បញ្ហាសុខភាពមិនមែនជាកម្មសិទ្ធិផ្តាច់មុខរបស់ខ្លួនតែម្នាក់ឯងនោះទេ គឺជាប់ពាក់ព័ន្ធនឹងសាច់ញាតិនិងអ្នកនៅជុំវិញខ្លួនយើង

បន្ទាយមានជ័យ ៖ រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន របស់ក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា បញ្ហាសុខភាពមិនមែនជាកម្មសិទ្ធផ្តាច់មុខរបស់ខ្លួនតែម្នាក់ឯងនោះទេគឺជាប់ពាក់ព័ន្ធនឹងសាច់ញាតិនិងអ្នកនៅជុំវិញខ្លួនយើង។
ក្នុងសិក្ខាសាលាស្តីពីការពង្រឹងនៃការអនុវត្តប្រកាសលេខ ០៨៦ ប្រកាសលេខ ១៩៤ និងសេចក្តីណែនាំលេខ ០០៨ នៅតាមរោងចក្រ សហគ្រាស និងគ្រឹះស្ថាន ក្រុមហ៊ុនផ្នែកសេវាកម្សាន្តរបស់ក្រសួងការងារ និងបណ្តុះបណ្តាលវិជ្ជាជីវៈទៅដល់ម្ចាស់សហគ្រាស គ្រឹះស្ថាន និងកម្មករនិយោជិតផ្នែកសេវាកម្សាន្ត នៅថ្ងៃទី១១ ខែសីហា ឆ្នាំ ២០២៣ នៅ ខេត្តបន្ទាយមានជ័យ ឯកឧត្តម វេជ្ជ.ហ៊ុយ ហានសុង រដ្ឋលេខាធិការ និងជាប្រធានគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន របស់ក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា គ្រប់និយោជក និងអ្នកពាក់ព័ន្ធទៅត្រូវមានកាតព្វកិច្ចថែទាំសុខភាពកម្មករនិយោជិតរបស់ខ្លួន ដើម្បីសុខដុមនីយកម្មនៅកន្លែងធ្វើការ និងផលិតភាពកើនឡើង ទាំងនិយោជក និងនិយោជិតរីកចម្រើនទៅមុខទាំងអស់គ្នា ហើយសេដ្ឋកិច្ចជាតិក៏នឹងរីកចម្រើន និងមានការអភិវឌ្ឍទៅមុខបានឆាប់រហ័ស។
លោក នួន ស៊ីណា ប្រធានមន្ទីរការងារនិងបណ្តុះបណ្តាលវិជ្ជាជីវ:ខេត្តបានស្វាគមន៍និងបានជម្រាបជូនពីកិច្ចខិតខំប្រឹងប្រែងបំពេញការងារប្រយុទ្ធប្រឆាំងគ្រឿងញៀនអេដស៍តាមការចង្អុលបង្ហាញតាមប្រកាស និងសេចក្តីណែនាំទាំង៣ ហើយមានសហគ្រាស គ្រឹះស្ថានផ្នែកសេវាកម្សាន្តចំនួន៥១ ក្នុងចំណោម៧០ដែលបានចូលរួមអនុវត្ត។
ក្នុងនាមឯកឧត្តម នាយ ឧត្ដមសេនីយ៍ មាស វិរិទ្ធ អគ្គលេខាធិការ នាឱកាសនោះ លោកឧត្តមសេនីយ៍ឯក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានថ្លែងអំណរគុណ ដល់ថ្នាក់ដឹកនាំក្រសួង ខេត្តបន្ទាយមានជ័យ នៃគណៈកម្មាធិការប្រយុទ្ធនឹងជំងឺអេដស៍ និងគ្រឿងញៀន ដែលបានខិតខំបំពេញការងារទទួលបានលទ្ធផលល្អប្រសើរនិងសូមបន្តចូលរួមសកម្មភាពផ្សព្វផ្សាយពីការបង្ការទប់ស្កាត់ បញ្ហាគ្រឿងញៀន អេដស៍ និងគ្រោះថ្នាក់ចរាចរណ៍ដើម្បីឱ្យកម្មករនិយោជិតដែលជាកម្លាំងពលកម្មរបស់យើងមានសុខភាពល្អ៕