សម្តេចចៅហ្វាវាំង គង់ សំអុល ផ្ញើសារអបអរសាទរឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ដែលត្រូវបានរដ្ឋសភាបោះឆ្នោត ផ្តល់សេចក្តីទុកចិត្តជា នាយករដ្ឋមន្ត្រីនៃកម្ពុជា
ភ្នំពេញ៖ នៅថ្ងៃទី២២ ខែសីហា ឆ្នាំ២០២៣នេះ សម្តេចចៅហ្វាវាំង វររៀងជ័យ អធិបតីស្រឹង្គារ គង់ សំអុល អនុប្រធានអចិន្ត្រៃយ៍កាកបាទក្រហមកម្ពុជា បានផ្ញើសារលិខិតអបអរសាទរជូន ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត ដែលត្រូវបានរដ្ឋសភា នីតិកាលទី៧ បោះឆ្នោតផ្តល់សេចក្តីទុកចិត្តជា នាយករដ្ឋមន្ត្រី នៃព្រះរាជាណាចក្រកម្ពុជា នីតិកាលទី៧ នៃរដ្ឋសភា។
ក្នុងសារលិខិតអបអរសាទររបស់ សម្តេចចៅហ្វាវាំង មានខ្លឹមសារថា៖ «ក្នុងនាមគណៈកម្មាធិការកណ្តាល គណៈកម្មាធិការសាខារាជធានី-ខេត្ត មន្រ្តី បុគ្គលិក អ្នកស្ម័គ្រចិត្ត និងយុវជនកាកបាទក្រហមកម្ពុជាទូទាំងប្រទេស និងក្នុងនាមខ្ញុំផ្ទាល់ ខ្ញុំមានក្តីសោមនស្សរីករាយឥតឧបមា សូមចូលរួមអបអរសាទរប្រកបដោយមោទនភាព ចំពោះ ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត ដែលត្រូវបានរដ្ឋសភា នីតិកាលទី៧ បោះឆ្នោតផ្តល់សេចក្តីទុកចិត្តជា នាយករដ្ឋមន្ត្រី នៃព្រះរាជាណាចក្រកម្ពុជា អាណត្តិទី៧។
ការទទួលបានតំណែងជាប្រមុខដឹកនាំនៃស្ថាប័ននីតិប្រតិបត្តិដ៏ឧត្តុង្គឧត្តមនេះ គឺពិតជាស័ក្តិសមបំផុត ចំពោះ ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត ដែលជាអគ្គមគ្គុទ្ទេសក៍វ័យក្មេងដ៏ឆ្នើមមួយរូប មានគុណធម៌ សីលធម៌ គតិបណ្ឌិតខ្ពស់ សមត្ថភាពពេញលេញ ទេពកោសល្យ និងមានមនសិការស្នេហាជាតិ ក្នុងការប្រតិបត្តិតាមគន្លងមាគ៌ាដ៏ល្អប្រពៃ និងមរតកនយោបាយដ៏ថ្លៃថ្លាបំផុតរបស់ សម្តេចអគ្គមហាសេនាបតីតេជោ ហ៊ុន សែន ដែលជាស្ថាបនិកនៃនយោបាយ ឈ្នះ ឈ្នះ និងជាបិតាសន្តិភាពរបស់កម្ពុជា។
ខ្ញុំ និងសហការីនៃកាកបាទក្រហមកម្ពុជា មានការជឿជាក់យ៉ាងមុតមាំលើភាពស្វាហាប់ អង់អាចក្លាហាន ឈ្លាសវៃ ហ្មត់ចត់ និងឆន្ទៈមោះមុត ប្រកបដោយថាមភាពរបស់ ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត ក្នុងការដឹកនាំកម្ពុជាឱ្យទទួលបានជោគជ័យថ្មីៗថែមទៀត បន្តរក្សាបានស្ថិរភាពនយោបាយ សុខសន្តិភាព ដែលជាខ្យល់ដង្ហើមសម្រាប់មនុស្សគ្រប់ៗរូបត្រូវការខានមិនបាន រួមជាមួយការអភិវឌ្ឍរីកចម្រើនលើគ្រប់វិស័យ ដើម្បីបន្តលើកស្ទួយឧត្តមភាព និងកិត្យានុភាពល្បីល្បាញនៃព្រះរាជាណាចក្រកម្ពុជា ទាំងក្នុងតំបន់ និងនៅលើសកលលោក។
ជាថ្មីម្តងទៀត ខ្ញុំ និងសហការីនៃកាកបាទក្រហមកម្ពុជា សូមជូនពរ ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត និង លោកជំទាវបណ្ឌិត ព្រមទាំង បុត្រា បុត្រី ជាទីស្រឡាញ់ សូមបានប្រកបដោយព្រះពុទ្ធពរទាំង ៤ប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍តរៀងទៅ៕»
ខាងក្រោមនេះ ជាខ្លឹមសារទាំងស្រុងនៃសារលិខិតអបអរសាទររបស់ សម្តេចចៅហ្វាវាំង គង់ សំអុល ផ្ញើជូនឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត៖
