ស៊ុយអែត បង្កើនការប្រកាសអាសន្នចំពោះអំពើភេវរកម្ម បន្ទាប់ពីក្រុមបាតុករដុតគម្ពីគូរ៉ា
ស៊ុយអែត៖ សេវាសន្តិសុខរបស់ប្រទេសស៊ុយអែត SAPO បានបង្កើនការវាយតម្លៃរបស់ខ្លួនលើកម្រិតនៃការគំរាមកំហែងប្រឆាំងនឹងស៊ុយអែតដល់ ៤ នៅលើមាត្រដ្ឋាន ៥ ចំពេលមានភាពតានតឹងអន្តរជាតិកាន់តែខ្លាំងឡើងលើការដុតច្បាប់ចម្លងនៃគម្ពីគូរ៉ានៅឯបាតុកម្មនៅក្នុងប្រទេស Nordic។
សេវាសន្តិសុខបានឲ្យដឹងនៅក្នុងសេចក្តីថ្លែងការណ៍មួយថា ការគំរាមកំហែងប្រឆាំងនឹងប្រទេសស៊ុយអែតបានផ្លាស់ប្តូរជាបណ្តើរៗ ហើយការគំរាមកំហែងនៃការវាយប្រហារពីតួអង្គនៅក្នុងសាសនាអ៊ីស្លាមដ៏ឃោរឃៅបានកើនឡើងក្នុងអំឡុងពេលឆ្នាំនេះ។
SAPO បានឲ្យដឹងថា ប្រទេសស៊ុយអែតបានចាកចេញពីការត្រូវបានចាត់ទុកថាជាគោលដៅស្របច្បាប់សម្រាប់ការវាយប្រហារភេរវករ ទៅត្រូវបានចាត់ទុកថាជាគោលដៅអាទិភាព។
ក្នុងរយៈពេលប៉ុន្មានខែកន្លងមកនេះ ប្រទេសស៊ុយអែត និងដាណឺម៉ាកបានប្រឈមមុខនឹងការរិះគន់ពីបណ្តាប្រទេសមូស្លីម បន្ទាប់ពីក្រុមសកម្មជនប្រឆាំងអ៊ីស្លាមបានដុតច្បាប់ចម្លងនៃគម្ពីគូរ៉ា ដែលជាសៀវភៅបរិសុទ្ធរបស់មូស្លីម។
នៅក្រោមច្បាប់សេរី ការដុតគម្ពីគូរ៉ាត្រូវបានអនុញ្ញាតនៅក្នុងប្រទេសស៊ុយអែត ប៉ុន្តែទង្វើនេះត្រូវបានចាត់ទុកថាជាអំពើបាបដោយពិភពមូស្លីម។
ខណៈពេលដែលប្រទេសដាណឺម៉ាក និងស៊ុយអែតបានថ្កោលទោសការដុតបំផ្លាញ និងកំពុងពិចារណាលើច្បាប់ថ្មីដើម្បីបញ្ឈប់ការកើតឡើងនេះ អ្នករិះគន់ក្នុងស្រុកបានឲ្យដឹងថា វានឹងធ្វើឱ្យប៉ះពាល់ដល់ច្បាប់របស់ពួកគេស្តីពីសេរីភាពដែលត្រូវបានការពារ។
ប្រទេសជាច្រើនបានបរិហារការប្រមាថគម្ពីគូរ៉ា។ នៅក្នុងប្រទេសដែលកាន់សាសនាឥស្លាមភាគច្រើន ប្រជាជនបានតវ៉ា និងព្យាយាមបំផ្លិចបំផ្លាញស្ថានទូតស៊ុយអែត និងដាណឺម៉ាក។
ជាការឆ្លើយតប ដាណឺម៉ាក និងស៊ុយអែតបានរឹតបន្តឹងការគ្រប់គ្រងព្រំដែនរបស់ពួកគេក្នុងខែនេះ បន្ទាប់ពីភ័យខ្លាចការវាយប្រហារសងសឹក ចំពោះការដុតបំផ្លាញ។
នាយករដ្ឋមន្ត្រីដាណឺម៉ាក លោក Mette Frederiksen បានឲ្យដឹងថា អត្ថបទសាសនាមិនគួរត្រូវបានដុតចោលទេ។
«ខ្ញុំគិតថា វានឹងខុសប្រសិនបើអ្នកណាម្នាក់ឈរនៅទីនោះ ហើយដុតគម្ពីរ។ ខ្ញុំក៏មិនគិតថាយើងគួរដុត Torah សម្រាប់ជាប្រយោជន៍ដល់អ្នកដែលមានជំនឿរបស់សាសន៍យូដាដែរ»។
កាលពីសប្តាហ៍មុន ការិយាល័យបរទេស សម្ព័ន្ធ និងអភិវឌ្ឍន៍របស់ចក្រភពអង់គ្លេស បានព្រមានពលរដ្ឋប្រឆាំងនឹងការទៅទស្សនាប្រទេសស៊ុយអែត ដោយសារតែការកើនឡើងនៃលទ្ធភាពនៃការវាយប្រហារដោយសារតែការបង្ហាញអំពីសាសនាអ៊ីស្លាម។
នៅក្នុងការណែនាំអំពីការធ្វើដំណើរដែលបានធ្វើបច្ចុប្បន្នភាព ចក្រភពអង់គ្លេសបានឲ្យដឹងថា ប្រទេសស៊ុយអែតបានបង្អាក់ការវាយប្រហារដែលបានគ្រោងទុកមួយចំនួន និងធ្វើការចាប់ខ្លួនដោយជោគជ័យ។
ក្រសួងបានប្រាប់ភ្ញៀវទេសចរថា អ្នកគួរតែប្រុងប្រយ័ត្ននៅពេលនេះ។ ភេរវករទំនងជាព្យាយាម និងធ្វើការវាយប្រហារនៅក្នុងប្រទេសស៊ុយអែត។
ទីប្រឹក្សាសន្តិសុខជាតិស៊ុយអែត Henrik Landerholm បានឲ្យដឹងថា ការវាយលុកស្ថានទូតស៊ុយអែត នៅក្នុងប្រទេសអ៊ីរ៉ាក់ កាលពីថ្ងៃទី១៩ ខែកក្កដា ការប៉ុនប៉ងវាយប្រហារលើស្ថានទូតរបស់ខ្លួននៅលីបង់នៅថ្ងៃទី០៩ ខែសីហា និងការបាញ់ប្រហារកាលពីថ្ងៃទី០១ ខែសីហា លើបុគ្គលិកនៅស្ថានកុងស៊ុលស៊ុយអែត នៅក្នុងប្រទេសទួរគី បានរួមចំណែកដល់ការវាយតម្លៃហានិភ័យរបស់រដ្ឋាភិបាលបរទេស។
រដ្ឋាភិបាលសហរដ្ឋអាមេរិកក៏បានព្រមានអំពីការវាយប្រហារដែលអាចកើតមាននៅក្នុងប្រទេសស៊ុយអែតនៅក្នុងការណែនាំរបស់ខ្លួនដល់អ្នកដំណើរ។
ប្រភព៖ Aljazeera
ប្រែសម្រួលដោយ៖ {ឡាយ លីហួ}
