ឯកឧត្តម វង សូត អញ្ជើញប្រគល់អំណោយផ្ទះមួយខ្នង ជូនដូនចាស់ជរាគ្មានទីពឹងនិងជួបសំណេះសំណាយជាមួយប្រជាពលរដ្ឋក្នុងឃុំជាច ស្រុកកំចាយមារ
ភ្នំពេញ៖ ឯកឧត្តម វង សូត អនុប្រធានទី២ នៃរដ្ឋសភា នាព្រឹកថ្ងៃទី២៦ ខែសីហា ឆ្នាំ២០២៣ បានអញ្ជើញប្រគល់អំណោយផ្ទះថ្មមួយខ្នង ជូនដូនចាស់ជរាទីទាល់ក្រ គ្មានទីពឹងមួយរូប ឈ្មោះ ហ៊ួត យាត អាយុ ៨៣ឆ្នាំ រស់នៅភូមិជួរថ្នល់ ឃុំជាច ស្រុកកំចាយមារ ខេត្តព្រៃវែង។
លោកយាយ ហ៊ួត យាត មានក្តីរំភើបឥតឧបមានៅពេលទទួលបានផ្ទះមួយខ្នងដ៏ស្រស់ស្អាតនេះ។ លោកយាយបញ្ជាក់ទាំងក្តីរំភើបថា នេះពិតជាសំណាងណាស់ដែលនៅក្នុងជីវិតលោកយាយមិនមានក្តីប្រាថ្នាថានឹងមានផ្ទះល្អស្អាតបែបនេះរស់នៅឡើយ។ លោកយាយបានថ្លែងអំណរគុណជ្រាលជ្រៅជូន ឯកឧត្តម វង សូត និងលោកជំទាវ ព្រមទាំងបុត្រាបុត្រី ចៅប្រុសស្រី ដែលមានសន្ធាយ៉ាងធំធេង ផ្តល់អំណោយដ៏វិសេសវិសាលជូនលោកយាយនាឱកាសនេះ និងបានជូនពរឯកឧត្តម និងលោកជំទាវ បុត្រាបុត្រី ចៅប្រុសស្រី រួមនឹងក្រុមការងារទាំងអស់ជួបតែពុទ្ធពរទាំងបួនប្រការកុំបីឃ្លៀងឃ្លាតឡើយ។
ផ្ទះថ្មដែលជាអំណោយរបស់ ឯកឧត្តម វង សូត និងលោកជំទាវ បានប្រគល់ជូនលោកយាយ ហ៊ួត យាត នាឱកាសនេះ សាងសង់អស់ថវិកា ២០លានរៀល មានទទឹង ៤ម៉ែត្រកន្លះ និងបណ្តោយ៨ម៉ែត្រកន្លះ ដោយមានកំពាក់អំពូលភ្លើងសូឡាផងដែរ។
ក្រោយពីប្រគល់ផ្ទះជូនលោកយាយ ហ៊ួត យាត ហើយ ឯកឧត្តម វង សូត បានជួបសំណេះសំណាល សាកសួរសុខទុកប្រជាពលរដ្ឋ និងបានចុះពិនិត្យមើលសាលារៀនជាច បន្តទៀត។ សាលារៀនជាច ជាកន្លែងដែលឯកឧត្តម វង សូត ធ្លាប់សិក្សាកាលពីកុមារភាព និងក្នុងពេលបច្ចុប្បន្ននេះ ឯកឧត្តម បានផ្តួចផ្តើមកសាងអគារសិក្សាថ្មី។
នៅក្នុងឱកាសនោះ ឯកឧត្តមពាំនាំការផ្តាំផ្ញើសាកសួរសុខពីថ្នាក់ដឹកនាំស្ថាប័ននីតិប្បញ្ញត្តិ នីតិប្រតិបត្តជូនលោកតា លោកយាយ លោកគ្រូអ្នកគ្រូ និងប្រជាពលរដ្ឋ។ ឯកឧត្តម បានថ្លែងអំណរគុណដល់ប្រជាពលរដ្ឋដែលបានបោះឆ្នោតជូនគណបក្សប្រជាជនកម្ពុជា ដើម្បីឱ្យគណបក្សបានដឹកនាំប្រទេស បន្តរក្សាបានសុខសន្តិភាព និងការអភិវឌ្ឍកាន់តែរីកចម្រើនទៅមុខទៀត ៕
