មន្ត្រីជំនាញនៃអាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងអប់រំ បន្តចុះពង្រឹង សុខភាពសិក្សានៅខេត្តព្រះសីហនុ

ព្រះសីហនុ ៖ ថ្ងៃទី១១ ខែសីហា ឆ្នាំ២០២៣ក្រសួងអប់រំ យុវជន និងកីឡា សហការអាជ្ញាធរជាតិប្រយុទ្ធប្រឆាំងគ្រឿងញៀនបានរៀបចំសិក្ខាសាលាអប់រំផ្សព្វផ្សាយស្តីពីការបង្ការការប្រើប្រាស់ផលិតផលថ្នាំជក់ បារីអេឡិចត្រូនិកគ្រឿងញៀនខុសច្បាប់ មេរោគអេដស៍ ជំងឺអេដស៍ និងគ្រោះថ្នាក់ចរាចរណ៍ផ្លូវគោកនៅតាមគ្រឹះស្ថានសិក្សានៅខេត្តព្រះសីហនុ ដែលមានអ្នកពាក់ព័ន្ធចូលរួមពីថ្នាក់ជាតិ និងក្រោមជាតិ សរុប២២១នាក់។

លោកស្រី អ៊ុច សោភា ប្រធានមន្ទីរអប់រំ យុវជន និងកីឡា ខេត្តព្រះសីហនុ បានស្វាគមន៍និងរបាយការណ៍ពីការចូលរួមអនុវត្តនូវគោលនយោបាយជាតិស្តីពីសុខភាពសិក្សាដែលបានដាក់ឱ្យអនុវត្តតាំងពីឆ្នាំ២០១៩មក។

ថ្លែងក្នុងនាម ឯកឧត្ដម គួច ចំរើន អភិបាល និងជាប្រធានគណកម្មាធិការត្រួតពិនិត្យគ្រឿងញៀនខេត្តព្រះសីហនុ នាឱកាសនោះ ឯកឧត្ដម ឯម ភាព បានថ្លែងថា បញ្ហាគ្រឿងញៀន អេដស៍ ចរាចរណ៍ និងបារីអេឡិចត្រូនិកគឺជាបញ្ហាសុខភាពដែលផ្សាភ្ជាប់ជាមួយប្រជាពលរដ្ឋដែលយើងទាំងអស់គ្នាខិតខំចូលរួមបង្ការទប់ស្កាត់កុំឱ្យមានការរីករាលដាល។

ក្នុងឱកាសនោះដែរ ឯកឧត្តមសាស្ត្រាចារ្យ ហោ ប៊ុនឡេង អនុប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងថា បញ្ហាជំងឺអេដស៍នៅមិនទាន់ទៅណាចោលយើងទេ បញ្ហានេះអាចត្រឡប់មកវិញបានពេលដែលយើងធ្វេសប្រហែសខ្វះការប្រុងប្រយ័ត្ន។

ថ្លែងក្នុងនាម ឯកឧត្ដម បណ្ឌិតសភាចារ្យ ហង់ជួន ណារ៉ុន នាឱកាសនោះដែរ លោកជំទាវ ឃុន រចនា អនុរដ្ឋលេខាធិការ ក្រសួងអប់រំ យុវជននិងកីឡា បានថ្លែងនូវការកោតសរសេីរដល់អ្នកពាក់ព័ន្ធទាំងអស់ដែលបានខិតខំពង្រឹងបាននូវគុណភាពសិក្សាដែលជាផ្នែកមួយជួយពង្រឹងបាននូវគុណភាពអប់រំនៅកម្ពុជា ហើយគុណភាពអប់រំអាចរឹងមាំបានលុះត្រាតែសិស្សទាំងអស់មានសុខភាពល្អ។

ជាមួយគ្នានេះ លោកជំទាវ ឃុន រចនា បានមានសំណូមពរដល់អ្នកចូលរួមទាំងអស់ត្រូវបន្តចូលរួមយកចំណេះដឹងពីសិក្ខាសាលានេះទៅផ្សព្វផ្សាយដល់មិត្តភក្តិនិងមនុស្សជាទីស្រឡាញ់ដើម្បីបង្ការទប់ស្កាត់កុំឱ្យមានការប្រើប្រាស់នូវផលិតផលថ្នាំជក់ បារីអេឡិចត្រូនិក គ្រឿងញៀន បង្ការមេរោគអេដស៍ ជំងឺអេដស៍ និងគ្រោះថ្នាក់ចរាចរណ៍៕