រដ្ឋមន្រ្តីក្រសួងអប់រំ អរគុណចំពោះភាគីចិនដែលតែងផ្តល់ការគាំទ្ររយៈពេលវែងសម្រាប់ការអភិវឌ្ឍន៍វិស័យអប់រំក្នុងប្រទេសកម្ពុជា
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា នៅថ្ងៃទី២៥ ខែសីហា ឆ្នាំ២០២៣ បានអញ្ជើញចូលរួមក្នុងពិធីអបអរសាទរឆ្នាំមិត្តភាពកម្ពុជាចិន២០២៣ និងជូនដំណើរនិស្សិតអាហារូបករណ៍ទៅបន្តការសិក្សានៅប្រទេសចិន។
ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានថ្លែងសុន្ទរកថាជាភាសាចិន និងខ្មែរ ដោយបានថ្លែងអំណរគុណយ៉ាងជ្រាលជ្រៅជូនចំពោះភាគីចិនដែលតែងផ្តល់ការគាំទ្ររយៈពេលវែងសម្រាប់ការអភិវឌ្ឍន៍វិស័យអប់រំក្នុងប្រទេសកម្ពុជា និងសង្ឃឹមថាមិត្តភាពរវាងកម្ពុជា និងចិន នៅតែបន្ដល្អនឹងគ្នាជារៀងដរាបទៅ។
បន្ថែមពីនេះទៅទៀត ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី បានជូនពរដល់សិស្សានុសិស្សអារូបករណ៍ទាំងអស់ ទទួលបានភាពជ័យជោគក្នុងការសិក្សានៅឯប្រទេសចិន និងត្រឡប់មកមាតុភូមិកំណើតវិញជាមួយនឹងសមត្ថភាពដ៏ពេញលេញ និងសម្បូរបែប ៕
