តើបទល្មើសអ្វីដែលជនបរទេសខ្លះ ត្រូវបណ្តេញចេញពីប្រទេស ខណៈខ្លះទៀតត្រូវកាត់ទោស ឱ្យជាប់ពន្ធនាគារនៅកម្ពុជាជាមុនសិន?

ភ្នំពេញ៖ អគ្គនាយកដ្ឋានអន្តោប្រវេសន៍បានបណ្ដេញជនបរទេសដែលប្រព្រឹត្តល្មើសច្បាប់ចេញពីកម្ពុជាជាបន្តបន្ទាប់ ប៉ុន្ដែជនបរទេសខ្លះត្រូវបានបញ្ជូនទៅប្រទេសកំណើតខ្លួនវិញភ្លាម ខណៈខ្លះទៀតតម្រូវឱ្យកាត់ទោសជាប់ពន្ធនាគារនៅកម្ពុជាជាមុនសិនទើបបណ្ដេញចេញតាមក្រោយ។

ឯកឧត្តម នាយឧត្តមសេនីយ៍ កែវ វណ្ណថន អគ្គនាយករងអន្តោប្រវេសន៍ នាថ្ងៃទី១៨ សីហានេះ បានពន្យល់ថា «ករណីបទឧក្រិដ្ឋធ្ងន់ធ្ងរគេត្រូវបញ្ជូនទៅតុលាការកាត់ទោសសិន ហើយចុងបញ្ចប់គង់តែបណ្ដេញចេញទេ។ ប៉ុន្ដែបើករណីបទល្មើសអន្តោប្រវេសន៍បទលើ្មសស្រាល យើងចាប់ហើយបណ្ដេញចេញតាមច្បាប់ស្តីពីអន្តោប្រវេសន៍ ដូចជាការស្នាក់នៅលើសទិដ្ឋាកា ឬឆ្លងដែនខុសច្បាប់ ប៉ុន្ដែបើបទល្មើសគ្រឿងញៀនត្រូវបញ្ជូនទៅតុលាការដើម្បីកាត់ទោសឱ្យជាប់ទោសសិន ក្រោយទទួលទោសនៅពន្ធធនាគាររួចហើយទើបបណ្ដេញចេញ»។

ក្នុងរយៈពេលមួយឆមាស ឆ្នាំ២០២៣នេះ អគ្គនាយកដ្ឋានអន្តោប្រវេសន៍បានបណ្ដេញជនបរទេសចំនួន១០៣៨នាក់មកពី២៦សញ្ជាតិចេញជាបន្តបន្ទាប់ ក្រោយរកឃើញថាពួកគេបានរស់នៅ និងធ្វើការនៅកម្ពុជាដោយខុសច្បាប់ និងខ្លះទៀតបានប្រព្រឹត្តល្មើសច្បាប់ជាដើម។ ក្នុងនោះមានជនជាតិចិនច្រើនជាងគេគឺមានចំនួន៥៤៩នាក់ ជនជាតិឥណ្ឌូនេស៊ីចំនួន១៦៩នាក់ ជនជាតិវៀតណាមចំនួន១២៩នាក់ ថៃចំនួន២៦នាក់ម៉ាឡេស៊ី២៥នាក់ និងជនជាតិបរទេសផ្សេងៗទៀត។

បន្ថែមពីនេះ អគ្គនាយកដ្ឋានអន្តោប្រវេសន៍បានពិនិត្យ និងបន្តការអនុញ្ញតឱ្យជនបរទេសចំនួនជិត៣សែននាក់រស់នៅកម្ពុជាបន្តទៀត ខណៈការផ្តល់ទិដ្ឋាកាចេញជាង២ពាន់នាក់ និងផ្តល់ជូនជនបរទេសមិនមែនជាអន្តោប្រវេសន៍ស្នាក់នៅបណ្តោះអាសន្ន រយៈពេលយូរជាង២សែន៨ម៉ឺននាក់ផងដែរ។​
ក្នុងរយៈពេល៦ខែឆ្នាំ២០២៣នេះក៏មានជនបរទេសជិត២៦ម៉ឺននាក់បានមកសុំបណ្ណធ្វើការងារនៅប្រទេសកម្ពុជាផងដែរ ខណៈការស្នើសុំនេះគឺមានការសហការគ្នាជាមួយក្រសួងការងារបណ្តុះបណ្តាលវិជ្ជាជីវៈ។

គួររំលឹកផងដែរថា តាមរបាយការណ៍របស់អគ្គនាយកដ្ឋានអន្តោប្រវេសន៍កាលពីឆ្នាំ២០២២បានឱ្យដឹងថា ជនបរទេសដែលបានជាប់ពន្ធនាគារនៅកម្ពុជាមានចំនួន ១ ៦១២នាក់ ដែលមកពី ៤៥សញ្ជាតិ ក្នុងនោះជនជាតិដែលមានច្រើនជាងគេ គឺវៀតណាម ចិន និងថៃ។ ទន្ទឹមនឹងនោះ អាជ្ញាធរក៏បានបណ្តេញជនបរទេសដែលស្នាក់នៅដោយខុសច្បាប់ និងរត់គេចខ្លួនពីសំណាញ់ច្បាប់ពីបរទេសមកលាក់ខ្លួននៅកម្ពុជា សរុបចំនួន ៥ ៨២៥នាក់ ដែលមាន ៤២សញ្ជាតិ ផងដែរ៕