ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវ ឧបត្ថម្ភថ្លៃព្យាបាលដល់លោកយាយ ហែម សុផល មានជំងឺភ្នែកទ្បើងបាយ

ភ្នំពេញ៖ លោកយាយ ហែម សុផល អាយុ ៧៣ឆ្នាំ រស់នៅក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ មានអាការភ្នែកទ្បើងបាយទាំងសងខាង ប៉ុន្តែដោយមានជីវភាពខ្វះខាត ទើបលោកយាយពុំអាចធ្វើការវះកាត់ និងព្យាបាលបាន ។

ដោយសារទឹកចិត្តសប្បុរសធម៌របស់ ឯកឧត្តមកិត្តិទេសាភិបាលបណ្ឌិត និងលោកជំទាវ តាមរយៈបេសកកម្មក្រុមគ្រូពេទ្យ TYDA ចុះព្យាបាលជំងឺប្រជាពលរដ្ឋនៅសហគមន៍ក្រីក្រ ក្នុងបរិវេណសាលាវិទ្យាល័យបឹងត្របែក កាលពីថ្ងៃទី១៧ ខែមិថុនា ឆ្នាំ២០២៣ កន្លងទៅ, លោកយាយ ហែម សុផល ត្រូវបានបញ្ជូនទៅធ្វើការវះកាត់ភ្នែកឡើងបាយទាំងសងខាងនេះដោយជោគជ័យ នៅមន្ទីរពេទ្យព្រះអង្គឌួង ។ បច្ចុប្បន្ន កែវភ្នែកទាំងពីររបស់លោកយាយ អាចមើលឃើញដូចធម្មតាទ្បើងវិញហើយ ។

រាល់ការចំណាយទាំងអស់ក្នុងការព្យាបាល ទាំងវះកាត់ ស្នាក់នៅ ហូបចុក ត្រូវបានជួយឧបត្ថម្ភគាំទ្រដោយ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវ ពេជ ចន្ទមុន្នី ។