ឯកឧត្តម វេង សាខុន អញ្ជើញចូលរួមក្នុងសម័យប្រជុំលើកដំបូងនៃរដ្ឋសភា សម្រាប់នីតិកាលទី៧
ភ្នំពេញ៖ ឯកឧត្តម វេង សាខុន នាព្រឹកថ្ងៃទី២១ ខែសីហា ឆ្នាំ២០២៣ បានអញ្ជើញចូលរួមក្នុងសម័យប្រជុំលើកដំបូងនៃរដ្ឋសភា សម្រាប់នីតិកាលទី៧ ក្រោមព្រះរាជាអធិបតីភាពដ៏ខ្ពង់ខ្ពស់បំផុត ព្រះករុណាជាអម្ចាស់ជីវិតលើត្បូង ព្រះករុណាសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅវិមានរដ្ឋសភា។ ដោយបានធ្វើឲ្យបេក្ខជនជាប់ឆ្នោតជាតំណាងរាស្រ្ត ក្លាយជាសមាជិកសភា ក្រោយពីទទួលបានការគាំទ្រពីសំណាក់ប្រជាពលរដ្ឋមកលើគណបក្សប្រជាជនកម្ពុជា, ក្រោមការដឹកនាំដ៏ឈ្លាសវ៉ៃបំផុតរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា នៅទូទាំងប្រទេសយ៉ាងភ្លូកទឹក ភ្លូកដី តាមរយៈលទ្ធផលនៃការបោះឆ្នោតជ្រើសតាំងតំណាងរាស្រ្ត នីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅនេះ។
ដោយឡែកចំពោះតួនាទីជាសមាជិកសភាដែលឯកឧត្តម វេង សាខុន ទទួលបាននាពេលនេះ អាចចាត់ទុកថាជាភារកិច្ចថ្មីរបស់ឯកឧត្តម ក្រោយពីបានបំពេញភារកិច្ចជូនរាជរដ្ឋាភិបាល អស់រយៈពេល៣៦ឆ្នាំកន្លងមក បន្ទាប់ពីបានបញ្ចប់ការសិក្សានៅមហាវិទ្យាល័យធារាសាស្រ្តកសិកម្ម នាដើមឆ្នាំ១៩៨៧ ៕
