តំណាងឯកឧត្តមបណ្ឌិត ហ៊ុន ម៉ាណែត ចុះសួរសុខទុក្ខព្រឹទ្ធាចារ្យ ស៊ាន គឹមសៀន ដែលកំពុងសម្រាកព្យាបាលជម្ងឺនៅមន្ទីរពេទ្យមិត្តភាពកម្ពុជា-ចិន

ភ្នំពេញ៖ លោកជំទាវបណ្ឌិត ដាំ ដារីនី តំណាងដ៏ខ្ពង់ខ្ពស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងនិងលោកជំទាវបណ្ឌិត ពេជ ចន្ទមុន្នី អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តសម្តេចតេជោធីតា (TYDA) នៅថ្ងៃទី១៨ ខែសីហា ឆ្នាំ២០២៣ បានអញ្ជេីញចុះសួរសុខទុក្ខ និងនាំយកឧបត្ថមសម្ភារៈមួយចំនួន ថវិកាចំនួន ១០លានរៀល និងការចំណាយព្យាបាលទាំងអស់ ជូនព្រឹទ្ធាចារ្យ ស៊ាន គឹមសៀន ជាលោកគ្រូគុនល្បុក្កតោ ដែលកំពុងសម្រាកព្យាបាលជម្ងឺនៅឯមន្ទីរពេទ្យមិត្តភាពកម្ពុជា-ចិន (ព្រះកុសម:)។

នាឱកាសនោះ លោកជំទាវបណ្ឌិត ដាំ ដារីនី សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានផ្នែកសិល្បះ និងកីឡានៃយុវជនគណបក្សថ្នាក់កណ្តាល តំណាងដ៏ខ្ពង់ខ្ពស់ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល បានពាំនាំការសាកសួរសុខទុក្ខ សេចក្តីនឹករលឹក ការយកចិត្តទុកដាក់បំផុតពី ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជូនលោកគ្រូព្រឹទ្ធាចារ្យ និងសូមបួងសួងដល់គុណបុណ្យព្រះរតនត្រ័យ វត្ថុសក្តិសិទ្ធិក្នុងលោក សូមតាមជួយបីបាច់រក្សា ជូនលោកគ្រូព្រឹទ្ធាចារ្យ ស៊ាន គឹមសៀន មានជន្មាយុយឺនយូរ ឆាប់ជាសះស្បើយ និងមានសុខភាពល្អប្រសើរឡើងវិញដើម្បីបន្តស្នាដៃជូនកូនចៅជំនាន់ក្រោយ។

លោកគ្រូព្រឹទ្ធាចារ្យ ស៊ាន គឹមសៀន គឺជាស្ថាបនិកគុនល្បុក្កតោ ដែលបានធ្វើឱ្យគុនល្បុក្កតោរស់ឡើងវិញ និងមានការរីកចម្រើន។ តាមរយៈការជ្រោមជ្រែងពីលោកគ្រូ អ្នកគ្រូ និងថ្នាក់ដឹកនាំជាច្រើនទៀត អង្គការយូណេស្កូបានអនុម័តយល់ព្រមចុះគុនល្បុក្កតោ ក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី២៩ ខែវិច្ឆិកា ឆ្នាំ២០២២ នៅទីក្រុងរ៉ាបាត ព្រះរាជាណាចក្រម៉ារុក។

លោកគ្រូព្រឹទ្ធាចារ្យ បានធ្លាក់ខ្លួនឈឺចូលសង្គ្រោះបន្ទាន់នៅមន្ទីរពេទ្យព្រះកុសុមៈ បច្ចុប្បន្ននេះ គាត់បានធូរស្រាលគ្រាន់បើ និងចេញពីបន្ទប់សង្គ្រោះបន្ទាន់ហើយ។

នាឱកាសនោះ លោកគ្រូព្រឹទ្ធាចារ្យ ស៊ាន គឹមសៀន និងក្រុមគ្រួសារ ក៏សូមថ្លែងអំណរគុណយ៉ាងជ្រាវជ្រៅដល់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ព្រមទាំងបុត្រា បុត្រី ជួបប្រទះតែនឹងពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ លោកគ្រូព្រឹទ្ធាចារ្យ ស៊ាន គឹមសៀន និងក្រុមគ្រួសារ ក៏សូមជូនពរ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្រ្ដី នៃព្រះរាជាណាចក្រកម្ពុជា នីតិកាលទី៧ នៃរដ្ឋសភា បន្ដដឹកនាំព្រះរាជាណាចក្រកម្ពុជា ឆ្ពោះទៅកាន់សុខសន្តិភាព វឌ្ឍនភាព និងភាពសម្បូរសប្បាយរុងរឿងជានិច្ចនិរន្តរ៍តរៀងទៅ ៕