ឯកឧត្តម អ៊ុំ រាត្រី៖ នៅលើពិភពលោកនេះគ្រប់ជាតិសាសន៍ទាំងអស់ត្រូវការព្រៃឈើជាចាំបាច់ដូច្នេះគ្មានអ្វីដែលគ្មានទំនាក់ទំនងទៅនឹង ព្រៃឈើនោះទេ

បន្ទាយមានជ័យ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានលើកឡើងថា នៅលើពិភពលោកនេះគ្រប់ជាតិសាសន៍ទាំងអស់ត្រូវការព្រៃឈើជាចាំបាច់ដូច្នេះគ្មានអ្វីដែលគ្មានទំនាក់ទំនងទៅនឹង ព្រៃឈើនោះទេ ព្រៃឈើមានចំណែកយ៉ាងធំធេងណាស់ ក្នុងការជួយឲ្យបរិយាកាសមានស្ថានភាពល្អប្រសើរ ព្រៃឈើបង្កឲ្យមានភ្លៀងធ្លាក់ទៀងទាត់ស្រូបនូវឧស្ម័នកាបូនិចដែលជាជាតិពុលក្នុងស្រទាប់ខ្យល់ឲ្យបំពេញនូវឧស្ម័នអុកស៊ីសែនពេលថ្ងៃដែលមនុស្សសត្វត្រូវការ ដកដង្ហើមដើម្បីរស់។

ឯកឧត្តមបានឲ្យដឹងបែបនេះ នៅថ្ងៃទី៩ ខែសីហា ឆ្នាំ២០២៣ ក្នុងពិធីបុណ្យរុក្ខទិវា នៅភូមិកងវ៉ា សង្កាត់កំពង់ស្វាយ ក្រុងសិរីសោភ័ណខេត្តបន្ទាយមានជ័យ ដែលមានការចូលរួមពីសំណាក់អស់លោក លោកស្រី មន្ត្រីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋយ៉ាងច្រើនកុះករ ។

ឯកឧត្តម អ៊ុំ រាត្រីបន្តថា ព្រៃឈើបានស្រូបយកពន្លឺព្រះអាទិត្យ ឲ្យកម្ដៅមានលំនឹងនិងពុំក្តៅខ្លាំងពោលគឺព្រៃឈើជួយរក្សាបរិយាកាសឲ្យត្រជាក់ជានិច្ចព្រមទាំងជួយកាត់បន្ថយនៃការរំខានដោយសំឡេងខ្យល់កខ្វក់ឬពុល និងកាត់បន្ថយបាននូវគ្រោះធម្មជាតិដូចជាខ្យល់ព្យុះជាដើម ព្រោះនិងព្រៃឈើមានទំនាក់ទំនងគ្នាជាប្រព័ន្ធពុំអាចខ្វះបានឬអាចថា ជាផ្នែកមួយនៃជីវិតមនុស្សយើងអាចទាញយកផលប្រយោជន៍ពីព្រៃឈើធម្មជាតិប៉ុន្តែមិនមែនមានន័យថាទាញយកផលប្រយោជន៍រហូតដល់បាត់បង់ទាំងព្រៃបាត់បង់ទាំងប្រព័ន្ធអេកូឡូស៊ីនិងជីវៈចម្រុះនោះទេ។

ឯកឧត្តមអ៊ុំ រាត្រី បន្ថែមទៀតថា បុណ្យរុក្ខទិវា ជាបុណ្យជាតិមួយ ដែលបានបង្កើតឡើងដោយព្រះបរមរតនកោដ្ឋសម្ដេចព្រះនរោត្តមសីហនុនាសម័យសង្គមរាស្ត្រនិយម និងកំណត់ដោយព្រះរាជក្រឹត្យលេខ៧៣៨ នសចុះថ្ងៃទី៨ ខែសីហាឆ្នាំ១៩៥២ ពិធីបុណ្យនេះត្រូវបានធ្វើឡើងជារៀងរាល់ឆ្នាំ នៅគ្រប់រាជធានីខេត្តនៅទូទាំងប្រទេស៕