែលបានសាងសង់រួចរាល់នៃគម្រោងអភិវឌ្ឍន៍ក្រុងរបៀង៤ ស្ថិតនៅភូមិខ្សារ ឃុំដារ ស្រុកចិត្របុរី

ភ្នំពេញ៖ ឯកឧត្តម វ៉ា ថន អភិបាលខេត្តក្រចេះ នាព្រឹកថ្ងៃពុធ ៨រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៩ ខែសីហា ឆ្នាំ២០២៣ បានអញ្ជើញចុះពិនិត្យទីតាំងទីលានទុកដាក់សំរាមថ្មី ដែលបានសាងសង់រួចរាល់នៃគម្រោងអភិវឌ្ឍន៍ក្រុងរបៀង៤ ស្ថិតនៅភូមិខ្សារ ឃុំដារ ស្រុកចិត្របុរី ខេត្តក្រចេះ។

តាមការបញ្ជាក់ពីក្រុមបច្ចេកទេសក្រុមហ៊ុនបានឲ្យដឹងថា ទីតាំងចាក់សំរាមថ្មីនេះចាប់ផ្ដើមសាងសង់ចាប់ពីថ្ងៃទី១ ខែកុម្ភៈ ឆ្នាំ២០២២ គ្រោងនិងបញ្ចប់ការសាងសង់នៅខែសីហា ឆ្នាំ២០២៣នេះ ដែលមានរយៈពេល១៧ខែ។ការសាងសង់នេះ ក្រោមកម្ចីឥណទានធានាគារអភិវឌ្ឍន៍អាសុី ក្នុងគម្រោងអភិវឌ្ឍន៍ក្រុងរបៀងតាមដងទន្លេមេគង្គជំហាន៤ ដែលសាងសង់លើផ្ទៃដីជាង២៦ហិកតា ដែលត្រូវចំណាយថវិកាសាងសងអស់ ៤៩៤,៣៩៤៨.៩១ដុល្លា។

ឯកឧត្តម វ៉ា ថន អភិបាលខេត្ត បញ្ជាក់ទៀតថា ទីលានចាក់សំរាមថ្មី គឺជាគម្រោង អភិវឌ្ឍន៍ទីក្រុងច្រករបៀងតាមដងទន្លេមេគង្គជំហាន៤ ដែលសាងសង់ដោយក្រុមហ៊ុន ខេ ប៊ី អេច ខនស្រ្តាក់សិន ហើយមានអត្ថប្រយោជន៍ធំធេងណាស់សំរាបខេត្តក្រចេះ គឺអាចគ្រប់គ្រងការបំពុលបរិស្ថានបានច្រើន ពីការបំពុលដោយសំរាម តាមទីសារធារណះ សំរាមតាមខ្នងផ្ទះផ្សេងៗហើយទឹកកខ្វក់ហូរចូលក្នុងស្ទឹង ទន្លេ បឹងបួរ យើងអាចគ្រប់គ្រងបាន ដោយយើងមានទីលានទុកដាក់សំរាមត្រឹមត្រូវ ហើយក្នុងនោះក៏មានការកែច្នៃបំលែង។

ក្នុងឱកាសនោះដែរ ឯកឧត្តមអភិបាលខេត្ត បានបញ្ជាក់ថាក្រោយពីស្ដាប់បទបង្ហាញ និងឃើញទិដ្ឋភាពពិតប្រាកដ ឃើញថាទីលានចាក់សំរាមថ្មីនេះ បានសាងសង់រួចរាល់១០០% ដោយនៅសេសសល់តែការបំពាក់ឧបករណ៍សម្ភារ:ចុងក្រោយតែប៉ុណ្ណោះ។

ឯកឧត្ដមអភិបាលខេត្ត បានសម្ដែងការរីករាយជាមួយការបំពេញភារកិច្ចកន្លងមករបស់ថ្នាក់ដឹកនាំបុគ្គលិកកម្មករទាំងអស់នៅក្នុងតំបន់កែច្នៃសំរាម ដែលគាំទ្រដោយក្រសួងសារធារណៈការ និងដឹកជញ្ជូន ក៍ដូចជាធានាគារអភិវឌ្ឍន៍អាស៊ី (ADB)ដែលបានផ្ដល់កម្ចីដល់រដ្ឋាភិបាលអភិវឌ្ឍន៍គម្រោងអនុតំបន់មេគង្គ
ជំហានទី៤នេះ។

ឯកឧត្តម អភិបាលខេត្ត ក៏បានផ្ដាំផ្ញើរដល់មន្រ្តីរាជការគ្រប់មន្ទីរអង្គភាព ដែលអញ្ជើញមកថ្ងៃនេះ សុំពិនិត្យមើលបញ្ហានេះ ហើយជួយផ្សព្វផ្សាយឲ្យបងប្អូនយើងបានយល់ទាំងអស់គ្នា ទោះជាតំបន់ដែលប្រើប្រាស់ទីតាំងនេះក្ដី មិនបានប្រើប្រាស់ក្ដី នាពេលអនាគតរដ្ឋាភិបាលច្បាស់ជាគិតគូទោះបីមិនមានលទ្ធភាពធ្វើយ៉ាងដូច្នេះ ក៍មានទីតាំងសម្រាប់ឲ្យដាក់សំរាមបានត្រឹមត្រូវសមរម្យដែរ ហើយចូលរួមផ្សព្វផ្សាយដល់បងប្អូនរស់ទីប្រជុំជនក្រុងក្រចេះ ក៍ដូចជា បងប្អូននៅទីប្រជុំជនដែលប្រើប្រាស់តំបន់នេះ ត្រូវធ្វើការវេចខ្ចប់សំរាមឲ្យបានត្រឹមត្រូវដើម្បីដឹកជញ្ជូនយកមកកែច្នៃ និងបំលែងនៅទីនេះ ៕