ប្រកាសចូលកាន់មុខតំណែង ប្រធានក្រុមប្រឹក្សាឃុំ និងជាមេឃុំតាឡំ ស្រុកមង្គលបូរី
បន្ទាយមានជ័យ៖ អស់លោកដែលទើបប្រកាសតែងតាំងថ្មីពេលនេះត្រូវតែបន្តខិតខំរួមសហការសាមគ្គីគ្នាដើម្បីធ្វើការអភិវឌ្ឍន៍និងបម្រើសេវាសាធារណៈជូនប្រជាពលរដ្ឋក្នុងមូលដ្ឋានឲ្យកាន់តែល្អនិងប្រសើរឡើងបន្ថែមទៀត ហើយរក្សាសន្តិភាពនយោបាយនិងសណ្ដាប់ធ្នាប់សង្គមក្នុងមូលដ្ឋាន សំដៅធានាបាននូវកំណើនសេដ្ឋកិច្ចតាមរយៈផលិតកម្មលើគ្រប់ផ្នែកគ្រប់វិស័យដើម្បីលើកកម្ពស់ជីវភាពរស់នៅរបស់ប្រជាជនឲ្យបានកាន់តែរីចម្រើនឡើងថែមមួយកម្រិតទៀត។
នេះគឺជាប្រសាសន៍លើកឡើងរបស់ឯកឧត្តមអ៊ុំ រាត្រី អភិបាលខេត្តបន្ទាយមានជ័យ ក្នុងពិធីប្រកាសចូលកាន់មុខតំណែងជាប្រធានក្រុមប្រឹក្សាឃុំ និងជាមេឃុំតាឡំ ស្រុកមង្គលបូរី ថ្ងៃទី២៨ ខែសីហា ឆ្នាំ២០២៣ ដែលមានការចូលរួមពី ឯកឧត្តម ប្លែក វ៉ារី សមាជិកក្រុមប្រឹក្សាខេត្តបន្ទាយមានជ័យ។
ជាមួយនោះ ឯកឧត្តម អ៊ុំ រាត្រី បានធ្វើការកោតសរសើរ និងវាយតម្លៃខ្ពស់ចំពោះសមិទ្ធផលទាំងអស់នៅក្នុងឃុំ ដែលលោក លោកស្រី នៅមូលដ្ឋានក៏ដូចជាឯកឧត្តម លោកជំទាវ ក្រុមការងារខេត្ត ចុះជួយស្រុកមង្គលបូរី និងឃុំ បានខិតខំប្រឹងប្រែងរួមសាមគ្គីសហការណ៍គ្នា ក្នុងការអភិវឌ្ឍន៍មូលដ្ឋាន និងបម្រើសេវាសាធារណៈ ទាំងសេវាសំណូមពរ និងសេវាតម្រូវការជូនប្រជាពលរដ្ឋបានយ៉ាងល្អប្រសើរក្នុងរយៈពេលកន្លងមក។
ឯកឧត្តម បានបន្តលើកឡើងថា ពិធីប្រកាសចូលកាន់មុខតំណែងជាប្រធានក្រុមប្រឹក្សាឃុំ និងជាមេឃុំតាឡំ ស្រុកមង្គលបូរី គឺជាដំណើរការធម្មតានៃនីតិវិធីស្របទៅតាមសហលក្ខន្តិកៈមន្ត្រីរាជការស៊ីវិល ក្នុងមុខងារសាធារណៈគឺសំដៅធ្វើយ៉ាងណាដើម្បីឆ្លើយតបទៅ នឹងតម្រូវការចាំបាច់ក្នុងការបម្រើសេវាសាធារណៈជូនប្រជាពលរដ្ឋឲ្យបានកាន់តែមានប្រសិទ្ធភាពនិងប្រសើរឡើងថែមទៀត។
បញ្ជាក់៖ តាមប្រកាសរបស់ក្រសួងមហាផ្ទៃ លេខ៣៦១៨ ប្រ.ក ប្រកាសស្ដីពីការចូលកាន់មុខតំណែងជាប្រធានក្រុមប្រឹក្សាឃុំ និងជាមេឃុំតាឡំ ស្រុកមង្គលបូរី៖១/-ប្រធានក្រុមប្រឹក្សាឃុំ និងជាមេឃុំលោក ខ្ចៅ យ៉ាន ជំនួសលោក ហ៊ុត ឈិត ដោយមូលហេតុសម័យខ្លួន(លោកហ៊ុត ឈិត)សុំលាលែងពីតំណែង។ ២/-សមាជិកក្រុមប្រឹក្សាឃុំ និងជាជំទប់ទី១ លោក ខ្ចៅ យ៉ាន ជំនួសដោយលោក ធិម ប្រោញ ។៣/-ទទួលស្គាល់លោក អ៊ឹម ហង្សសាន ជំនួសលោក ធិម ប្រោញ ជាសមាជិកក្រុមប្រឹក្សាឃុំតាឡំ ស្រុកមង្គលបូរី ខេត្តបន្ទាយមានជ័យ ៕
