ឯកឧត្តម សួន រស្មី អញ្ជេីញធ្វេីបទបង្ហាញក្នុងវគ្គបណ្តុះបណ្តាល និងផ្សព្វផ្សាយ ស្តីពី “ការងារអធិការកិច្ចពាក់ព័ន្ធនឹងវិស័យមុខងារសាធារណៈ”

ភ្នំពេញ៖ អគ្គាធិការដ្ឋាន នៃក្រសួងមុខងារសាធារណៈ នារសៀលថ្ងៃទី១៤ ខែសីហា ឆ្នាំ២០២៣ បានរៀបចំវគ្គបណ្តុះបណ្តាលផ្សព្វផ្សាយ ស្តីពី “ការងារអធិការកិច្ចពាក់ព័ន្ធនឹងវិស័យមុខងារសាធារណៈ”។ វគ្គបណ្ដុះបណ្ដាលមានការចូលរួមពី ឯកឧត្តម លោក លោកស្រី អគ្គាធិការរង ប្រធាននាយកដ្ឋាន អធិការ អនុប្រធាននាយកដ្ឋាន ប្រធាន-អនុប្រធានការិយាល័យ និងមន្ត្រីរាជការនៃអគ្គាធិការដ្ឋាន ព្រមទាំងអនុប្រធាននាយកដ្ឋាន ប្រធាន-អនុប្រធានការិយាល័យ និងមន្ត្រីរាជការមួយចំនួននៃនាយកដ្ឋានសវនកម្មផ្ទៃក្នុង ក្រសួងមុខងារសាធារណៈ សរុបអ្នកចូលរួមប្រមាណ ៧៦នាក់។

ក្នុងឱកាសនោះ ឯកឧត្តម សួន រស្មី អគ្គាធិការ នៃអគ្គាធិការដ្ឋានក្រសួងមុខងារសាធារណៈ បានធ្វេីបទបង្ហាញស្តីពី ការងារអធិការកិច្ចពាក់ព័ន្ធនឹងវិស័យមុខងារសាធារណៈ និងបេីកកិច្ចពិភាក្សា សំណួរ-ចម្លេីយ ពាក់ព័ន្ធនឹងប្រធានបទ ដើម្បីទទួលបានចំណេះដឹងថ្មីៗ ស្វែងយល់ ដកពិសោធន៍ អភិវឌ្ឍន៍សមត្ថភាពបន្ថែម និងជាមូលដ្ឋានសម្រាប់អនុវត្តការងារអធិការកិច្ច ពិសេសពាក់ព័ន្ធនឹងវិស័យមុខងារសាធារណៈ។

ក្រោយពីបញ្ចប់ការធ្វេីបទបង្ហាញ និងការពិភាក្សា សំណួរ-ចម្លើយ ក្នុងកម្មវិធីនោះ ឯកឧត្តម សួន រស្មី បានថ្លែងបញ្ជាក់ថា ការរៀបចំវគ្គបណ្តុះបណ្តាលផ្សព្វផ្សាយ និងកិច្ចពិភាក្សាពិគ្រោះយោបល់នេះ គឺធ្វេីឱ្យមន្ត្រីអធិការកិច្ចទទួលបានចំណេះដឹង បទពិសោធន៍ថ្មីៗបន្ថែមទៀត ពិសេសបានផ្តល់អត្ថប្រយោជន៍សំខាន់ៗមួយចំនួនដូចជា៖
១-ការអភិវឌ្ឍសមត្ថភាពយល់ដឹងកាន់តែច្បាស់ពាក់ព័ន្ធនឹងការងារអធិការកិច្ចវិស័យមុខងារសាធារណៈ ដល់មន្ត្រីអធិការកិច្ច
២-បានរៀនសូត្រ ស្វែងយល់ ដកពិសោធន៍ និងកិច្ចពិភាក្សាយ៉ាងល្អិតល្អន់ ដេីម្បីមានមូលដ្ឋានរឹងមាំក្នុងការកសាងលិខិតបទដ្ឋានគតិយុត្តចាំបាច់មួយចំនួន សម្រាប់អនុវត្តការងារ
៣-ទទួលបានចំណេះដឹងបន្ថែមសម្រាប់អនុវត្តការងារអធិការកិច្ច ប្រកបដោយគុណភាព ប្រសិទ្ធភាព និងសមិទ្ធកម្មការងារ។

មុននឹងបញ្ចប់កម្មវិធី ឯកឧត្តម សួន រស្មី បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម ព្រុំ សុខា រដ្ឋមន្ត្រីក្រសួងមុខងារសាធារណៈ ដែលបានអនុញ្ញាតអោយរៀបចំវគ្គបណ្តុះបណ្តាលនេះដេីម្បីអភិវឌ្ឍសមត្ថភាពមន្រ្តីអធិការកិច្ច និងមន្រ្តីសវនកម្មផ្ទៃក្នុង និងថ្លែងអំណរគុណដល់មន្ត្រីរាជការទាំងអស់ ដែលបានចូលរួមយ៉ាងសកម្ម យកចិត្តទុកដាក់ស្តាប់ និងមានកិច្ចសហការល្អក្នុងកិច្ចពិភាក្សា សំណួរ-ចម្លេីយ ដេីម្បីបង្កេីនចំណេះដឹងឱ្យកាន់តែទូលំទូលាយ។

ចុងបញ្ចប់កម្មវិធី ឯកឧត្តមអគ្គាធិការ បានណែនាំដល់ ឯកឧត្តម លោក លោកស្រី ជាថ្នាក់ដឹកនាំ និងមន្ត្រីរាជការទាំងអស់ នៃអគ្គាធិការដ្ឋាន និងមន្ត្រីរាជការ នៃនាយកដ្ឋានសវនកម្មផ្ទៃក្នុង សូមបន្តការសិក្សាស្រាវជ្រាវ បន្តខិតខំបំពេញការងារ ការគោរពអនុវត្តតាមច្បាប់ លិខិតបទដ្ឋានគតិយុត្តជាធរមាន ៕