អគ្គនាយកអន្តោប្រវេសន៍ ប្រារព្ធពិធីប្រកាសផ្ទេរភារកិច្ច និងតែតាំងមុខតំណែង នាយនគរបាលថ្នាក់ឧត្តមសេនីយ៍
ភ្នំពេញ៖ អគ្គនាយកអន្តោប្រវេសន៍ នារសៀលថ្ងៃពុធ ១៥រោច ខែទុតិយាសាឍ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៦ ខែសីហា ឆ្នាំ២០២៣ បានប្រារព្ធពិធីប្រកាសផ្ទេរភារកិច្ច និងតែតាំងមុខតំណែង នាយនគរបាលថ្នាក់ឧត្តមសេនីយ៍ ក្រោមអធិបតីភាព ឯកឧត្តម សន្តិបណ្ឌិត សុខ ផល រដ្ឋលេខាធិការ ក្រសួងមហាផ្ទៃ។
ក្នុងពិធីនេះដែរក៏មានការអញ្ជេីញចូលរួមពីឯកឧត្តម លោកជំទាវ អនុរដ្ឋលេខាធិការក្រសួងមហាផ្ទៃ ឯកឧត្តមទីប្រឹក្សារក្រសួងមហាផ្ទៃ ព្រមទាំងឯកឧត្តម នាយឧត្តមសេនីយ៍ គៀត ច័ន្ទថារិទ្ធ អគ្គនាយកអន្តោប្រវេសន៍ ឯកឧត្តម លោកជំទាវអគ្គនាយករង លោកប្រធាននាយកដ្ឋាន លោក-លោកស្រីអនុប្រធាននាយកដ្ឋាន លោកនាយប៉ុស្តិ៍តាមបណ្ដាលច្រកទ្វារ លោកនាយ-នាយរងការិយាល័យ និងមន្រ្តីនៃនាកដ្ឋានមួយចំនួនផ្សេងទៀតសរុប ១៨៦រូប។
មានប្រសាសន៍នាឱកាសនោះ ឯកឧត្តម នាយឧត្តមសេនីយ៍ គៀត ចន្ទថារិទ្ធ អគ្គនាយករដ្ឋានអន្តោប្រវេសន៍ បានបញ្ជាក់ឲ្យដឹងថា មានជនបរទេសចំនួន ១,០៣៨នាក់មកពី ២៦សញ្ជាតិ ដោយក្នុងនោះមានជនជាតិចិនច្រើនជាងគេគឺមានចំនួន ៥៤៩នាក់ ជនជាតិឥណ្ឌូនេស៊ីចំនួន ១៦៩នាក់ ជនជាតិវៀតណាមចំនួន ១២៩នាក់ ថៃចំនួន ២៦នាក់ ម៉ាឡេស៊ី២៥នាក់ និងជនជាតិបរទេស ផ្សេងៗទៀតត្រូវបានបណ្តេញចេញជាបន្តបន្ទាប់ ក្រោយរកឃើញថាពួកគេបានរស់នៅ និងធ្វើការនៅកម្ពុ ជាដោយខុសច្បាប់ និងខ្លះទៀតបានប្រព្រឹត្តល្មើសច្បាប់ជាដើម។
ជាមួយគ្នានោះដែរ ឯកឧត្តម នាយឧត្តមសេនីយ៍ គៀត ចន្ទថារិទ្ធ ក៏បានបញ្ជាក់ឲ្យដឹងផងដែរថា ក្នុងរយៈពេលមួយឆមាស ឆ្នាំ២០២៣នេះ អគ្គនាយកដ្ឋានអន្តោប្រវេសន៍ក៏បានពិនិត្យ និងបន្តការអនុញ្ញាតិ ឲ្យជនបរទេសចំនួនជិតបីសែននាក់រស់នៅកម្ពុជាបន្តទៀត ខណៈការផ្តល់ទិដ្ឋាកាចេញជាងពីរពាន់នាក់ និងផ្តល់ជូនជនបរទេសមិនមែនជាអន្តោប្រវេសន៍ស្នាក់នៅបណ្តោះអាសន្ន រយៈពេលយូរជាងពីរសែនប្រាំបីម៉ឺន នាក់ផងដែរ។
ឯកឧត្តម នាយឧត្តមសេនីយ៍ អគ្គនាយក ក៏បានឲ្យដឹងផងដែរថា ក្នុងរយៈពេល៦ខែឆ្នាំ២០២៣នេះក៏ មានជនបរទេសជិត២៦ម៉ឺននាក់បានមកសុំប័ណ្ណធ្វើការងារនៅប្រទេសកម្ពុជាផងដែរ ខណៈការស្នើសុំនេះគឺមានការសហការគ្នាជាមួយក្រសួងការងារបណ្តុះបណ្តាលវិជ្ជាជីវៈ។
ឯកឧត្តម សុខ ផល រដ្ឋលេខាធិការ ក៏បានជំរុញឲ្យនគរបាលអន្តោប្រវេសន៍ខិតខំកិច្ចការងាររបស់ខ្លួនឲ្យសកម្មបន្ថែមទៀត ក្នុងកិច្ចការត្រួតពិនិត្យជនអន្តោប្រវេសន៍ខុសច្បាប់ ដើម្បីសន្តិសុខជាតិ ខណៈកិច្ចការងារដែលនគរបាលអន្តោប្រវេសន៍បានធ្វើនាពេលកន្លងមក បានល្អប្រសើរក៏ពិតមែន ប៉ុន្តែវាក៏នៅមានភាពចន្លោះប្រហោងដែលត្រូវតែបំពេញ និងត្រូវទប់ស្កាត់ឲ្យបានផងដែរ ៕
