ឯកឧត្តម សុខ សូកេន ដឹកនាំកិច្ចប្រជុំអន្តរក្រសួង ស្តីពីការត្រៀមចាប់ផ្តើមអនុវត្តគម្រោងក្រោមមូលនិធិពិសេសនៃកិច្ចសហប្រតិបត្តិការមេគង្គ-ឡានឆាងឆ្នាំ២០២៣
ភ្នំពេញ៖ ឯកឧត្តម សុខ សូកេន រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ (កបទ.សអ) និងជាអនុប្រធានលេខាធិការដ្ឋានជាតិកម្ពុជានៃកិច្ចសហប្រតិបត្តិការមេគង្គ-ឡានឆាង កាលពីព្រឹកថ្ងៃទី១១ ខែសីហា ឆ្នាំ២០២៣ បានអញ្ជើញដឹកនាំកិច្ចប្រជុំអន្តរក្រសួង ស្តីពីការត្រៀមចាប់ផ្តើមអនុវត្តគម្រោងក្រោមមូលនិធិពិសេសនៃកិច្ចសហប្រតិបត្តិការមេគង្គ-ឡានឆាងឆ្នាំ២០២៣។
កិច្ចប្រជុំនេះ បានលើកឡើងអំពីវឌ្ឍនភាព និងសារៈសំខាន់នៃក្របខណ្ឌកិច្ចសហប្រតិបត្តិការមេគង្គ-ឡានឆាង ក្នុងការចូលរួមចំណែកជាក់ស្តែងដល់ការអភិវឌ្ឍប្រកបដោយចីរភាព និងបរិយាប័ន្ននៅក្នុងអនុតំបន់មេគង្គ។ មកដល់បច្ចុប្បន្ននេះ កម្ពុជាទទួលបានគម្រោងទាំងអស់ចំនួន៨៩ មានតម្លៃសរុបប្រមាណ៣៣លានដុល្លារ ពីមូលនិធិពិសេសនេះ ដែលបានគាំទ្រដល់វិស័យចម្រុះ ពិសេសការអភិវឌ្ឍន៍ជនបទ ក្នុងគោលដៅលើកកម្ពស់សុខុមាលភាពប្រជាជន។ កិច្ចប្រជុំ ក៏បានចែករំលែកអំពីនីតិវីធីហិរញ្ញប្បទាន ដល់ក្រសួង-ស្ថាប័នអនុវត្តគម្រោង ដើម្បីជំរុញការអនុវត្តគម្រោងថ្មីទាំងអស់ ប្រកបដោយប្រសិទ្ធភាព និងតាមស្តង់ដាដែលមានចែងក្នុងបទដ្ឋានគតិយុត្ត។
សម្រាប់ឆ្នាំនេះ កម្ពុជាទទួលបានគម្រោងថ្មីសរុប ០៩គម្រោង ដែលគាំទ្រដោយមូលនិធិពិសេសមេគង្គ-ឡានឆាងឆ្នាំ២០២៣ ៕
