សម្ព័ន្ធគ្រូពេទ្យស.ស.យ.ក ជូនអំណោយ និងពិនិត្យព្យាបាលជំងឺ អប់រំសុខភាពផ្លូវចិត្តជូនកុមារកំព្រា និងកុមារទុរគតនៅអង្គការផ្ទះបាយកុមារ
ភ្នំពេញ៖ តបតាមការចង្អុលបង្ហាញរបស់ឯកឧត្តម ហ៊ុន ម៉ានី ប្រធានស.ស.យ.ក និងលោកជំទាវ យឹម ឆៃលីន ប្រធានកិត្តិយសសម្ព័ន្ធគ្រូពេទ្យស.ស.យ.ក ជារៀងរាល់ខែក្រុមគ្រូពេទ្យស្មគ្រចិត្តនៃសម្ព័ន្ធគ្រូពេទ្យស.ស.យ.ក តែងចុះពិនិត្យ ព្យាបាលជំងឺ និងអប់រំសុខភាពផ្លូវចិត្ត ព្រមទាំងជានិច្ចកាលកៀរគរអំណោយសប្បុរសធម៌នានាដើម្បីយកមកជូនកុមារកំព្រា និងកុមារទុរគតនៅអង្គការផ្ទះបាយកុមារ ជាក់ស្តែងនៅព្រឹកថ្ងៃទី១៩ ខែសីហា ឆ្នាំ២០២៣នេះ ក្រុមគ្រូពេទ្យស្មគ្រចិត្តនៃសម្ព័ន្ធគ្រូពេទ្យស.ស.យ.ក ចំនួន៣៨នាក់ ដឹកនាំដោយឯកឧត្តមបណ្ឌិត ហេង សុខគង់ បានចុះពិនិត្យ ព្យាបាលជំងឺ អប់រំសុខភាពមាត់-ធ្មេញ និងសុខភាពផ្លូវចិត្តកុមារបានចំនួន២២៥នាក់ ដែលក្នុងនោះផ្នែកជំងឺទូទៅកុមារចំនួន១០៥នាក់ ផ្នែកមាត់-ធ្មេញចំនួន៨០នាក់ ផ្នែកអេកូសាស្រ្តចំនួន២០នាក់ និងផ្នែកអប់រំផ្លូវចិត្តកុមារបានចំនួន២០នាក់។
ក្រៅពីការពិនិត្យ និងព្យាបាលជំងឺ ក្រុមគ្រូពេទ្យបានពាំនាំនូវអំណោយមួយចំនួនមកចែកជូនដល់កុមារទាំងអស់ផងដែរដូចជានំស្រួយលីលីចំនួន៥០០កញ្ចប់ វីតាមីនសេចំនួន៥,០០០គ្រាប់ ព្រមទាំងមានការចូលរួមពីសប្បុរសជននានាមានដូចជាបបរគ្រឿងចំនួន២៣០ចាន សៀវភៅ ប៊ិច អង្ករ ទឹកដោះគោ ទឹកត្រី ទឹកស៊ីអ៊ីវ និងគ្រឿងឧបភោគ បរិភោគមួយចំនួនទៀត ។
លោកពូ ង៉ូវ ឈីវ ប្រធានអង្គការផ្ទះបាយកុមារ ក្នុងនាមកុមារទាំងអស់សូមថ្លែងអំណរគុណដល់ឯកឧត្តម ហ៊ុន ម៉ានី និងលោកជំទាវ ដែលជានិច្ចកាលតែងឧបត្ថម្ភគាំទ្រ និងរៀបចំជាកម្មវិធីកំសាន្តនានាធ្វើឱ្យកុមារយើងមានសេចក្តីសប្បាយរីករាយ ហើយជាក់ស្តែងការពិនិត្យ និងអប់រំសុខភាពកុមារនៅថ្ងៃនេះ ជាការចូលរួមចំណែកមួយដ៏សំខាន់ក្នុងការលើកកម្ពស់សុខភាព និងសុខុមាលភាពកុមារយើង ដែលជាធនធានសម្រាប់ប្រទេសជាតិនាពេលខាងមុខផងដែរ៕
