សមត្ថកិច្ច កំពុងតាមចាប់អ្នកផ្ដល់កាំភ្លើង ឲ្យក្រុមឧក្រិដ្ឋជនចូលប្លន់រំដោះ អ្នកទោសគ្រឿងញៀន នៅសៀមរាប

ភ្នំពេញ៖ សមត្ថកិច្ចកំពុងកំណត់មុខសញ្ញាអ្នកផ្ដល់កាំភ្លើង ដល់ក្រុមជនសង្ស័យរំដោះទណ្ឌិតមេក្លោងគ្រឿង​ញៀ​ន នៅខេត្តសៀមរាប ខណៈកម្លាំងសមត្ថកិច្ច កំពុងបន្តស្រាវជ្រាវរកអ្នកពាក់ព័ន្ធបន្ថែមទៀត ខណៈអ្នកទោ​ស​ដែលរត់គេចនោះ ត្រូវសមត្ថកិច្ចចាប់ខ្លួនបានមកវិញហើយ។

នាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិ មានប្រសាសន៍ក្នុងសន្និសីទសារព័ត៌​មាន នាព្រឹកថ្ងៃទី២៣ ខែសីហា ឆ្នាំ២០២៣ថា មកដល់ថ្ងៃនេះ កិច្ចសហប្រតិបត្តិការស្រាវជ្រាវបង្រ្កាបបទល្មើស ពាក់ព័ន្ធនឹងករណីក្រុមប្រដាប់អាវុធមួយ ដែលហៅថា ធ្វើសកម្មភាពរំដោះ ឬប្លន់ទណ្ឌិតនៅខេត្តសៀមរាបនោះ ត្រូវចាប់ខ្លួនបានមកវិញហើយ។ ឯកឧត្ដមនាយឧត្ដមសេនីយ៍ថា មកដល់ពេលនេះ ទណ្ឌិតឈ្មោះ ជិន ស៊ិនហាន នេះ គឺសមត្ថកិច្ចចាប់បានហើយ បន្ទាប់ពីត្រូវបានក្រុមជនសង្ស័យបិទមុខ៦នាក់ ជួយរំដោះឱ្យគេចខ្លួន នៅគ្លីនិកពេទ្យធ្មេញមួយកន្លែង នៅខេត្តសៀមរាប កាលពីថ្ងៃទី១៧ ខែសីហា ឆ្នាំ២០២៣កន្លងទៅ។ ជនសង្ស័យដែលត្រូវឃាត់ខ្លួនមានចំនួន១១នាក់ ក្នុងនោះមានមួយចំនួនជាជនជាតិខ្មែរសញ្ជាតិអាម៉េរិក និងមានជនជាតិចិនសញ្ជាតិអាម៉េរិកម្នាក់ផងដែរ។

ឯកឧត្ដមនាយឧត្ដមសេនីយ៍បញ្ជាក់ថា «សមត្ថកិច្ចកម្ពុជា បានទាក់ទងទៅកាន់ស្ថានទូតអាម៉េរិកប្រចាំកម្ពុជារួចហើយ ដើម្បីទទួលព័ត៌មានបន្ថែមទៀតពីក្រុមជនសង្ស័​យទាំងនោះ។ យើងបានសាកសួរ ហើយឥឡូវយើងបានទាក់ទងជាមួយស្ថានទូតអាម៉េរិក ខាងកុងស៊ុល គេមកជួបសម្ភាសន៍ពួកហ្នឹងហើយ នៅខាង DA ភ្នាក់ងារប្រឆាំងគ្រឿងញៀនអាម៉េរិកហ្នឹង យើងក៏បានជូនព័ត៌មាន ហើយក៏ជួយយើងដែរ ឥឡូវយើងកំពុងបញ្ជូនឈ្មោះទាំងអស់នេះ និងប៉ាស្ព័រ ដើម្បីឱ្យពិនិត្យមើលថា តើនៅអាម៉េរិកវាមានសកម្មភាព បទល្មើសអីខ្លះអាហ្នឹងទាល់តែសួរខាងគេ យើងបានបញ្ជូនទៅហើយ»។

នាយឧត្ដមសេនីយ៍ ម៉ក់ ជីតូ លើកឡើងថា កាំភ្លើងដែលក្រុមជនសង្ស័យប្រើប្រាស់ ក្នុងសកម្មភាពរំដោះទណ្ឌិតមេក្លោងគ្រឿងញៀន នៅខេត្តសៀមរាបនោះ មិនមែនយកមកពីអាម៉េរិកនោះទេ គឺមានអ្នករៀបចំនៅក្នុងប្រទេសកម្ពុជា ហើយសមត្ថកិច្ចកំណត់មុខសញ្ញាបានហើយ។

ឯកឧត្ដមនាយឧត្ដមសេនីយ៍បន្ថែមថា «ចំពោះកាំភ្លើងនេះ វាអត់មានយកមកពីអាម៉េរិកមកទេ កាំភ្លើងហ្នឹងគឺថា មានអ្នករៀបចំនៅនេះ ហើយមិញនេះ យើងទើបតែរកឃើញថែមទៀត តើកាំភ្លើងទិញពីខាងណា យើងដឹងហើយឥឡូវនេះ កំពុងតាមចាប់ម្ចាស់កាំភ្លើង» ៕