កិច្ចប្រជុំជំរុញណែនាំ ដល់អាជ្ញាធរ ឃុំ សង្កាត់ ស្តីពីការពិនិត្យឈ្មោះបោះឆ្នោត
ភ្នំពេញ៖ នៅព្រឹកថ្ងៃទី២៨ ខែសីហា ឆ្នាំ២០២៣ លេខាធិការដ្ឋានរៀបចំការបោះឆ្នោតខេត្តបន្ទាយមានជ័យ បានកោះអញ្ជើញដល់អស់លោក លោកស្រី ជាមន្ត្រីឃុំ សង្កាត់ទូទាំងខេត្ត និងមន្ត្រីគណៈកម្មាធិការរៀបចំការបោះឆ្នោត បានបើកកិច្ចប្រជុំផ្សព្វផ្សាយសេចក្ដីណែនាំ សេចក្ដីណែនាំលេខ៥១ ផ្សាយសេចក្ដីប្រកាសលេខ ១៧២ និងសេចក្ដីណែនាំលេខរួមលេខ០៣ របស់គណៈកម្មាធិការជាតិរៀបចំការបោះឆ្នោត ។
ក្នុងកិច្ចប្រជុំនេះផងដែរក៏មានការអញ្ជើញចូលរួមពីសំណាក់ឯកឧត្តម ឡោ ប៊ុនពេជ្រ សមាជិកក្រុមប្រឹក្សាខេត្ត លោក ឈឿន ក្រៃយ៉ុង អភិបាលរងខេត្ត ។
លោក យ៉ង់ សក្កិ ប្រធានលេខាធិការដ្ឋានរៀបចំការបោះឆ្នោតខេត្តបន្ទាយមានជ័យបានមានប្រសាសន៍ថា៖ ក្នុងកិច្ចប្រជុំនៅថ្ងៃនេះមានបីចំណុចសំខាន់ៗរួមមាន៖ទី១/-សេចក្ដីណែនាំស្ដីពីការផ្តល់លិខិតអញ្ជើញអ្នកមានឈ្មោះក្នុងបញ្ជីឈ្មោះបោះឆ្នោតជាផ្លូវការឆ្នាំ២០២២ ក្នុងគោលបំណងទី១ដើម្បី ជម្រាបជូនដំណឹងដល់ប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោត អត្តសញ្ញាណប័ណ្ណសញ្ជាតិខ្មែរដែលអស់សុពលភាព។ ទី២/- សេចក្ដីសម្រេចស្ដីពីការពិនិត្យបញ្ជីឈ្មោះនៃការចុះឈ្មោះបោះឆ្នោតឆ្នាំ២០២៣ ដោយគណៈកម្មការជាតិរៀបចំការបោះឆ្នោតនិងទី៣/- សេចក្ដីណែនាំរួមស្ដីពីកិច្ចសហការការពារសន្តិសុខសុវត្ថិភាពនិងសណ្ដាប់ធ្នាប់សាធារណៈសម្រាប់ការពិនិត្យបញ្ជីឈ្មោះនៃការចុះឈ្មោះបោះឆ្នោតអាចផ្តល់សុពលភាពលើបញ្ជីបោះឆ្នោតនាឆ្នាំពីរ២០២៣។
ថ្លែងនាឱកាសនោះ លោកឈឿនក្រៃយ៉ុងអភិបាលរងខេត្តបន្ទាយមានជ័យបានកោតសរសើរដល់កងកម្លាំងប្រដាប់អាវុធគ្រប់ប្រភេទដែលតែងតែចូលរួមសហការការពារសន្តិសុខសុវត្ថិភាពនិងសណ្ដាប់ធ្នាប់សាធារណៈសម្រាប់ដំណើរការ ពិនិត្យបញ្ជីឈ្មោះបោះឆ្នោត និងការចុះឈ្មោះបោះឆ្នោតជាពិសេសការការពារបានយ៉ាងល្អប្រសើរចំពោះការបោះឆ្នោតជ្រើសតាំងតំណាងរាស្ត្រនីតិកាលទី៧កន្លងទៅថ្មីៗនេះ ទទួលបានជោគជ័យយ៉ាងត្រចះត្រចង់ជាមួយនេះក៏សុំឲ្យអស់លោក លោកស្រី ដែលបានអញ្ជើញចូលរួមកិច្ចប្រជុំនៅថ្ងៃនេះពេលវិលត្រឡប់ទៅមូលដ្ឋានវិញ ត្រូវខិតខំបំពេញការងារឲ្យចំគោលដៅបានល្អប្រសើរដែលគ.ជ.បបានធ្វើការពន្យល់និងណែនាំ ៕
