ឯកឧត្តម គីម រិទ្ធី ជួបសំណេះសំណាលជាមួយសមាជិក សមាជិកា សហភាពសហព័ន្ធយុវជនកម្ពុជា ខេត្តព្រះវិហារ ដើម្បីបូកសរុបវាយតំលៃលទ្ធផលការងារមួយចំនួន

ភ្នំពេញ៖ ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ និងជាអនុប្រធានសហភាពសហព័ន្ធយុវជនកម្ពុជាថ្នាក់កណ្ដាល នៅថ្ងៃទី០៩ ខែសីហា ឆ្នាំ២០២៣ បានអញ្ជើញជួបសំណេះសំណាលជាមួយសមាជិក សមាជិកា សហភាពសហព័ន្ធយុវជនកម្ពុជា ខេត្តព្រះវិហារ ដើម្បីបូកសរុបវាយតំលៃលទ្ធផលការងារមួយចំនួនដូចខាងក្រោម៖

១-ការងារពលរដ្ឋល្អ ស.ស.យ.ក.ខេត្តព្រះវិហារ បានចាត់អ្នកសង្កេតការណ៍ចំនួន ៧១៤នាក់ ដើម្បីចូលរួមសង្កេតការណ៍ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣ នៅគ្រប់ការិយាល័យបោះឆ្នោត។ ការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តធម៌ ស្របតាមគោលការណ៍នៃលទ្ធិប្រជាធិបតេយ្យសេរីពហុបក្ស និងគោលការណ៍ច្បាប់ គ្មានអំពើហិង្សា ក្នុងបរិយកាសល្អ ហើយប្រជាពលរដ្ឋចេញទៅបោះឆ្នោតក្នុងអត្រា ៨៤.០៦%។

២-ការងារសុវត្តិភាពចរាចរណ៍ ពិសេសគម្រោងគោយន្តមានភ្លើង ដែល ស.ស.យ.ក. តាមបណ្តាក្រុង ស្រុក បានបំពាក់ភ្លើងបំភ្លឺ និងចំណាំងផ្លាត ដល់គោយន្តបានចំនួន ១,០០០គោយន្ត និងបន្តបំពាក់ចំនួន ១៥,០០០គោយន្ត បន្ថែមទៀត។

៣-ការងារកសាងបណ្តាញអ្នកផ្តល់ឈាម ក្រោមពាក្យស្លោក “ផ្តល់ឈាម ផ្តល់ក្តីស្រលាញ់” ស.ស.យ.ក ខេត្តព្រះវិហារ បានរៀបចំពិធីផ្តល់ឈាមដោយស្ម័គ្រចិត្តវិលជុំតាមបណ្តាក្រុង ស្រុក ទាំង០៨។

៤-ការអភិវឌ្ឍន៍សមត្ថភាពយុវជន ដោយផ្តោតលើការអភិវឌ្ឍនចំណេះដឹងបច្ចេកវិទ្យាព័ត៌មាន តាមរយ:ការផ្តល់ជូននូវសាលកុំព្យូទ័រដល់វិទ្យាល័យទាំង ១៩ទូទាំងខេត្តព្រះវិហារ និងបានផ្តល់ទូរទស្សន៍ស្មាតធីវីជូនវិទ្យាល័យទាំង ១៩ ដើម្បីងាយស្រួលក្នុងការបង្ហាត់ បង្រៀន។

៥-ការលើកកម្ពស់សុខភាព និងវិស័យកីឡា ដោយជម្រុញអោយយុវជនលេងកីឡា ក្រុមពាក្យស្លាក “យុវជនមួយនាក់ កីឡាមួយប្រភេទ”។

ក្រោយពីបញ្ចប់ពិធីសំណេះសំណាល សមាជិក សមាជិកា នៃអង្គពិធីទាំងមូល បានអញ្ជើញចូលរួមពិសារអាហារសាមគ្គីរួមគ្នា ៕