ព្រឹកស្អែក! សម្ដេចតេជោ ហ៊ុន សែន នឹងអញ្ជើញជួបជាមួយសមាជិករាជរដ្ឋាភិបាលចាស់ និងថ្មីដើម្បីចែករំលែកបទពិសោធការងារ
ភ្នំពេញ៖ នៅថ្ងៃទី១០ ខែសីហា ឆ្នាំ២០២៣ស្អែកនេះ សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា នឹងដឹកនាំជំនួបសំណេះសំណាលជាមួយសមាជិករាជរដ្ឋាភិបាលក្នុងអាណត្តិចាស់ និងសមាជិករាជរដ្ឋាភិបាលអាណត្តិថ្មី នៅទីស្តីការគណបក្សប្រជាជនកម្ពុជា វិមាន៧មករា រាជធានីភ្នំពេញ ដើម្បីចែករំលែកបទពិសោធន៍ការងារដឹកនាំរដ្ឋាភិបាលជូន សមាសភាពក្បាលម៉ាស៊ីនដឹកនាំរាជរដ្ឋាភិបាលថ្មី។
បើតាមសាររបស់សម្ដេចតេជោ ហ៊ុន សែន គិតត្រឹមថ្ងៃទី៩ ខែសីហានេះសម្ដេចនឹងបន្តធ្វើជានាយករដ្ឋមន្ត្រីរយៈពេល ១៣ ថ្ងៃទៀតប៉ុណ្ណោះ ឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត និងត្រូវឡើងកាន់តំណែងជានាយករដ្ឋមន្រ្ដីថ្មីជាផ្លូវការ ខណៈដែលសម្ដេចនឹងឡើងឋានៈទៅជាឪពុកនាយករដ្ឋមន្ត្រីម្តង។
សូមជម្រាបថារដ្ឋសភាជាតិនឹងបើកសម័យប្រជុំលើក១ និងលើកដំបូង នាថ្ងៃទី២១ និងថ្ងៃទី២២ ខែសីហា ឆ្នាំ២០២៣ ក្រោមព្រះរាជវត្តមានដ៏ខ្ពង់ខ្ពស់បំផុតរបស់ព្រះករុណា ព្រះបាទសម្តេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា រួមជាមួយសមាជិកសមាជិកាសភាសរុប ១២៥ រូប ដើម្បីបោះឆ្នោតផ្តល់សេចក្តីទុកចិត្តលើការរៀបចំរាជរដ្ឋាភិបាលនីតិកាលទី៧នេះ៕
