មន្ត្រីជាន់ខ្ពស់ក្រសួងធនធានទឹក ជួបប្រជុំពិភាក្សាលើកិច្ចប្រជុំកម្រិតថ្នាក់ដឹកនាំសម្រាប់ផែនការថវិកាឆ្នាំ២០២៤

ភ្នំពេញ៖ កាលពីថ្ងៃទី២៨ ខែសីហា ឆ្នាំ២០២៣ ឯកឧត្តម ចាន់ យុត្ថា រដ្ឋលេខាធិការ ក្រសួងធនធានទឹក និងឧតុនិយម បានដឹកនាំប្រតិភូជួបប្រជុំពិភាក្សាជាមួយ ឯកឧត្តម ចាន់ សុធី រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ ក្នុងកម្រិតកិច្ចប្រជុំថ្នាក់ដឹកនាំលើគម្រោងផែនការថវិកាឆ្នាំ២០២៤។

សមាសភាពចូលរួមកិច្ចប្រជុំនេះមកពីក្រសួងសេដ្ឋកិច្ច និងហិរញ្ញវត្ថុ (នាយកដ្ឋានថវិកានីយកម្ម នាយកដ្ឋានវិនិយោគ នាយកដ្ឋានហិរញ្ញកិច្ច និងនាយកដ្ឋានលទ្ធកម្មសាធារណៈ) រីឯសមាសភាពចូលរួមមកពីក្រសួងធនធានទឹក និងឧតុនិយម រួមមាន៖ នាយកដ្ឋានក្រោមឱវាទក្រសួង អាជ្ញាធរទន្លេសាប និងគណៈកម្មាធិការជាតិទន្លេមេគង្គកម្ពុជា។

ក្រោយពីអង្គប្រជុំបានពិភាក្សាយ៉ាងលម្អិតទៅតាមកម្មវិធី អនុកម្មវិធី ចង្កោមសកម្មភាព និងតាមមាតិកា ចំណាត់ថ្នាក់សេដ្ឋកិច្ចរួចមក ឯកឧត្តម ចាន់ សុធី រដ្ឋលេខាធិការតំណាងប្រតិភូនៃក្រសួងសេដ្ឋកិច្ច និងហិរញ្ញវត្ថុ បានណែនាំក្រសួងធនធានទឹក និងឧតុនិយម រៀបចំនូវចំណុចសំខាន់ៗ និងសំណូមពរមួយចំនួនដូចខាងក្រោម៖

– ការរៀបចំផែនការថវិកាប្រចាំឆ្នាំនាពេលខាងមុខ ត្រូវបញ្ចូលចំណាយវិនិយោគសាធារណៈ ផ្សារភ្ជាប់ជាមួយថវិកាចរន្តក្នុងច្បាប់ថវិកាកម្មវិធី ជាមួយថវិការបស់ដៃគូអភិវឌ្ឍន៍នានាមានដូចជា (WB, ADB, AFD, AIIB, EIB,….)។

– សំណូមពរឱ្យមន្ត្រីជំនាញចុះសិក្សាការបាក់ច្រាំងទន្លេនៅផ្លូវជាតិលេខ១១ ត្រង់កំណាត់ផ្លូវជិតដល់សាលាស្រុកពាមរក៍ ស្ថិតក្នុងខេត្តព្រៃវែង ដើម្បីមានវិធានការទប់ស្កាត់ឱ្យបានទាន់ពេលវេលា បង្ការការបាក់ច្រាំងដល់ផ្លូវជាតិ។

– អង្គប្រជុំបានសម្រេចបន្ថែមថវិកាជូនដល់មន្ទីរធនធានទឹក និងឧតុនិយមរាជធានី-ខេត្ត ទាំង ២៥៕