ឯកឧត្ដម ជា សុគន្ធា មានភារកិច្ចជួយរដ្ឋមន្ត្រីមហាផ្ទៃ លើការងារតាមដានហ្វេសប៊ុករដ្ឋមន្ត្រីមហាផ្ទៃ និងហ្វេសប៊ុក សម្ដេច ស ខេង
ភ្នំពេញ៖ ឯកឧត្ដម ជា សុគន្ធា ជារដ្ឋលេខាធិការ មានភារកិច្ចជួយឯកឧត្ដមអភិសន្តិបណ្ឌិត ស សុខា រដ្ឋមន្ត្រីក្រសួងមហាផ្ទៃ លើការងារតាមដានដោះស្រាយ សំណើ សំណូមពររបស់មហាជនក្នុងទំព័រហ្វេសប៊ុក រដ្ឋមន្ត្រីមហាផ្ទៃ និងហ្វេសប៊ុកសម្ដេចក្រឡាហោម និងក្រុមការងារអន្តរក្រសួង ដើម្បីសិក្សាស្រាវជ្រាវ និងដោះស្រាយករណីរកឃើញគ្រាប់យុទ្ធភណ្ឌមិនទាន់ផ្ទុះក្រុមទឹក តាមដងទន្លេ ។
ជាមួយគ្នានោះដែររដ្ឋមន្ត្រី ស សុខា ក៏បានបែងចែកការងារជូនអនុរដ្ឋលេខាធិការមានឯកឧត្ដម អៀង អូនី សម្រាប់ជួយកិច្ចការងារឯកឧត្ដម ជា សុគន្ធា ។
នេះបើយោងតាមសេចក្ដីសម្រេច កំណត់របៀបរបបការងារ និងបែងចែកភារកិច្ចជូនរដ្ឋមន្ត្រី រដ្ឋលេខាធិការ និងអនុរដ្ឋលេខាធិការ សំដៅធានាការអនុវត្តច្បាប់ និងដឹកនាំកិច្ចការទូទៅរបស់ក្រសួងមហាផ្ទៃ កាលពីថ្ងៃទី២៨ ខែសីហា ឆ្នាំ២០២៣ ។
