អភិបាលរងខេត្តរតនគិរី អរគុណស្ថានទូតអាមេរិក ដែលផ្តល់មូលនិធិគាំទ្រឲ្យមានកម្មវិធីអាហារូបករណ៍ភាសាអង់គ្លេសសម្រាប់ការងារនៅខេត្ត

ភ្នំពេញ៖ ឯកឧត្តម ឌុច ចាន់តូ អភិបាលរងខេត្តរតនគិរី តំណាងឯកឧត្តម ញ៉ែម សំអឿន អភិបាលខេត្ត បានថ្លែងអំណរគុណស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជាដែលបានផ្តល់មូលនិធិក្នុងការគាំទ្រអោយមានកម្មវិធីអាហារូបករណ៍ភាសាអង់គ្លេសសម្រាប់ការងារនៅខេត្ត។

ការថ្លែងអំណរគុណនេះធ្វើឡើងនៅក្នុងឱកាសដែល ឯកឧត្តមអភិបាលរងខេត្ត និងឯកឧត្តម ផាទ្រីក មឺហ្វី (Patrick Murphy) ឯកអគ្គរដ្ឋទូតសហរដ្ឋអាមេរិកបានអញ្ជើញចូលរួមក្នុងពិធីបញ្ចប់វគ្គសិក្សាកម្មវិធីអាហារូបករណ៍ភាសាអង់គ្លេសសម្រាប់ការងារនៅវិទ្យាស្ថានពហុបច្ចេកទេសកម្ពុជា-អាសុីស្ថិតនៅក្រុងបានលុង នារសៀលថ្ងៃទី១០ ខែសីហា ឆ្នាំ២០២៣។

ឯកឧត្តមអភិបាលរងខេត្ត បានចាត់ទុកការឧបត្ថម្ភថវិកាដោយស្ថានទូតសហរដ្ឋអាមេរិកនេះ ពិតជាមានសារៈប្រយោជន៍ណាស់ដល់យុវជន និងយុវតីព្រោះថាកម្មវិធីនេះ បានផ្តល់ឱកាសអោយយុវជន និងយុវតី ទទួលបានការបណ្តុះបណ្តាលបន្ថែមទៅលើភាសាអង់គ្លេស និងជំនាញផ្សេងទៀត ដែលឆ្លើយតបជាមួយតម្រូវការងារនៅលើទីផ្សារ។ លើសពីនេះទៅទៀត ចំណេះដឹងដែលយុវជន និងយុវតីយើងទទួលបានពីកម្មវិធីនេះ នឹងធ្វើអោយយុវជន និងយុវតីទាំងអស់គ្នាក្លាយជាធនធានមនុស្សដ៏ល្អ ក្នុងការចូលរួមចំណែកអភិវឌ្ឍន៍សេដ្ឋកិច្ច និងសង្គមនៅក្នុងខេត្ត ក៏ដូចជាទូទាំងព្រះរាជាណាចក្រកម្ពុជា។

ឯកឧត្តមអភិបាលរងខេត្ត ក៏បាន
ស្នើរដល់ស្ថានទូតសហរដ្ឋអាមេរិចប្រចាំ ព្រះរាជាណាចក្រកម្ពុជាសូមពិចារណាក្នុងការបន្តគម្រោងបែបនេះបន្ថែមទៀត ព្រោះថាមានយុវជន និងយុវតីច្រើនណាស់ដែលមិនមានឱកាសក្នុងការទទួលបានការសិក្សាភាសាអង់គ្លេស និង ជំនាញនានាដែលឆ្លើយតបជាមួយឱកាសការងារ។

មានប្រសាសន៍សំណេះសំណាលជាមួយប្អូនសិស្សានុសិស្សដែលទទួលបានអាហារូបករណ៍ឯកឧត្តមអភិបាលរងខេត្ត និងឯកឧត្តម ផាទ្រីក មឺហ្វី (Patrick Murphy) ឯកអគ្គរដ្ឋទូតសហរដ្ឋអាមេរិកបានសម្តែងនូវការសប្បាយរីករាយនិងមានការជឿទុកចិត្តលើការវិនិយោគរបស់ស្ថានទូតអាមេរិកលើប្អូនៗម្នាក់ៗដោយសង្ឃឹមថាប្អូនៗទាំងអស់គ្នានឹងវិនិយោគមកវិញរួមចំណែកក្នុងការបង្កើនសមត្ថភាពខ្លួនឯងនិងពង្រឹងទំនាក់ទំនងរវាងសហរដ្ឋអាមេរិកនិងកម្ពុជាអោយកាន់តែល្អប្រសើរផងដែរ។

ឯកឧត្តមឯកអគ្គរដ្ឋទូតសហរដ្ឋអាមេរិកក៏បានសម្តែងនូវមោទនៈភាពមចំពោះវត្តមានដ៏ច្រើនរបស់សិស្សជាជនជាតិដើមភាគតិចនៅក្នុងគម្រោងនេះ។ ហើយសហរដ្ឋអាមេរិកមានការងារសកម្មក៏ដូចជាការជឿជាក់លើសិទ្ធិស្មើភាពគ្នាទៅលើសហគមន៍របស់ប្រទេសនីមួយៗក្នុងនោះការចូលរួមដោយស្មើរភាពគ្នាពីសហគមន៍ជនជាតិដើមភាគតិចតាមរយៈគម្រោងមួយនេះ ៕