ឧត្តមសេនីយ៍ទោ សិទ្ធិ ឡោះ អញ្ជើញបើកវគ្គបណ្តុះបណ្តាលស្តីពីបច្ចេកទេសស៉ើបអង្គេតឧក្រិដ្ឋកម្មហិរញ្ញវត្ថុកាស៉ីណូ ដល់សិក្ខាកាមនគរបាល ៥៦រូប
ភ្នំពេញ៖ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ នាព្រឹកថ្ងៃទី០៤ ខែកញ្ញា ឆ្នាំ២០២៣ បានអញ្ជើញជាអធិបតីក្នុងពិធីបើកវគ្គបណ្តុះបណ្តាល ស្តីពីបច្ចេកទេសស៉ើបអង្គេតឧក្រិដ្ឋកម្មហិរញ្ញវត្ថុកាស៉ីណូ ដល់សិក្ខាកាមនគរបាល ៥៦រូប។
ពិធីនេះមានការអញ្ជើញចូលរួមពី លោក លោកស្រី ឧត្តមសេនីយ៍ត្រី វរសេនីយ៍ ស្នងការរង ចំនួន១១រូប លោក លោកស្រី នាយ នាយរងការិយាល័យជំនាញ លោកអធិការ អធិការរងគ្រប់បណ្តាក្រុងស្រុក មេបញ្ជាការវរ:ទាំង៤ សិក្ខាកាមចូលរួមវគ្គចំនួន៥៦រូប ស្រី១រូប។ វគ្គបណ្តុះបណ្តាលនេះមានរយះពេល១០ថ្ងៃ គិតចាប់ពីថ្ងៃទី០៤ ដល់ថ្ងៃទី១៤ ខែកញ្ញា ឆ្នាំ២០២៣ នៅស្នងការដ្ឋាននគរបាលខេត្តបន្ទាយមានជ័យ។
គោលបំណងនៃវគ្គបណ្តុះបណ្ដាល អំពីការស៊ើបអង្កេតឧក្រិដ្ឋកម្មហិរញ្ញវត្ថុកាស៊ីណូនេះ ត្រូវបានរៀបចំឡើងដើម្បីអភិវឌ្ឍ ចំណេះដឹង ពង្រឹងជំនាញ និង សមត្ថភាពមន្ត្រីអនុវត្តន៍ច្បាប់ដែលមានទំនួលខុសត្រូវក្នុងកិច្ចការ ស៊ើបអង្កេតផលបទល្មើសព្រហ្មទណ្ឌទាក់ទងទៅនឹងឧស្សាហកម្មកាស៊ីណូ ក្រោមប្រធានបទ៖ ការទប់ស្កាត់ក្រុម ឧក្រិដ្ឋកម្ម អង្គការចាត់តាំងកេងបន្លំក្នុងកាស៊ីណូ ការលាងសម្អាតប្រាក់ ទីកន្លែងកើតហេតុ និង ការប្រមូលភស្តុតាង ភាពងាយរងគ្រោះនៃកាស៊ីណូ បទល្មើសមានអង្គការចាត់តាំងឆ្លងដែន ច្បាប់ជាតិ និង អន្តរជាតិ ព្រមទាំងបទបង្ហាញ ពីសំណុំរឿងជាក់ស្តែងមួយចំនួនផងដែរ។
លោកឧត្តមសេនីយ៍ទោ សិទ្ធិ ឡោះ បានជម្រុញឲ្យកម្លាំងនគរបាលដែលជាសិក្ខាកាមទាំងអស់ត្រូវប្រឹងប្រែងរៀនសូត្រ ដើម្បីពង្រឹងសមត្ថភាព ចំណេះ ជំនាញ វិជ្ជាជីវៈ របស់ខ្លួន យកទៅប្រើជាប្រយោជន៍សម្រាប់អង្គភាព និងត្រូវដើរតាមឲ្យទាន់ការដឹកនាំបែបឌីជីថល ស្របតាមយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា។
លោកឧត្តមសេនីយ៍ទោ ស្នងការ ក៏បាន ក្រើនរំលឹកដល់ លោក លោកស្រីនាយការិយាល័យជំនាញ លោកអធិការគ្រប់បណ្តាក្រុង-ស្រុក លោកមេបញ្ជាការវរ:ទាំង ត្រូវបន្តយកចិត្តទុកដាក់ ការគ្រប់គ្រងអង្គភាព ទ្រព្យសម្បត្តិរដ្ឋ ការគ្រប់គ្រងកម្លាំង លិខិតស្នាម ឯកសារគតិយុត្តិ វិន័យ និងត្រូវពង្រឹងការផ្តល់សេវាសាធារណ:ជូនពលរដ្ឋឲ្យបានទាន់ពេលវេលា ៕
