ឯកឧត្ដម ឈឿន ប៊ុណ្ណារ័ត្ន អញ្ជើញបូកសរុបលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៧ នៅក្រុងក្រចេះ
ភ្នំពេញ៖ ឯកឧត្ដម ឈឿន ប៊ុណ្ណារ័ត្ន សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងក្រចេះ នៅថ្ងៃសុក្រ ២ កើត ខែស្រាពណ៍ ឆ្នាំថោះបញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៨ ខែសីហា ឆ្នាំ២០២៣ បានអញ្ជើញជាគណៈអធិបតីក្នុងពិធី ប្រជុំបូកសរុបលទ្ធផលការបោះឆ្នោតជ្រើសតាំងតំណាងរាស្ត្រនីតិកាលទី៧ អមដំណើរដោយឯកឧត្តម យ៉ង់ សែម ប្រធានក្រុមការងារគណបក្សថ្នាក់កណ្តាលចុះជួយសង្កាត់រកាកណ្តាល ឯកឧត្តម អ៊ុយ ភារក្ស ប្រធានក្រុមការងារគណបក្សចុះមូលដ្ឋានសង្កាត់កោះទ្រង់ ឯកឧត្តម វន សុវណ្ណារី ប្រធានក្រុមការងារគណបក្សចុះមូលដ្ឋានសង្កាត់ក្រចេះ នៅសាលប្រជុំគណបក្សប្រជាជនកម្ពុជាខេត្ត។
កិច្ចប្រជុំនេះក៏មានការអញ្ជើញចូលរួមពី ឯកឧត្តម លោកជំទាវ លោក លោកស្រី អនុប្រធាន ក្រុមការងារគណបក្សគ្រប់លំដាប់ថ្នាក់ចុះមូលដ្ឋានក្រុងក្រចេះ គណៈកម្មាធិការគណបក្សក្រុង គណៈកម្មាធិការគណបក្សសង្កាត់ទាំង ៥ គណៈកម្មាធិការសាខាបក្សភូមិទាំង១៩ ស្មៀនសង្កាត់ ប៉ុស្ត៍រដ្ឋបាលសង្កាត់ យុវជនគណបក្សក្រុង យុវជនគណបក្សសង្កាត់ អនុសាខាសមាគមន៍នារីកម្ពុជាដើម្បីសន្តិភាព និងអភិវឌ្ឍន៍ ដែលមានសមាសភាពចូលរួមសរុបចំនួន ៣១៦នាក់ ។
បន្ទាប់ពីរបាយការណ៍ស្វាគមន៍របស់លោក សំ ស៊ា គណ:កម្មាធិការគណបក្សក្រុងក្រចេះ រួចមក ឯកឧត្តម ឈឿន ប៊ុណ្ណារ័ត្ន បានថ្លែងសំណេះសំណាល និងផ្តាំផ្ញើ ដែលមានខ្លឹមសារថា លទ្ធផលបោះឆ្នោតជ្រើសតាំងតំណាងរាស្ត្រ នីតិកាលទី៧ ទូទាំងប្រទេសគាំទ្រគណបក្សប្រជាជនកម្ពុជាយ៉ាងច្រើនសន្ធឹកសន្ធាប់ គឺជាកាគាំទ្រសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី និង ឯកឧត្តមទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រីបន្តវេន។
ឯកឧត្តមប្រធាន បានបន្តថាភាពទាក់ទាញនៃកម្មវិធីនយោបាយដែលចាក់ដោតបេះដូងរបស់ប្រជាជនគឺគោលនយោបាយលេីកកំពស់ជីវភាពប្រជាជនកម្ពុជា យុគសម័យ ឌីជីថល នឹងធ្វេីអោយឆាកនយោបាយកាន់តែលំបាកក្នុងការគ្រប់គ្រងស្ថេរភាពនយោបាយ រដ្ឋាភិបាលជម្រុញការចុះបញ្ជីដី និងសេវាផ្សេងៗ អោយបានកាន់តែល្អប្រសើរ រឹតបន្តឹងបន្ថែមទៀតក្នុងការទប់ស្កាត់បញ្ហាគ្រឿងញៀន និងល្បែងស៊ីសង ពង្រឹងគណនីយ្យភាព ឃុំ សង្កាត់ ត្រូវបម្រើតម្រូវការប្រជាជនពលរដ្ឋក្នុងមូលដ្ឋាន ដោះស្រាយបញ្ហាដីសម្បទានសង្គមកិច្ចឲ្យបានចប់ក្នុងអាណត្តិទី៧នេះ ជំរុញក្នុងការចេញប័ណ្ឌកាន់កាប់ដីធ្លីជូនប្រជាពលរដ្ឋអោយបានឆាប់ចប់ ពង្រឹងបន្ថែមសេវាសុខាភិបាល ត្រូវបណ្ដុះបណ្ដាលបន្ថែមមន្ត្រីគណបក្សថ្មីៗ បន្តធ្វើល្អបន្ថែមទៀតក្នុងការបម្រើប្រជាពលរដ្ឋក្នុងមូលដ្ឋាន គណបក្សមូលដ្ឋានត្រូវអភិវឌ្ឍភូមិឃុំអោយល្អប្រសើរក្នុងការបម្រើប្រជាជនតាមវិជ្ជាជីវៈ។
ក្នុងឱកាសនេះដែរឯកឧត្តមប្រធានបានប្រគល់ប័ណ្ណថ្លែងអំណរគុណដល់ថ្នាក់ដឹកនាំ សមាជិក សមាជិកា ក្រុមការងារគណបក្សទាំងថ្នាក់កណ្ដាល និងថ្នាក់មូលដ្ឋាន ចំនួន ៥៨០សន្លឹក និងបានប្រគល់ប្រាក់រង្វាន់ភូមិខ្លាំងទាំង ១៩ភូមិ អស់ថវិកាចំនួន ៤៥,០០០,០០០រៀល សង្កាត់ខ្លាំងទាំង ៥សង្កាត់ អស់ថវិកាចំនួន ១៧,០០០,០០០រៀល និងបានឧបត្ថម្ភគណៈកម្មការគណបក្សក្រុងចំនួន ៥,០០០,០០០រៀល។ ដោយឡែកឯកឧត្តម អ៊ុយ ភារក្ស បានឧបត្ថមអំពូលសូឡា និងបង្គោល ចំនួន ១០ឈុត ជូនដល់អនុវិទ្យាល័យកោះទ្រង់ ក្នុងសង្កាត់កោះទ្រង់ផងដែរ ៕
