គ.ជ.អ.ប រៀបចំកិច្ចប្រជុំពិនិត្យលើសេចក្ដីព្រាងសេចក្ដីណែនាំនៃការអនុវត្តមុខងារវិស័យអប់រំ ផ្ទេរទៅឱ្យរដ្ឋបាល ក្រុង ស្រុក ខណ្ឌ
ភ្នំពេញ៖ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ នាព្រឹកថ្ងៃសុក្រ ទី២៥ ខែសីហា ឆ្នាំ២០២៣ បានរៀបចំកិច្ចប្រជុំពិនិត្យ និងពិភាក្សាលើសេចក្ដីព្រាង នូវសេចក្ដីណែនាំស្ដីពីគោលការណ៍បែបបទ និងនីតិវិធី នៃការអនុវត្តមុខងារវិស័យអប់រំ ដែលបានផ្ទេរទៅឱ្យរដ្ឋបាល ក្រុង ស្រុក ខណ្ឌ ក្រោមអធិបតីភាព ឯកឧត្តម ចាន់ សុធា អនុរដ្ឋលេខាធិការក្រសួងមហាផ្ទៃ និងជាអនុប្រធានលេខាធិការដ្ឋាន គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.)។ ក្នុងកិច្ចប្រជុំនេះមានការចូលរួមពី នាយកសាលាជាតិរដ្ឋបាលមូលដ្ឋាន ទីប្រឹក្សាសាលាជាតិរដ្ឋបាលមូលដ្ឋាន និងថ្នាក់ដឹកនាំ មន្ត្រី នៃ គ.ជ.អ.ប ជាច្រើនរូបទៀត។
នាឱកាសនោះ ឯកឧត្តម ចាន់ សុធា អនុរដ្ឋលេខាធិការ ក្រសួងមហាផ្ទៃ បានលើកឡើងថា គោលបំណងសំខាន់ នៃការរៀបចំកិច្ចប្រជុំនាពេលនេះ ដើម្បីពិនិត្យ និងផ្ដល់យោបល់ទៅលើសេចក្ដីព្រាងនេះ ដែលបានផ្ដួចផ្ដើម និងរៀបចំតាក់តែងឡើងដោយក្រសួងអប់រំ យុវជន និងកីឡា ដោយមានការគាំទ្រពីសាលាជាតិរដ្ឋបាលមូលដ្ឋាន នៃក្រសួងមហាផ្ទៃ និងលេខាធិការដ្ឋាន គ.ជ.អ.ប. ព្រមទាំងអង្គការអភិវឌ្ឍន៍អន្តរជាតិអាល្លឺម៉ង់ (GIZ)ផងដែរ។
ឯកឧត្តមអនុរដ្ឋលេខាធិការ បានណែនាំដល់អង្គប្រជុំឱ្យចូលរួមផ្ដល់មតិយោបល់លើសេចក្ដីព្រាង នូវសេចក្ដីណែនាំស្ដីពីគោលការណ៍បែបបទ និងនីតិវិធី នៃការអនុវត្តមុខងារវិស័យអប់រំ មុននឹងរៀបចំសិក្ខាសាលាពិគ្រោះយោបល់លើសេចក្ដីព្រាងនេះ។
គួររម្លឹកផងដែរថា កន្លងមក ក្រសួងអប់រំ យុវជន និងកីឡា បានសហការជាមួយលេខាធិការដ្ឋាន គ.ជ.អ.ប. និងក្រសួងមហាផ្ទៃ បានរៀបចំជាសេចក្តីព្រាងដំបូង នៃសេចក្ដីណែនាំស្តីពីគោលការណ៍បែបបទ និងនីតិវិធី នៃការគ្រប់គ្រង ការចាត់ចែង និងការអនុវត្តមុខងារ ការគ្រប់គ្រង ការអប់រំកុមារតូច ការគ្រប់គ្រងការអប់រំបឋមសិក្សា ការគ្រប់គ្រងការអប់រំក្រៅប្រព័ន្ធ ការគាំទ្ររដ្ឋបាល គាំទ្រគ្រឹះស្ថានមធ្យមសិក្សាចំណេះទូទៅ ការអភិវឌ្ឍយុវជន និងការអប់រំកាយ និងកីឡា ដែលបានផ្ទេរទៅឱ្យរដ្ឋបាលក្រុង ស្រុក ខណ្ឌ ៕
