ឧបនាយករដ្ឋមន្ត្រី ហង់ជួន ណារ៉ុន៖ ការលេីកកម្ពស់វិស័យអប់រំផ្ដោតលើការពង្រឹងគុណភាពសាលារដ្ឋចាប់ពីថ្នាក់មត្តេយ្យសិក្សាដល់ថ្នាក់មធ្យមសិក្សា
ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី២៥ ខែសីហា ឆ្នាំ២០២៣ បានដឹកនាំកិច្ចប្រជុំ និងជួបសំណេះសំណាល ព្រមទាំងអបអរសាទរដល់សមិទ្ធិផលការងារដែលសម្រេចបានក្នុងរយៈពេល១០ឆ្នាំកន្លងទៅនេះ និងរៀបចំយុទ្ធសាស្ត្រការងារដេីម្បីកំណែទម្រង់វិស័យអប់រំក្នុងអាណត្តិថ្មីឆ្នាំ២០២៣-២០២៨ និងចូលរួមចំណែកក្នុងកំណែទម្រង់រដ្ឋាភិបាលថ្មីអាណត្តិទី៧។
កិច្ចប្រជុំនេះមានគោលដៅដាក់ចេជាយុទ្ធសាស្ត្រក្នុងការសម្រួចអាទិភាពនៃកំណែទម្រង់ក្រសួងអប់រំ យុវជន និងកីឡា សម្រាប់ឆ្នាំ២០២៣-២០២៨ ដោយយោងតាមអនុសាសន៍របស់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីព្រះរាជាណាចក្រកម្ពុជា នៅក្នុងកិច្ចប្រជុំដំបូងគណៈរដ្ឋមន្ត្រីសម្រាប់នីតិកាលទី៧។
ឯកឧត្តមកិត្តិទេសាភិបាលបណ្ឌិត បានលេីកឡើងថា ការលេីកកម្ពស់វិស័យអប់រំផ្ដោតលើការពង្រឹងគុណភាពសាលារដ្ឋចាប់ពីថ្នាក់មត្តេយ្យសិក្សាដល់ថ្នាក់មធ្យមសិក្សាតាមរយៈការពង្រឹងកិច្ចការសំខាន់ៗរួមមាន៖
ទី១.ការពង្រឹងអភិបាលកិច្ចសាលារៀន។
ទី២.ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សា។
ទី៣.ការយកចិត្តទុកដាក់ទៅលេីសុខភាពសិស្ស។
ទី៤.ការជំរុញ និងលើកទឹកចិត្តការចូលរួមរបស់មាតាបិតាអាណាព្យាបាល និងសហគមន៍ក្នុងការអប់រំ។
ក្នុងអាណត្តិទី៧នេះ រាជរដ្ឋាភិបាលកម្ពុជា នឹងដាក់ចេញយុទ្ធសាស្ត្របញ្ចកោណដែលបានចាត់ទុកការអភិវឌ្ឍធនធានមនុស្សជាអាទិភាពទីមួយសម្រាប់ដំណាក់កាលបន្ទាប់នៃយុទ្ធសាស្ត្របញ្ចកោណដំណាក់កាលទីមួយ។ ក្រសួងអប់រំ យុវជន និងកីឡានឹងបន្តកំណែទម្រង់វិស័យអប់រំដែលផ្ដោតលើការពង្រឹងគុណភាពអប់រំនៅគ្រប់កម្រិតសិក្សាការបង្កើនការចូលរៀនមុខវិជ្ជាវិទ្យាសាស្ត្រ និងបច្ចេកវិទ្យា ការអប់រំឌីជីថល ជំរុញការពង្រឹងការបណ្ដុះបណ្ដាលជំនាញសម្រាប់យុវជន ពង្រឹងការអប់រំកាយ និងកីឡានិងភាពជាពលរដ្ឋល្អ ៕
